Amus 7:1—17
7 Külli-İxtiyar Yehova mənə bunu göstərdi: padşahın ot payı biçilib qurtarmışdı. Qış əkinlərinin boy atdığı vaxt idi. Allah bir sürü çəyirtkə göndərdi.
2 Çəyirtkələr ölkədə bütün yaşıllığı yeyib qurtardı. Onda mən dedim: “Ey Külli-İxtiyar Yehova, yalvarıram, bağışla.+ Yaqub necə sağ qalsın? Axı o zəifdir!”+
3 Yehova fikrindən daşındı.+ Yehova dedi: “Bu olmayacaq”.
4 Külli-İxtiyar Yehova mənə bunu göstərdi: Külli-İxtiyar Yehova xalqı ilə çəkişməyə girdi, bu çəkişmə odla həll olunacaq. Alov ümmanı və torpağın bir parçasını uddu.
5 Mən dedim: “Ey Külli-İxtiyar Yehova, yalvarıram, əl saxla.+ Yaqub necə sağ qalsın? Axı o zəifdir!”+
6 Yehova fikrindən daşındı.+ Külli-İxtiyar Yehova dedi: “Bu da olmayacaq”.
7 O, mənə bunu göstərdi: Yehova şaqulla tikilmiş divarın üstündə durmuşdu, əlində də şaqul var idi.
8 Yehova məndən soruşdu: “Amus, nə görürsən?” Dedim: “Şaqul”. Onda Yehova dedi: “Mən xalqım İsraili şaqulla yoxlayacağam. Daha onları bağışlamayacağam.+
9 İshaqın səcdəgahları*+ dağılacaq, İsrailin müqəddəs yerləri viran qalacaq.+ Mən Ərubam evinin üstünə qılıncla gələcəyəm”.+
10 Beytel+ kahini Amisay İsrail padşahı Ərubama+ xəbər göndərib dedi: “Amus İsraildə+ sənə qarşı qəsd hazırlayıb. Ölkə onun sözləri ilə razılaşa bilmir.+
11 Çünki Amus deyir: “Ərubam qılıncdan öləcək, İsrail öz torpağından sürgün ediləcək”.+
12 Amisay Amusa dedi: “Ey görücü, buradan get, Yəhuda torpağına qaç, get çörəyini orada qazan, peyğəmbərliyini də orada elə.+
13 İndən belə Beyteldə peyğəmbərlik etmə.+ Çünki bura padşahın ibadətgahıdır,+ səltənətin evidir”.
14 Onda Amus Amisaya dedi: “Mən nə peyğəmbər idim, nə də peyğəmbər övladı. Mən çobanlıq edirdim+ və əncir çərtirdim.
15 Yehova məni qoyun otarmaqdan ayırdı. Yehova mənə dedi: “Get, xalqım İsrailə peyğəmbər ol”.+
16 İndi Yehovanın sözünü dinlə: “Sən deyirsən, İsrailə qarşı peyğəmbərlik etmə,+ İshaq evinə qarşı dilindən bir kəlmə də çıxmasın”.+
17 Buna görə Yehova bəyan edir: “Sənin arvadın şəhərdə fahişəlik edəcək, oğulların, qızların qılıncdan keçiriləcək. Torpağın ölçü ipi ilə bölüşdürüləcək, sən qərib ölkədə öləcəksən, İsrail xalqı isə vətənindən sürgün ediləcək”.+
Haşiyələr
^ Hərfən: yüksəklikləri.