Алманијада он минләрлә Синти вә Рома халгларына * мәхсус инсан јашајыр. Бу јахынларда Јеһованын Шаһидләри онларын доғма дили олан гарачы дилиндә * Мүгәддәс Китаба әсасланан буклетләр, брошүрләр вә видеолар һазырладылар.

Синти вә Рома гарачыларынын әксәријјәти Шаһидләрин тәшкил етдији бу кампанијаны бөјүк мараг вә севинҹлә гаршыладылар. Бу кампанијада иштирак едән Андре вә Естер адлы бир ҹүтлүк бөлүшүр: «Хош хәбәри чатдырмаг үчүн хүсуси тәшәббүс ҝөстәрдијимизи ҝөрәндә онлар һејрәтә ҝәлирдиләр». Мүгәддәс Китабдакы хош хәбәри доғма дилләриндә ешитмәк вә охумаг чохларына дәрин тәсир бағышлајырды. Һәтта бир ҝәнҹ гадын гарачы дилиндә «Мүгәддәс Китабы өјрәнмәк нәјә ҝөрә ваҹибдир?» адлы видеоја бахаркән тәкрар-тәкрар: «Бу, мәним доғма дилимдир!» — дејәрәк һејрәтләнмишди.

Һамбурҝ шәһәриндәки кампанијада иштирак едән Матеас адлы Јеһованын Шаһиди дејир: «Арвадымла мән сәккиз нәфәрлик групла Синти вә Рома халгларына мәхсус тәхминән 400 гарачынын јашадығы әразијә баш чәкмишдик. Сөһбәт етдијимиз һәр кәс биздән әдәбијјат истәјирди». Кампанијада иштирак едән Бетина адлы Шаһид исә белә дејир: «Бәзиләри Јеһованын Шаһидләринин гарачы дилиндә һазырладығы нәшрләри ҝөрәндә ҝөз јашларыны сахлаја билмирди». Чохлары дәрһал верилән нәшрләри уҹадан охумаға башлајыр вә һәтта достлары үчүн дә әлавә нүсхәләр истәјирди.

Синти вә Рома гарачыларынын чоху ачыг мәрузәләрдән биринә етдијимиз дәвәти гәбул етмишдиләр. Һамбургдакы ибадәт евинә ҝәлән 94 нәфәрин әксәријјәти әввәлләр һеч вахт бурада олмамышды. Һејделберг јахынлығында јерләшән Рајлинҝендәки јығынҹаға ҝәләнләрин үмуми сајы исә 123 нәфәр иди. Даһа сонра онлардан беши Мүгәддәс Китаб дәрсинә башламаг истәдији билдирмишди.

Јеһованын Шаһидләри бу кампанијада тәхминән 3000 брошүр вә буклет пајлады. Синти вә Рома халгларына мәхсус 360-дан чох гарачыја тәблиғ едилди вә 19 нәфәрлә Мүгәддәс Китаб дәрсинә башланды. Онлардан бәзиләри нөвбәти сөзләри сөјләмишди: «Аллаһын бизим һагда дүшүндүјүнү билмәк адамы риггәтә ҝәтирир».