Yaradılış 33:1—20
33 Yaqub bir də baxıb gördü ki, Eys gəlir, yanında da dörd yüz nəfər adam.+ Onda o, Ləyanın, Rəhilənin və iki kənizin uşaqlarını ayırdı.+
2 Kənizləri uşaqları ilə birlikdə qabağa,+ Ləya ilə uşaqlarını onlardan sonra,+ ən axırda isə Rəhilə+ ilə Yusifi qoydu.
3 Özü isə qabağa keçdi və qardaşına yaxınlaşanadək yeddi dəfə təzim etdi.
4 Eys isə onun qabağına qaçdı, boynuna sarılıb öpdü. İkisi də zülüm-zülüm ağladı.
5 Eys başını qaldırıb qadınları və uşaqları görəndə soruşdu: «Bunlar kimdir?» Yaqub dedi: «Allahın sənin quluna bəxş etdiyi övladlardır».+
6 Onda kənizlər uşaqları ilə irəli çıxıb təzim etdilər.
7 Ləya da uşaqları ilə qabağa çıxıb təzim etdi. Ən axırda Yusiflə Rəhilə yaxınlaşıb təzim etdilər.+
8 Eys soruşdu: «Qabağıma çıxan o adamlar, sürülər nə idi belə?»+ Yaqub: «Sənin iltifatını qazanmaq istəyirdim, ağam»,+ — deyə cavab verdi.
9 Onda Eys dedi: «Mənim bəs deyincə malım-mülküm var, qardaş.+ Qoy sənin malın özünə qalsın».
10 Yaqub isə xahiş etdi: «İltifat eylə, ağa, hədiyyələri qəbul et. Sən ki məni mehribanlıqla qarşıladın, sənin üzünü görəndə, elə bil, Allahın üzünü görmüş oldum.+
11 Bu hədiyyələrsə sənə bəslədiyim xoş arzuların izharıdır.+ Nə olar, onları götür, çünki Allahın lütfü sayəsində hər şeyim var».+ Yaqub o qədər təkid etdi ki, axırda Eys hədiyyələri götürdü.
12 Sonra Eys dedi: «Gəl yola düşək. Mən sizin qabağınızca gedərəm».
13 Yaqub isə dedi: «Ağam, görürsən uşaqlar balacadır.+ Üstəlik, mal-qaranın içərisində yanıbalalıları var. Sürüləri bir gün bərk qovsalar, hamısı qırılar.
14 Qoy ağam getsin, biz isə yavaş-yavaş sürünün, uşaqların ayağı ilə yeriyib Sairə, ağamın yanına gələrik».+
15 Eys dedi: «Onda qoy adamlarımdan bir neçəsi sənin yanında qalsın». Yaqub isə cavab verdi: «Buna nə gərək var? Sən ki mənə iltifat göstərdin, bu, mənim bəsimdir».
16 Beləliklə, Eys həmin gün Sairə qayıtdı.
17 Yaqub Suqquta+ getdi. Orada özünə ev, sürüləri üçün çardaqlar tikdi. Buna görə də o yerin adını Suqqut* qoydu.
18 Fəddan-Aramdan+ çıxdıqdan sonra Yaqub sağ-salamat Kənan+ diyarındakı Siham+ şəhərinə gəlib çıxdı. Orada şəhərin yaxınlığında çadırlarını qurdu.
19 O, Sihamın atası Hamurun oğullarına yüz qesitah* verib çadırlarını qurduğu torpağın bir hissəsini aldı.+
20 Sonra orada bir qurbangah düzəldib ona İl-İlah-İsrail* adını verdi.+
Haşiyələr
^ Mənası: çardaqlar.
^ Dəyəri məlum olmayan pul vahidi.
^ Mənası: Allah — İsrailin Allahı.
