2023-cü ilin yanvar—aprel aylarında Argentina filialı Argentina və Uruqvayın ucqar ərazilərində xüsusi təbliğ kampaniyası təşkil etdi. Kampaniyada 9500-dən çox təbliğçi iştirak etdi. Onlar təqribən 700 qrupa bölünmüşdü. Kampaniyada iştirak edənlər həmin ucqar ərazilərdəki 146 yığıncaqda xidmət edən təbliğçilərə kömək etdilər.

Argentina və Uruqvayın kiçik şəhərlərində, yerli icmalarda və kəndlərində bir milyondan çox insan yaşayır. Ötən üç il ərzində təbliğçilərə həmin ərazilərdə yaşayan insanların yanına getmək çətin idi. Amma kampaniya sayəsində bu ucqar ərazilərdə yenidən təbliğ etmələri onları çox sevindirdi.

Adrian Donadio qardaş və həyat yoldaşı Karina Argentinanın Tartaqal şəhərinə təyin olunmuşdular. Oraya çatmaq üçün onlar 1600 kilometr yol getdilər. Adrian deyir: «Oradakı insanların Allah haqqında eşitməyə nə qədər ehtiyacı olduğunu görəndə sevindik ki, xoş xəbəri onlarla bölüşə bilərik».

Argentinanın Barrankas şəhərində iki təbliğçi 90 yaşlarında olan bir ər-arvadla pandemiyadan əvvəl Müqəddəs Kitabı öyrənməyə başlamışdılar. Onların evləri uzaqda idi, internetləri isə stabil deyildi. Ona görə də üç il yığıncaqla əlaqələri kəsilmişdi. Amma onlar Müqəddəs Kitabı hər gün oxuyurdular və dua edirdilər ki, Yehovanın Şahidlərindən kimsə onlarla əlaqə saxlasın. Bu ər-arvadın Müqəddəs Kitabı öyrənməyə davam etməsi üçün lazımi tədbirlər görüldü. Dualarına cavab verdiyi üçün onlar Yehovaya çox minnətdardırlar.

Montevideodan (Uruqvay) olan və orada öncül kimi xidmət edən Eduar Fereyro və həyat yoldaşı Alexandra ölkənin ucqar ərazilərində təşkil olunmuş kampaniyada iştirak etmək üçün 400 kilometr yol qət etmişdilər. Onlar 17, 15 və 11 yaşlı uşaqlarını da özləri ilə götürmüşdülər. Eduar deyir: «Uşaqlarımızın necə həvəslə təbliğ etdiyini görmək bizi çox sevindirdi. Deyə bilərik ki, ailəlikcə yeni kampaniyaya artıq hazırıq!»

Bacı-qardaşlarımızın «ətraflı şəhadət [vermək]» üçün göstərdiyi zəhmətə Yehovanın necə dəstək olduğunu görmək bizi çox sevindirir (Həvarilərin işləri 10:42).