Bahama Adalarından 5-ci səviyyəli qasırğa kimi keçdikdən sonra «Dorian» qasırğası ABŞ-ın şərq sahillərinə gəlib çatıb. Cümə günü, 6 sentyabr 2019-cu il tarixində, səhər saatlarında qasırğa 1-ci səviyyəli fırtına kimi Hatteras burnundan (Şimali Karolina) keçib. Sel suları evlərə və müəssisələrə ziyan vurub. 7 sentyabr 2019-cu il tarixində fırtına Kanadanın Yeni Şotlandiya əyalətində şiddətli küləklərə səbəb olub.

ABŞ filialının verdiyi məlumata görə, Bahama Adalarında yaşayan 1742 təbliğçidən yalnız bir bacı cüzi xəsarət alıb. Hesabatın təqdim edildiyi tarixədək, məlumata əsasən, Yehovanın Şahidlərinin yaşadığı 48 evə ziyan dəyib, 8 ev isə uçub.

Böyük Abako adasında yaşayan bir çox təbliğçilər Bahama Adalarının paytaxtı Nassau şəhərinə təxliyyə edilib. Yerli bacı-qardaşlar onları hava limanında mehribanlıqla qarşılayıb.

Təbii fəlakətdən zərərçəkənlərə yardım komitəsi və yerli rayon nəzarətçisi yardım işləri təşkil edir və zərərçəkmiş təbliğçilərə baş çəkirlər. ABŞ filialından qardaşlar yardım işlərində iştirak etmək və yığıncaqlara təsəlli vermək üçün həmin əraziyə baş çəkirlər.

ABŞ-da qasırğa, əsas etibarilə, Şimali və Cənubi Karolina ştatlarında fəsadlar törədib. Heç bir Yehovanın Şahidi xəsarət almayıb, bununla belə, 737 dindaşımız evini tərk etməli olub, onların əksəriyyəti təhlükə sovuşanacan müvəqqəti olaraq başqa əraziyə təxliyyə edilib. Bundan əlavə, 50 evə və 12 ibadət evinə zərər dəyib.

Kanadada bacı-qardaşlar arasında xəsarət alan yoxdur. Qasırğa bəzi qardaşlarımızın evinə cüzi ziyan vurub və elektrik enerjisinin kəsilməsinə səbəb olub. Yerli yığıncaqlar zərərçəkmiş bacı-qardaşlara kömək edib.

Bu çətin günlərdə Yehova Ona güvənənlərin yalvarışını cavabsız qoymur. Buna görə Allahımıza necə də minnətdarıq! (Zəbur 28:6).