Argentinadakı Beytel ailəsi yeni inşa edilmiş filiala köçüb. Podratçı-şirkət onun öhdəsinə düşən tikinti işlərini 2021-ci ilin yay ayında bitirdikdən sonra qalan işləri beytellilər və tikintidə xidmət edən könüllülər gördülər: mebel yığdılar, əsaslı təmizlik, elektrik və santexnika işlərini gördülər.

Yeni filial 136 iş yeri olan inzibati binadan və 98 otağı olan iki yaşayış binasından ibarətdir. Köhnə filialın binaları ayrı-ayrı yerlərdə yerləşirdi. Yeni filialın isə bütün binaları bir məkanda cəmlənib. Filialın ümumi sahəsi təxminən 8524 kvadrat metrdir və Argentinanın paytaxtı Buenos-Ayresin kənarında yerləşir.

Filialın komitə üzvü Umberto Kayro deyir: «Filialın tikintisi zamanı Yehovanın nə qədər səxavətli Allah olduğunu gördük. Yeni binalar çox gözəldir. Bizim kim olduğumuzu göstərən jw.org nişanı isə ona xüsusi gözəllik qatır».

Xidmət şöbəsinin üzvü Sebastyan Rosso deyir: «Yehova bizə möhtəşəm hədiyyə bəxş edib. Binalar tələbatlarımıza cavab verir, onlar çox gözəl və funksionaldır».

Yeni filial Beytel ailəsinin səmərəliyini artıracaq, ətrafda yaşayanlar üçün gözəl şahidlik olacaq və Yehovanın adını daha çox ucaldacaq (2 Salnamələr 7:1).