2021-ci ilin anma mərasimində (Yehovanın Şahidləri üçün bu ən müqəddəs mərasimdir) Belçikada 49 040 nəfər, yəni təbliğçilərin sayından təxminən iki dəfə çox adam iştirak edib. Bu, Belçikada 1995-ci ildən bəri qeydə alınmış ən yüksək saydır.

Nəzərə alsaq ki, Belçikada dinlə maraqlanan insanların sayı getdikcə azalır, anma mərasimində bu qədər insanın iştirak etməsi xüsusilə diqqətəlayiqdir. Məsələn, 1970-ci ildə Belçika əhalisinin 90 faizindən çoxu özünü xristian hesab edirdi, 6 faizi isə özünü heç bir dinə aid etmirdi. Lakin son hesabatlara əsasən, hal-hazırda ölkədə xristianların sayı 60 faizdən az, qeyri-dindarların sayı isə 40 faizdən çoxdur.

Bundan əlavə, son illərdə Belçika mətbuatında Yehovanın Şahidləri barədə qərəzli, bəzən isə yalan məlumatlar dərc edilir. Ancaq buna baxmayaraq, daha çox belçikalı Yehovanın Şahidləri barədə doğru məlumat axtarır. Çoxları öz gözləri ilə görmüşlər ki, Yehovanın Şahidləri arasında məhəbbət hökm sürür və əmin olmuşlar ki, Müqəddəs Kitab prinsiplərini tətbiq etmək insanların həyatını yaxşılığa doğru dəyişir (Yəhya 13:35).

2021-ci ilin fevral ayında Yehovanın Şahidlərinin Belçikadakı filialı xəbər vermişdir ki, Müqəddəs Kitabı öyrənənlərin ən yüksək sayı (11 804 nəfər) qeydə alınıb. Bu, ötən xidmət ilində Müqəddəs Kitabı öyrənənlərin orta sayı ilə müqayisədə təxminən 1000 nəfər çoxdur. Son beş il ərzində hər il orta hesabla 450 nəfər vəftiz olunaraq Yehovanın Şahidi olmuşdur.

Belçikada qeydə alınan bu artım növbəti Müqəddəs Kitab peyğəmbərliyinin bütün dünyada necə yerinə yetdiyinə dair bir nümunədir: «Ən kiçiyindən min nəfər, ən balacasından qüdrətli xalq törəyəcək. Mən Yehova vaxtı yetişəndə bu işi sürətləndirəcəyəm» (Əşiya 60:22).