Müqəddəs Kitabda peyğəmbərlik edilib ki, yaşadığımız dövrün yekununda «millət millətə qarşı… qalxacaq» və fəlakətlər baş verəcək (Mətta 24:3, 7). Biz bu peyğəmbərlik sözlərinin 2023-cü xidmət ili a ərzində necə yerinə yetdiyini gördük. 100-ə yaxın ərazidə müharibələr və təbii fəlakətlər baş verib, amma bütün bu vaxt ərzində Yehovanın Şahidləri Yehovadan örnək götürərək əməldə məhəbbət təzahür etdiriblər. Necə?

 2023-cü xidmət ili ərzində bacı-qardaşlarımız 200-dən çox fəlakətlə üzləşib. Bunlardan bəziləri təbii fəlakət, bəziləri isə insanların törətdiyi fəlakətlər olub. Ümumilikdə yardım işləri üçün Yehovanın Şahidlərinin ümumdünya işinə etdiyi ianələrdən on milyon dollardan b çox pul xərclənib. Bundan başqa, bir çox bacı-qardaş öz maddi vəsaitlərini sərf edərək yerli ərazidəki köməyə ehtiyacı olan dindaşlarına dəstək olub. Etdiyiniz ianələr bacı-qardaşlarımızın üzləşdiyi çoxsaylı fəlakətlər zamanı onlara yardım etmək üçün sərf olunub. Görün baş verən fəlakətlərdən ikisində ianələriniz dindaşlarımıza necə kömək edib.

 Nigeriyanın bəzi ərazilərində müntəzəm olaraq mövsümi sel daşqınları baş verir. Bununla belə, 2022-ci ilin oktyabr ayında daşqınların səviyyəsi son on ildə görünməmiş həddə çatmışdı. 676 000 hektardan çox əkin sahəsi zərər görmüş, iki milyondan çox insan evlərini tərk etməli olmuşdu. Yardım işlərini təşkil etmək və bacı-qardaşlara ruhani cəhətdən dəstək olmaq üçün Nigeriya filialı dərhal Zərərçəkənlərə yardım komitələri təşkil etdi.

•   7505 təbliğçi evini tərk etməli olub

•   860 evə ziyan dəyib və ya dağılıb

•   90 ibadət evini və bir toplantı zalını su basıb

 Yardım işləri zamanı aşağıdakı ehtiyacların təmin edilməsi üçün 250 000 dollardan çox pul xərclənib:

•   Düyü, lobya və ərişdə kimi qida məhsulları

•   Döşəklər və ağcaqanaddan qorunmaq üçün torlar

•   Dağılmış evlərin təmiri və ya bərpası

 Qardaşlarımız ianələrdən ağılla istifadə etmək üçün nə edirlər? Bunun bir yolu hər bir tikilinin təmirə yararlı olub-olmadığını müəyyənləşdirməkdir. Əgər yenidən tikməyə ehtiyac varsa, onu yerli əraziyə uyğun olaraq sadə dizaynda inşa edirlər.

 Bacı-qardaşlar onlara göstərilən yardıma görə minnətdarlıqlarını bildirirlər. Bir bacımız deyir: «Daşqın həyatımızı alt-üst etdi. Əkin-biçin sahələrimizi sel basdı, evsiz qaldıq. Bacı-qardaşlar elə həmin gün gəlib bizə yardım etdilər və bizi qalmaq üçün təhlükəsiz yerə yerləşdirdilər. Filialdan ərzaq yardımı gələndə rahatlıq tapdıq. Yəhya 13:34, 35 ayələrinin üzərimizdə yerinə yetdiyinin şahidi olanda nitqimiz qurudu… Əsl məhəbbət həqiqətən mövcuddur. Mən və ailəm tam vaxtında köməyimizə çatan bacı-qardaşlarımıza dərin minnətdarlığımızı bildiririk».

 Yardım işlərimiz başqalarının da diqqətindən yayınmır. Bayelsa ştatının Sabaqriya icma başçısı belə demişdi: «Dünyada çox təşkilatlar, kilsələr var. Amma bu cür yardım işlərini yalnız Yehovanın Şahidləri edir… Təşkilatınızın dünyada tayı-bərabəri yoxdur».

 2023-cü ilin fevral ayı ərzində Çilidə baş verən 400-dən çox yanğın böyük ziyana səbəb olub. Çilinin əsas əraziləri də daxil olmaqla, 430 000 hektardan çox ərazi yanğın nəticəsində məhv olub. Haradasa 8000 insan təxliyə edilib. Fəlakətdən sonra filial tez bir zamanda yardım işlərinin təşkilinə başladı.

•   222 təbliğçi təxliyə edilib

•   20 ev dağılıb

 Yardım işləri zamanı aşağıdakı ehtiyacların təmin edilməsi üçün 200 000 dollardan çox pul xərclənib:

•   Ərzaq və su

•   Yanacaq, təmizlik ləvazimatları və tibbi vasitələr

•   Dağılmış evlərin yenidən tikilməsi

 Bir ailə, ev və iş yeri daxil olmaqla, hər şeyini itirdiyi üçün çox sarsılmışdı. Onların bircə gəlir yeri belə qalmamışdı. İlk bir neçə gün evlərinin olduğu yerin artıq bomboş olduğunu görəndə çox məyus olurdular. Amma görəndə ki, evləri yenidən tikilir, sakitləşməyə başladılar. Könüllülərin göstərdiyi məhəbbət və şəfqət onlara güc verirdi. Beləcə, bu ailə könüllülərlə çiyin-çiyinə verib digər dindaşlarının evlərinin tikintisinə kömək etməyə başladı.

 Aparılan yardım işləri əksər dindaşlarımıza güclü təsir bağışlayıb. Bir qardaş demişdi: «Yehovanın təşkil etdiyi Zərərçəkənlərə yardım komitələri həqiqətən də misilsiz tədbirdir. Fəlakətin səhəri günü onlar artıq hadisə yerində idilər və bütün təməl ehtiyaclarımızı qarşıladılar. Müxtəlif yerlərdə göstərilən yardım işləri haqda oxumaq başqa şeydir, bu yardımı şəxsən almaq isə tamam başqa bir şey. Bacı-qardaşların Yehovanın xüsusiyyətlərini necə əks etdirdiyini və maddi, ruhani, emosional tələbatlarımızı necə qarşıladıqlarını görəndə təşkilat bizim üçün daha da dəyərli olur. Biz Yehovanın məhəbbətini şəxsən dadırıq».

 Nə qədər ki bu dünyada yaşayırıq, təbii fəlakətlərin get-gedə artdığının şahidi olacağıq (Luka 21:10, 11). Buna baxmayaraq, məhəbbətli Padşahımız İsa Məsih yığıncaqlar vasitəsilə «bu dövrün yekununa kimi həmişə» bizimlə olacaq (Mətta 28:20). donate.pr418.com saytı vasitəsilə, həmçinin digər yollarla ümumdünya işinə etdiyiniz ianələr, eləcə də Yehovanın yolunda sərf etdiyiniz vaxt və güc Padşahlığı və onun məhəbbətli Padşahını dəstəklədiyinizi göstərir. Səxavətinizə görə minnətdarlığımızı bildiririk.