Јеһованын Шаһидләри Мүгәддәс Китабын арашдырмаларында чохлу тәрҹүмәләрдән истифадә едибләр. Лакин әҝәр һансыса дилдә «Мүгәддәс Јазыларын Јени Дүнја тәрҹүмәси» варса, биз она үстүнлүк веририк, чүнки орада Аллаһын ады истифадә олунур, о, дәгиг вә ајдындыр.

• Аллаһын адынын истифадә едилмәси. Бәзи Мүгәддәс Китаб наширләри онун Мүәллифинә лазыми иззәти вермирләр. Мәсәлән, бир тәрҹүмәдә онун әрсәјә ҝәлмәсинә аздан-чохдан төһфә верән 70-дән чох адамын ады садаланыр. Лакин орада онун Мүәллифинин ады олан Јеһова бирҹә дәфә дә олсун чәкилмир!

  Белә тәрҹүмәләрдән фәргли олараг, «Јени Дүнја тәрҹүмәси»ндә орижинал мәтнин олдуғу һәр јердә Аллаһын ады бәрпа едилир, онун үзәриндә чалышан тәрҹүмәчиләрин адлары исә аноним галыр.

• Дәгиглик. Тәрҹүмәчиләрин һамысы Мүгәддәс Китабын орижинал хәбәрини дәгиг чатдырмыр. Мәсәлән, бир тәрҹүмәдә Матта 7:13 ајәси белә верилиб: «Дар гапыдан ҝирин, чүнки ҹәһәннәмә апаран гапы ҝениш вә јол енлидир». Орижинал мәтндә исә бу ајәдә «ҹәһәннәм» сөзү јох, «мәһв» сөзү дурур. Ола билсин ки, тәрҹүмәчиләрин ҹәһәннәм сөзүнү әлавә етмәләри писләрин әбәдијјән ҹәһәннәмдә јанаҹагларына инанмаларындан ирәли ҝәлир. Лакин Мүгәддәс Китабда белә бир фикир јохдур. «Јени Дүнја тәрҹүмәси»ндә исә бу ајә дәгиг јазылыб: «Дар гапыдан ҝирин, чүнки мәһвә апаран јол енли вә ҝенишдир».

• Ајдынлыг. Јахшы тәрҹүмә о тәрҹүмәдир ки, дәгиг олмагла јанашы, ајдын вә асан башадүшүләндир. Бир нүмунәјә нәзәр салаг. Матта 5:3 ајәсиндә Иса Мәсиһ һәрфи мәнасы «руһән јохсул» олан бир ифадә ишләдир. Мүасир Азәрбајҹан дилиндә бу ифадәнин мәнасы о гәдәр дә ајдын олмадығы үчүн «Јени Дүнја тәрҹүмәси»ндә бу ајә башадүшүлән тәрздә верилиб. Орада дејилир: «Руһани немәтләрә сусајанлар [јахуд «руһани еһтијаҹларыны дәрк едәнләр», һашијә] нә хошбәхтдирләр».

Аллаһын адынын истифадә едилмәсиндән, дәгиг вә ајдын олмасындан әлавә, «Јени Дүнја тәрҹүмәси»нин даһа бир фәргләндириҹи ҹәһәти вар — о, пулсуз пајланыр. Бунун сајәсиндә милјонларла инсанлар, о ҹүмләдән Мүгәддәс Китабы алмаға имканы олмајанлар ону доғма дилләриндә охуја билирләр.