1—3. İsa təbliğ işini necə genişləndirdi və bununla bağlı hansı suallar ortaya çıxır?

 İSA peyğəmbər iki il ərzində Cəlilədə təbliğ etmişdi. (Mətta 9:35—38 ayələrini oxuyun.) O, şəhərləri və kəndləri bir-bir gəzərək sinaqoqlarda insanları öyrədir və Padşahlıq haqqında müjdəni bəyan edirdi. İsa harada təbliğ edirdisə, ətrafına izdiham yığılırdı. O görürdü ki, «məhsul bol»dur və daha çox işçiyə ehtiyac var.

² İsa təbliğ işini genişləndirməyin qayğısına qaldı. Bunun üçün o, 12 həvarisini «Allahın Padşahlığını təbliğ etməyə» göndərdi (Luka 9:1, 2). Ola bilsin, bu işin öhdəsindən necə gələcəklərinə dair həvarilərin çoxlu sualları vardı. İsa həvarilərini təbliğə göndərməmişdən əvvəl, səmavi Atasının onu öyrətdiyi kimi, o da məhəbbətdən irəli gələrək onlara təlim verdi.

³ Bununla əlaqədar ortaya bir neçə sual çıxır: İsa səmavi Atasından hansı təlimi almışdı? İsa həvarilərinə hansı təlimi vermişdi? Bəs bu gün Padşahlığın Padşahı təbliğ işini yerinə yetirmələri üçün öz davamçılarına təlim verirmi? Əgər verirsə, onda necə?

4. İsa səmavi Atasından nə zaman və harada təlim almışdı?

⁴ İsa Atası tərəfindən öyrədildiyini açıq-aydın şəkildə etiraf edirdi. Xidmət zamanı o demişdi: «Ata mənə nə öyrədibsə, mən də onu danışıram» (Yəh. 8:28). O, nə zaman və harada təlim almışdı? Şübhəsiz, Allahın ilkin Oğlunun təlimi o, yaradılandan dərhal sonra başlamışdı (Kol. 1:15). Atası ilə bərabər göydə olanda Oğul saysız-hesabsız illər ərzində Böyük Nəsihətçiyə qulaq asmış və Onu müşahidə etmişdi (Əşy. 30:20). Nəticədə, Oğul Atasının xüsusiyyətləri, işləri və məqsədləri barədə mükəmməl təlim almışdı.

5. Ata Öz Oğluna yer üzündə icra etməli olduğu xidmətlə bağlı hansı göstərişləri vermişdi?

⁵ Vaxtı çatanda Yehova Öz Oğluna yer üzündə icra etməli olduğu xidmətlə bağlı təlim keçdi. Gəlin Böyük Nəsihətçi və Onun ilk Oğlu arasındakı yaxın münasibəti təsvir edən peyğəmbərliyi nəzərdən keçirək. (Əşiya 50:4, 5 ayələrini  oxuyun.) Peyğəmbərlikdə deyilir ki, Yehova Oğlunu «hər səhər» oyadırdı. Bu sözlər insanın ağlında təlim vermək üçün hər səhər öz şagirdini oyadan müəllimi canlandırır. Müqəddəs Kitaba dair bir əsərdə deyilir: «Yehova... onu, sanki, şagird kimi, məktəbə aparır, nə barədə və necə təbliğ edəcəyini öyrədir». Bu səmavi «məktəb»də Yehova Oğluna insanlarla «nə haqda danışmağı, nə deməyi» öyrətmişdi (Yəh. 12:49). Ata Oğluna həmçinin başqalarına necə təlim verməyi də öyrətmişdi a. İsa aldığı təlimi yer üzündə təkcə öz xidmətini yaxşı yerinə yetirmək üçün istifadə etmirdi, həmçinin davamçılarını öyrədirdi ki, onlar da öz xidmətlərini yerinə yetirə bilsinlər.

6, 7. a) İsa şagirdlərinə nəyi öyrətmişdi və bu onları nəyə hazırlamışdı? b) İsa bizim günlərdə davamçılarının hansı təlimi keçmələrinin qayğısına qalır?

⁶ İsa həvarilərinə nə öyrədirdi? Məttanın yazdığı müjdənin 10-cu fəslinə əsasən, İsa xidmətlərini icra etmələri üçün şagirdlərinə növbəti konkret göstərişləri vermişdi: harada təbliğ etməli (5 və 6-cı ayələr), hansı xəbəri çatdırmalı (7-ci ayə), Yehovaya necə güvənməli (9 və 10-cu ayələr), ev sahibləri ilə söhbətə necə başlamalı (11—13–cü ayələr), etirazlara necə münasibət göstərməli (14 və 15-ci ayələr) və təqiblər zamanı necə davranmalı (16—23–cü ayələr) b. İsanın verdiyi bu aydın təlim sayəsində şagirdlər eramızın birinci əsrində xoş xəbərin təbliğ işinə rəhbərlik etmək üçün lazımi bilik və bacarıqla təmin olunmuşdular.

⁷ Bəs bizim günlər barədə nə demək olar? Allahın Padşahlığının Padşahı olan İsa öz şagirdlərinə ən vacib işi — «Padşahlıq haqqındakı müjdə xalqların hamısına şəhadət olsun deyə» bütün yer üzündə təbliğ etməyi tapşırmışdı (Mət. 24:14). Bəs Padşah bu vacib işi icra etmək üçün Allahın xalqına təlim keçibmi? Əlbəttə. Allahın dərgahında olan Padşahımız qayğı göstərib ki, davamçıları təbliğ etmək və yığıncaqda şərəfli məsuliyyətləri icra etmək üçün təlim keçsinlər.

8, 9. a) Teokratik Xidmət Məktəbinin əsas məqsədi nə idi? b) Həftəarası keçirilən görüşün sizə hansı faydası olub?

⁸ Yehovanın təşkilatı uzun illərdir ki, böyük toplantılar və yığıncaq görüşləri (məsələn, Xidməti görüş) vasitəsilə Allahın xalqını xidmətə hazırlayır. Ancaq 1940-cı illərdən etibarən mərkəzi idarədəki məsul qardaşlar müxtəlif məktəblər keçirmək üçün tədris proqramları hazırlamağa başladılar.

⁹ Teokratik Xidmət Məktəbi. Keçən fəsildən öyrəndiyimiz kimi, bu məktəb 1943-cü ildən keçirilməyə başlayıb. Bəs məktəbin məqsədi şagirdlərə yalnız yığıncaq görüşlərində məharətlə məruzələr söyləməyə kömək etmək idi? Əlbəttə ki, yox. Məktəbin əsas məqsədi hər zaman dəyişilməz olaraq qalıb. Onun məqsədi Allahın xalqına nitq ənamından istifadə edərək Yehovanı izzətləndirmək olub (Zəb. 150:6). Məktəbə  yazılan bacı-qardaşlar Padşahlığın daha məharətli təbliğçiləri olmağı öyrənirdilər. İndi biz bu təlimi həftəarası keçirilən görüş vasitəsilə alırıq.

10, 11. Hal-hazırda Gilad Məktəbində kimlər təlim alır və bu məktəbin əsas məqsədi nədir?

¹⁰ Gözətçi Qülləsinin Müqəddəs Kitab Məktəbi Gilad. Hal-hazırda Gözətçi Qülləsinin Müqəddəs Kitab Məktəbi Gilad adlanan bu məktəb 1943-cü il fevralın 1-dən keçirilməyə başlayıb. Bu məktəbin lap əvvəldən başlıca məqsədi öncüllərə və digər tammüddətli xidmətçilərə dünyanın müxtəlif yerlərində xüsusi təyinatlı müjdəçi kimi xidmət etmək üçün təlim vermək olub. Ancaq 2011-ci ilin oktyabrından etibarən Gilad Məktəbinə təlim almaq üçün yalnız xüsusi tammüddətli xidmət növündə olanları — xüsusi öncülləri, beytelliləri, səyyar nəzarətçiləri və həyat yoldaşlarını, eləcə də bu məktəbi keçməyən xüsusi təyinatlı müjdəçiləri dəvət edirlər.

¹¹ Bəs Gilad Məktəbinin məqsədi nədir? Uzun müddətdir ki, bu məktəbin təlimatçısı olan bir qardaş bu suala belə cavab verir: «Allahın Kəlamını hərtərəfli araşdırmağın sayəsində şagirdlərin imanını möhkəmləndirmək və onlara təyinatlarında üzləşəcəkləri çətinliklərin öhdəsindən müvəffəqiyyətlə gəlmək üçün lazımi ruhani xüsusiyyətlərə yiyələnməyə kömək etməkdir. Həmçinin bu məktəbin məqsədi şagirdlərə xoş xəbəri daha şövqlə vəz etmək istəyi aşılamaqdır» (Efes. 4:11).

12, 13. Gilad Məktəbi ümumdünya təbliğ işinin irəliləməsinə hansı töhfəni verib? Nümunə çəkin.

¹² Gilad Məktəbi ümumdünya təbliğ işinin irəliləməsinə hansı töhfəni verib? 1943-cü ildən bəri məktəbin 8500-dən çox məzunu olub c və bu məktəbdə təlim alan xüsusi təyinatlı müjdəçilər 170-dən çox ölkə və ərazidə xidmət edir. Bu xüsusi təyinatlı müjdəçilər səylə xidmət etməklə və başqalarına da bunu öyrətməklə aldıqları təlimi səmərəli şəkildə istifadə edirlər. Bir çox hallarda xüsusi təyinatlı müjdəçilər az təbliğçisi olan və ya heç təbliğçisi olmayan ərazilərdə təbliğ işinə rəhbərlik edirlər.

¹³ Gəlin görək İkinci Dünya müharibəsi zamanı Yaponiyada təşkil olunmuş təbliğ xidməti tamamilə dayandırılmaq üzrə olanda nələr baş vermişdi. 1949-cu ilin avqustunda orada heç on təbliğçi yox idi. Ancaq həmin ilin sonunda artıq Yaponiyada Gilad Məktəbinin 13 məzunu fəal şəkildə təbliğ edirdi. Sonradan bir çox xüsusi təyinatlı müjdəçilər də onlara qoşuldu. Əvvəlcə onlar diqqətlərini daha böyük şəhərlərə cəmləyirdilər, sonra isə başqa şəhərlərə üz tutdular. Xüsusi təyinatlı müjdəçilər öyrətdikləri insanları və digər məsihiləri can-dildən öncül xidmətində onlara qoşulmağa təşviq edirdilər. Onların bu cür səylə xidmət etmələri gözəl səmərələr verdi. Hal-hazırda Yaponiyada 216 000-dən çox təbliğçi var və onlardan 40 faizi öncül kimi xidmət edir! d

14. Teokratik məktəblər nəyin sübutudur? (Həmçinin 188—191 səhifələrdəki « Padşahlığın xidmətçiləri üçün məktəblər» adlı çərçivəyə baxın.)

 ¹⁴ Digər teokratik məktəblər. Öncül Məktəbi, Məsihi Ər-arvadlar üçün Müqəddəs Kitab Məktəbi və Subay Qardaşlar üçün Müqəddəs Kitab Məktəbi orada təlim alanların ruhən inkişafında və başqalarına nümunə qoyaraq xidmətdə canla-başla iştirak etməsində əvəzsiz rol oynayıb e. Bütün bu teokratik məktəblər Padşahın öz davamçılarını xidmətlərini yerinə yetirmələri üçün tam yaraqlandırmasına güclü sübutdur (2 Tim. 4:5).

15. Allahın xalqı arasında məsul mövqe tutan kişilər İsanı nədə təqlid etmək istəyirlər?

¹⁵ Əşiyanın peyğəmbərliyində deyilirdi ki, İsa Allahdan təlim alırdı. Bu səmavi «məktəbdə» Oğul «yerində deyilmiş sözlə yorğunlara» necə cavab verməyi öyrənirdi (Əşy. 50:4). İsa yer üzündə olanda öyrəndiklərinə əsasən davranaraq zəhmətkeşlərə və yükü ağır olanlara təravət verirdi (Mət. 11:28—30). Allahın xalqı arasında məsul mövqe tutan kişilər İsanı təqlid edərək bacı-qardaşları üçün təravət mənbəyi  olmaq istəyirlər. Buna görə də məsul qardaşlara həmimanlılarına daha səmərəli şəkildə xidmət etməyə kömək edən müxtəlif məktəblər təsis olunub.

16, 17. Padşahlıq Xidməti Məktəbinin məqsədi nədir? (Həmçinin haşiyəyə baxın.)

¹⁶ Məsul Qardaşlar üçün Məktəb. Bu məktəbin ilk sinfi 1959-cu il martın 9-da Saut-Lansinqdə (Nyu-York) keçirilib. Bu biraylıq kursu keçmək üçün səyyar nəzarətçilər və yığıncaq xidmətçiləri dəvət olunurdu. Sonralar bu Məktəbin proqramı ingilis dilindən başqa dillərə tərcümə olundu və tədricən bütün dünyada keçirilməyə başlandı f.

¹⁷ Məsul Qardaşlar üçün Məktəbin məqsədi ilə bağlı 1962-ci il üçün «Yehovanın Şahidlərinin illik fəaliyyəti»ndə deyilmişdi: «Çoxlu işləmək lazım gələn bugünkü dünyada Yehovanın Şahidlərinin yığıncaq nəzarətçisi öz həyatını elə qurmağı bacarmalıdır ki, bütün yığıncağa lazımi qayğı göstərə bilsin və onlar üçün xeyir-dua olsun. Eyni zamanda da o, yığıncağın rifahı naminə ailə məsuliyyətlərinə başdansovdu yanaşmamalı, sağlamdüşüncəli olmalıdır. Bütün dünyadan olan yığıncaq xidmətçilərinin Məsul Qardaşlar üçün  Məktəbdən toplaşaraq nəzarətçi məsuliyyətini yerinə yetirməyə kömək edən təlim almaları, həqiqətən də, gözəl fürsətdir!» (1 Tim. 3:1—7; Tit. 1:5—9).

18. Nəyə görə demək olar ki, Məsul Qardaşlar üçün Məktəb Allahın bütün xalqına fayda gətirir?

¹⁸ Məsul Qardaşlar üçün Məktəb Allahın bütün xalqına fayda gətirir. Nəyə əsasən belə demək olar? Ağsaqqallar və yığıncaq xidmətçiləri məktəbdə öyrəndiklərini tətbiq edəndə, İsa kimi, onlar da həmimanlıları üçün təravət mənbəyi olurlar. Məgər ağsaqqalın və ya yığıncaq xidmətçisinin xoş söz deməsi, qulaq asması və ya başçəkməsi sizi ruhlandırmır? (1 Salon. 5:11). Yehovadan təlim almış bu cür qardaşlar yığıncaq üçün əsil xeyir-duadır!

19. Təlim komitəsinin nəzarətində daha hansı məktəblər var və bu məktəblərin məqsədi nədir?

¹⁹ Digər teokratik məktəblər. Rəhbərlik Şurasının Təlim komitəsi təşkilatdakı məsul qardaşların təlim aldığı digər məktəblərə də nəzarət edir. Bu məktəblər yığıncaq ağsaqqalları, səyyar nəzarətçilər və filialın komitə üzvləri kimi məsul qardaşlara üzərlərinə düşən çox saylı məsuliyyətləri daha səriştəli şəkildə yerinə yetirməyə kömək etmək üçün yaradılıb. Müqəddəs Kitaba əsaslanan bu təlim zamanı qardaşları ruhaniliklərini qorumağa və Yehovanın onlara etibar etdiyi dəyərli sürü ilə Müqəddəs Kitab prinsiplərinə əsasən davranmağa təşviq edirlər (1 But. 5:1—3).

20. Nəyə görə İsa demişdi ki, bizim hamımız Yehovadan elm almışıq və siz nə etməyə qətiyyətlisiniz?

²⁰ Heç bir şübhə yoxdur ki, Allahın Padşahlığının Padşahı davamçılarının yaxşı təlim almalarının qayğısına qalır. Bütün bu təlimlər Yehovadandır: O, Öz oğlunu, Oğul isə davamçılarını öyrədir. Buna görə də İsa demişdi ki, bizim hamımız Yehovadan elm almışıq (Yəh. 6:45; Əşy. 54:13). Gəlin Padşahın bizə təqdim etdiyi təlimlərdən tam fayda əldə etməyə qətiyyətli olaq. Gəlin həmişə yadda saxlayaq ki, aldığımız bu təlimlərin əsas məqsədi xidmətimizi tam şəkildə yerinə yetirmək üçün ruhən möhkəm qalmağımıza kömək etməkdir.