İkinci Salnamələr 25:1—28
25 Amisay iyirmi beş yaşında taxta çıxdı və iyirmi doqquz il Yerusəlimdə hakimiyyət sürdü. Onun anası yerusəlimli Yəhuəddən idi.+
2 Amisay Yehovanın bəyəndiyi işləri görürdü, amma bunu sidqi-ürəkdən etmirdi.
3 Hakimiyyət əlində möhkəmlənən kimi Amisay atası padşahı qətlə yetirən əyanları öldürdü.+
4 Amma qatillərin oğullarını öldürmədi. Tövratda*, Musanın kitabında yazılanlara uyğun davrandı. Orada Yehova buyurmuşdu: «Ata övladına görə, övlad da atasına görə ölməməlidir. Hər kəs öz günahına görə ölməlidir».+
5 Amisay yəhudalıları bir yerə topladı. O, yəhudalıları, binyaminliləri minbaşıların və yüzbaşıların başçılığı altında nəsillərinə görə düzdü.+ İyirmi və bundan yuxarı yaşda olanları siyahıya aldı.+ Döyüşə qabil, nizə və qalxan daşıyan, təlim almış döyüşçülərin sayı 300 000 nəfər oldu.
6 Sonra o, 100 talant* gümüş verib İsraildən 100 000 nəfər igid döyüşçü tutdu.
7 Bir Allah adamı onun yanına gəlib dedi: «Ey padşah, qoy İsrail ordusu səninlə getməsin.+ Yehova İsraili, əfraimliləri tərk edib.
8 Özün tək get. Cəsur ol, döyüşə atıl. Yoxsa Allah səni düşmənlərinə təslim edər. Allah sənə kömək də edə bilər,+ düşmənə təslim də edə bilər».
9 Onda Amisay Allah adamına dedi: «Bəs İsrail döyüşçülərinə verdiyim 100 talant necə olsun?» Allah adamı dedi: «Yehova sənə ondan da artığını verə bilər».+
10 Amisay Əfraimdən onun yanına gəlmiş qoşunu geriyə, öz məmləkətinə göndərdi. Onlar Yəhudaya bərk hirsləndilər, qızğın qəzəblə öz məmləkətlərinə qayıtdılar.
11 Amisay cəsarətini toplayıb qoşunlarını Duz vadisinə+ apardı. O, 10 000 sairlini+ qırdı.
12 Yəhudalılar 10 000 nəfəri diri-diri ələ keçirdilər. Onları uçurumun kənarına gətirib aşağı atdılar. Hamısı tikə-parça oldu.
13 Bu arada Amisayın döyüşə aparmayıb geri göndərdiyi qoşun+ Səməriyyədən+ Beyt-Huruna+ qədər bütün Yəhuda şəhərlərinə basqın etdi. Onlar 3000 nəfəri öldürdülər və çoxlu qənimət ələ keçirdilər.
14 Amisay ədumiləri qırıb qayıdanda sairlilərin allahlarını gətirib öz allahı etdi.+ Qarşılarında baş əyib onlara qurban tüstüsü təqdim etdi.
15 Yehova Amisaya bərk qəzəbləndi. Onun yanına peyğəmbər göndərdi. Peyğəmbər ona dedi: «Öz xalqını sənin əlindən qurtara bilməyən allahlara niyə baş əydin?»+
16 Padşah onun sözünü ağzında qoyub dedi: «Məgər səni padşahın məsləhətçisi qoyublar?+ Ölmək istəmirsənsə, kəs səsini!»+ Peyğəmbər cavabında: «Bircə bunu bilirəm ki, bu əməlinə görə, mənə qulaq asmadığına görə Allah səni məhv etməyi qət edib»+, — dedi və susdu.
17 Yəhuda padşahı Amisay məsləhətçiləri ilə məşvərət edəndən sonra İsrail padşahı Yəhu oğlu Yəhəzin oğlu Yuəsə ismarıc göndərdi: «Çıx meydana, döyüşək!»+
18 İsrail padşahı Yuəs Yəhuda padşahı Amisaya cavab verdi: «Livanda qanqal sidr ağacına xəbər göndərdi: “Qızını oğluma ver”. Amma bir çöl heyvanı qanqalı tapdalayıb keçdi.
19 Sən deyirsən: “Mən Ədumu darmadağın etmişəm”.+ Ona görə də ürəyin qürurlanıb. Get otur evində. Sənə lazımdır ki, başına bəla açıb Yəhudanı da özünlə bərabər uçuruma sürükləyəsən?»
20 Amma Amisay qulaq asmadı.+ Bu iş Allahdan idi ki, onları düşmən əlinə təslim etsin,+ çünki onlar Ədum allahlarına səcdə edirdilər.+
21 Beləliklə, İsrail padşahı Yuəs gəldi və Yəhuda padşahı Amisayla Yəhudanın Beyt-Şəms+ şəhərində qarşılaşdı.
22 Yəhudalılar İsrailə məğlub oldular. Hər kəs öz evinə qaçdı.
23 İsrail padşahı Yuəs Beyt-Şəmsdə Yəhuda padşahı Yəhəz* oğlu Yuəsin oğlu Amisayı əsir götürüb Yerusəlimə gəldi. Yuəs Əfraim darvazasından+ Künc darvazaya+ qədər Yerusəlim divarının 400 qulacını* uçurtdu.
24 O, Allahın məbədində Abid-Ədumun ixtiyarında olan və sarayın xəzinəsində olan bütün qızıl-gümüşü və əşyaları götürüb+ əsirlərlə birlikdə Səməriyyəyə apardı.
25 Yəhuda padşahı Yuəs+ oğlu Amisay+ İsrail padşahı Yəhəz oğlu Yuəsin ölümündən sonra on beş il yaşadı.+
26 Amisayın qalan işləri, ilk işlərindən son işlərinə qədər hamısı Yəhuda və İsrail padşahlarının kitabında yazılıb.
27 Amisay Yehovanın yolundan dönəndən sonra Yerusəlimdə ona qarşı sui-qəsd qurdular.+ O, Lahişə qaçdı. Amma dalınca adamlar göndərib onu orada öldürdülər.
28 Cəsədini atların üstündə gətirib Yəhuda şəhərində ata-babalarının yanında dəfn etdilər.
Haşiyələr
^ Talant 34,2 kq-a bərabərdir. B14 əlavəsinə bax.
^ Digər adı Əhəzya.
^ Təx. 178 m. B14 əlavəsinə bax.