Дүнјанын бөјүк шәһәрләриндә пијадалар Јеһованын Шаһидләринин Мүгәддәс Јазылара әсасланан әдәбијјат арабаларыны ҝөрмәјә алышыблар. Мисал үчүн, бу арабалар Алманијанын Берлин, Көлн, Мүнһен, Һамбург вә диҝәр бөјүк шәһәрләриндә гурашдырылыр.

Ҝөрәсән, әдәбијјат арабалары алманларын сәјаһәт етдикләри кичик шәһәрләрдә дә диггәт чәкәҹәкми? Мәсәлән, шимали курорт шәһәрләриндә, саһилјаны әразиләрдә, Балтик вә Шимал дәнизиндәки адаларда бу арабалара неҹә јанашаҹаглар? 2016-ҹы илдә Јеһованын Шаһидләринин Мәркәзи Авропа филиалы хүсуси кампанија тәшкил етди. Әдәбијјат арабалары илә бөјүк шәһәрләрдә тәблиғ едән 800-ә јахын Јеһованын Шаһиди мај-октјабр ајларында кечирилән бу кампанијада иштирак етмәк истәјини билдирди. Алманијанын шималында 60-а јахын әразидә кечирилән бу кампанијаја һәтта Вјана (Австрија) кими узаг мәсафәдән дә гошуланлар вар иди.

Јеһованын Шаһидләри сәмими гаршыланды. Көнүллүләрдән бири дејир: «Инсанлар мараг ҝөстәрирди. Онлар чох достјана, сөһбәтҹил идиләр». Плөн шәһәринә сәјаһәт едән Һејди дејир: «Бир нечә ҝүндән сонра ҹамаат бизә шәһәрин ајрылмаз һиссәси кими јанашмаға башлады. Һәтта бәзиләри бизи ҝөрәндә әл еләјирди». Ешитмә гүсурлу олан бир киши жест дилиндә сөјләди: «Һара ҝедирәм, сизә раст ҝәлирәм!» О, өз достлары илә Алманијанын ҹәнуб-шәргиндә ешитмә гүсурлу инсанлар үчүн тәшкил олунан бир мәрасимдән гајыдырды. Орада да Јеһованын Шаһидләринә раст ҝәлмишди.

Һәтта јерли сакинләрин бәзиләри өз көмәкликләрини тәклиф едирди. Вангероге адасында бир полис Шаһидләрә јахынлашараг даһа чох инсанла сөһбәт едә билмәләри үчүн бәзи мәсләһәтләр верди. Варен Мүритздә бир тур ҝәмисинин капитаны сәрнишинләрә мараглы јерләри ҝөстәрирди. Лимандакы әдәбијјат арабаларыны ҝөстәрәрәк дејирди: «Орада исә Аллаһ һаггында өјрәнә биләрсиниз». Истираһәт едәнләрин бәзиләри арабалара јахынлашыб плакатлардакы јазылары охујурду.

Нөвбәти үч брошүр һәм туристләрин, һәм дә јерли сакинләрин марағына сәбәб олду:

• «Аллаһ һәгигәтән дә бизим гејдимизә галырмы?» Бир турист белә сөзләр дејир: «Бу суал мәни узун мүддәт иди ки, марагландырырды. Инди исә тәтилдәјәм вә бу барәдә охумаг үчүн вахтым вар».

• «Илаһи мүждә». Бир јашлы киши Јеһованын Шаһидинә өз дининдән наразы олдуғуну дејир. Шаһидләр она изаһ едирләр ки, һеч бир инсан проблемләримизи һәлл едә билмәз, буна јалныз Аллаһ гадирдир. Киши мәмнунијјәтлә брошүрү ҝөтүрүр вә охујаҹағына сөз верир.

• «Мән дә Аллаһ һагда өјрәнирәм». Ата өз балаҹа гызына ушаглар үчүн тәртиб олунмуш бу брошүрү ҝөтүрмәјә иҹазә верир. Өзү исә «Мүгәддәс Китаб һекајәләри» китабыны ҝөтүрүб «бунун аиләмизә хејри дәјәҹәк» сөзләрини дејир.

Үмумиликдә, инсанлар 3600-дән чох нәшр ҝөтүрдүләр. Бәзиләри Јеһованын Шаһидләри илә етдикләри сөһбәти давам етдирмәк үчүн онлары зијарәт етмәји хаһиш едирдиләр.

Бу кампанијада иштирак едән Јеһованын Шаһидләри бөјүк зөвг алдылар. Балтик дәнизинин јахынлығындакы әразијә сәјаһәт едән Јорг вә һәјат јолдашы Марина дејир: «Бу, бизим үчүн икигат һәдијјә иди. Һәм Аллаһын јаратдыгларыны сејр етмәк, һәм дә Онун һаггында башгаларына данышмаг имканымыз олду». 17 јашлы Лукас дејир: «Мән ләззәт алдым! Бу, садәҹә ҝөзәл бир сәјаһәт дејилди, мән инсанлара дәјәрли бир шеј верә билдим».