İkinci Padşahlar 20:1—21
20 O vaxt Hizqiyyə xəstələnib ölüm yatağına düşdü.+ Amuz oğlu Əşiya peyğəmbər onun yanına gəlib dedi: «Yehova belə deyir: “Ev əhlinə vəsiyyətini elə, çünki sağalmayacaqsan, öləcəksən”».+
2 O, üzünü divara çevirib Yehovaya dua etdi:
3 «Yehova, yalvarıram, nə olar yadına sal, mən necə önündə sidqi-ürəklə, sədaqətlə yerimişəm, Sənə məqbul işlər görmüşəm».+ Hizqiyyə acı-acı ağladı.
4 Əşiya sarayın orta həyətinə çatmamış Yehovanın sözü ona nazil oldu:+
5 «Qayıt, xalqımın hökmdarı Hizqiyyəyə de ki, əcdadın Davudun Allahı Yehova belə deyir: “Duanı eşitdim. Göz yaşlarını gördüm.+ Sənə şəfa verəcəyəm.+ Üçüncü gün Yehovanın məbədinə gedəcəksən.+
6 Ömrünü on beş il artıracağam. Səni də, bu şəhəri də Aşşur padşahının əlindən qurtaracağam.+ Öz adım naminə və qulum Davudun xatirinə bu şəhəri qoruyacağam”».+
7 Əşiya dedi: «Əncir lavaşanası gətirin». Lavaşananı gətirib çibanın üstünə qoydular. Hizqiyyə yavaş-yavaş sağaldı.+
8 Hizqiyyə Əşiyadan soruşmuşdu: «Yehovanın məni sağaldacağına, üçüncü gün Yehovanın məbədinə gedəcəyimə əlamət+ nə olacaq?»
9 Əşiya demişdi: «Yehova dediyi sözü yerinə yetirəcək. Yehova sənə bu əlaməti verir: necə istəyirsən, kölgə pilləkənin* üstü ilə on pillə qabağa getsin, yoxsa on pillə dala?»+
10 Hizqiyyə dedi: «Kölgənin on pillə qabağa gəlməsi on pillə dala getməsindən asandır».
11 Əşiya peyğəmbər Yehovaya dua etdi. Allah Əhəz pilləkəninin pillələrinə düşmüş kölgəni on pillə dala apardı.+
12 Babil padşahı Baladan oğlu Bərdax-Baladan Hizqiyyənin xəstələndiyini eşidib ona məktublar və hədiyyələr göndərdi.+
13 Hizqiyyə elçilərə xoşgəldin elədi, bütün xəzinəsini+ — qızıl-gümüşü, balzamı, başqa bahalı yağları, cəbbəxanasını və xəzinəsində olan hər şeyi onlara göstərdi. Evində və bütün səltənətində elə şey qalmadı ki, onlara göstərməsin.
14 Əşiya peyğəmbər Hizqiyyə padşahın yanına gəlib soruşdu: «Bu adamlar haradan gəlmişdilər? Nə dedilər?» Hizqiyyə dedi: «Uzaq diyardan, Babildən gəlmişdilər».+
15 Əşiya soruşdu: «Sarayında nələri gördülər?» Hizqiyyə dedi: «Hər şeyi. Xəzinəmdə onlara göstərmədiyim şey qalmadı».
16 Əşiya dedi: «Yehovanın sözünü dinlə.+
17 “Elə gün gələcək ki, sarayındakı hər şeyi, ata-babalarının bu günə qədər yığdığı nə varsa, hamısını Babilə aparacaqlar.+ Heç nə qalmayacaq, — deyir Yehova. —
18 Səndən törəyəcək oğullarının da bəzilərini aparacaqlar.+ Onlar Babil padşahının sarayında saray məmuru olacaqlar”».+
19 Hizqiyyə Əşiyaya dedi: «Yehovanın dediyi bu söz haqdır».+ Sonra əlavə etdi: «Təki mənim dövrümdə sülh, əmin-amanlıq olsun».+
20 Hizqiyyənin qalan işləri, bütün qüdrətli işləri, çarhovuz+, su kəməri tikib şəhərə su çəkməsi+ Yəhuda padşahlarının tarixi kitabında yazılmışdır.
21 Hizqiyyə ata-babalarına qovuşdu.+ Oğlu Mənəssə+ onun yerinə taxta çıxdı.+
Haşiyələr
^ Ehtimal ki, bu pilləkəndən günəş saatı kimi istifadə olunurdu.
