«Qorxma, Mən səninləyəm. Təlaşa düşmə, sənin Allahın Mənəm. Sənə qüvvət verəcəyəm, sənə kömək edəcəyəm, haqq olan sağ əlimlə səni bərk-bərk tutacağam» (Əşiya 41:10, «Yeni Dünya Tərcüməsi»).

 «Qorxma, çünki Mən səninləyəm, dəhşətə gəlmə, çünki Allahın Mənəm. Səni qüvvətləndirəcəyəm, sənə kömək edəcəyəm. Sadiq sağ əlimlə sənə dayaq olacağam» (Əşiya 41:10, Müqəddəs Kitab şirkəti, 2009).

 Yehova a Allah sadiq xidmətçilərini əmin edir ki, hansı problemlə üzləşirlər üzləşsinlər, onlara dayaq olacaq.

 «Mən səninləyəm». Yehova xidmətçilərinə qorxmamaları üçün əsaslı səbəb verir — onlar tək deyillər. Yehova onların nələrdən keçdiyini görür, dualarını eşidir, sanki O, fiziki olaraq onların yanındadır (Zəbur 34:15; 1 Butrus 3:12).

 «Sənin Allahın Mənəm». Yehova xidmətçilərinin ürəyinə su səpərək sanki deyir: «Nə baş verir versin, Mən sənin Allahın olaraq qalacağam və çox sevinirəm ki, sən Mənə xidmət edirsən». Onlar əmin ola bilərlər ki, heç nə Allahın onlara kömək olmasının qarşısını ala bilməz (Zəbur 118:6; Romalılara 8:32; İbranilərə 13:6).

 «Sənə qüvvət verəcəyəm, sənə kömək edəcəyəm, Haqq olan sağ əlimlə səni bərk-bərk tutacağam». Bir fikri vurğulamaq üçün üç ifadədən istifadə etməklə Yehova xidmətçilərini əmin edir ki, onlara mütləq kömək edəcək. Yehova necə kömək edəcəyini çox maraqlı şəkildə təsvir edir: Kimsə yıxılsa, O, sağ əlini uzadıb onu qaldıracaq (Əşiya 41:13).

 Allahın xidmətçilərinə kömək etməyinin əsas üsullarından biri Müqəddəs Kitabdır (Yuşə 1:8; İbranilərə 4:12). Məsələn, Allah Müqəddəs Kitab vasitəsilə sınaqlarla üzləşən, kasıblıqla, xəstəliklə mübarizə aparan, əziz adamını itirən və başqa çətinliklərlə üzləşən xidmətçilərinə hikmətli məsləhətlər verir (Məsəllər 2:6, 7). Həmçinin Allah Öz müqəddəs ruhunu, yəni fəal qüvvəsini xidmətçilərinə verir ki, onlar sağlam düşünsünlər, sınaqların altında əzilməsinlər (Əşiya 40:29; Luka 11:13).

 Bu sözlər sonradan Babilə sürgün edilmiş yəhudilərə təsəlli verdi. Yehova əvvəlcədən demişdi ki, sürgünün sonuna yaxın onlar babilliləri qorxuya salan və ətrafdakı xalqları darmadağın edən bir padşah haqda eşidəcəklər (Əşiya 41:2—4; 44:1—4). Bu xəbərdən babillilər və ətraf xalqlar tir-tir əsəcəkdilər, amma yəhudilərin qorxması üçün heç bir səbəb yox idi, çünki Yehova onları qoruyacaqdı. Onları buna əmin etmək üçün Allah üç dəfə «qorxma» deyir (Əşiya 41:5, 6, 10, 13, 14).

 Əşiya 41:10 ayəsindəki sözlər Babildə sürgündə olan yəhudilər üçün deyilsə də, Yehova bütün xidmətçilərinə təsəlli vermək üçün bu ayənin bizim günlərə qədər gəlib çatmasının qayğısına qalıb (Əşiya 40:8; Romalılara 15:4). Keçmişdəki kimi bu gün də Yehova xidmətçilərinə dayaq olur.