Patersonda (ABŞ, Nyu-York ştatı) yerləşən Yehovanın Şahidlərinin Gözətçi Qülləsinin Təlim Mərkəzində 2787 kvadrat metr sahəsi olan ikimərtəbəli qonaq mərkəzinin tikintisi davam edir. Tikintini 2023-cü ilin yayında başa çatdırmaq planlaşdırılır. Binada üç daimi və bir müvəqqəti sərgi qalereyalarından ibadət olan muzey yerləşəcək. Muzey gündə 1200 ziyarətçi qəbul edə biləcək. Bundan əlavə, təlim mərkəzinin bir çox binalarında tikinti və yenidənqurma işləri aparılır, o cümlədən köhnə sistemlər yeniləri ilə əvəz edilir. Bu günə qədər işlərin 40 faizi artıq tamamlanıb.

COVID-19 pandemiyası layihə üzərində işləyən qardaşlara bir sıra çətinliklər yaratdı. Pandemiya zamanı tikinti materialları tapmaq müşkül məsələ olduğu üçün tikintinin dayanacağı təhlükəsi var idi. Məsələn, tikintinin mühüm mərhələsində sement qıtlığı yarandı. Qardaşlar lazımi miqdarda sement taparaq beton işlərinin böyük qismini vaxtında görüb qurtardılar. Bundan əlavə, poladın qiyməti kəskin şəkildə qalxdı. Buna baxmayaraq, qardaşlar əvvəlcədən bağladıqları müqavilələr sayəsində onu münasib qiymətə ala bildilər.

Beyteldə qapanma olan müddətdə könüllülərdən olan layihəçi və dizaynerlər öz evlərindən işlədikləri üçün cədvəldən geri qalmadılar. COVID-19 pandemiyası ilə bağlı məhdudiyyətlər ucbatından qardaşlar şəhərsalma şurası ilə bir müddət canlı görüşə bilmirdilər. Buna baxmayaraq, tikinti komitəsi Beytelin müxtəlif şöbələri və şəhərin hakimiyyət nümayəndələri ilə sıx əməkdaşlıq etməsi sayəsində lazım olan icazələri vaxtında aldı. Komitə bu işi uzaqdan işləyən könüllülər, eləcə də videokonfrans vasitəsilə keçirdiyi görüşlər sayəsində görə bildi.

Qapanma şərtləri sərtləşdiyindən təlim mərkəzinin ərazisində yaşaya-yaşaya tikintidə işləyəcək könüllüləri dəvət etmək mümkün deyildi və bu, əlavə çətinliklər yaratmışdı. Amma 2020-ci ilin payız aylarının əvvəlində bu, mümkün oldu.

Cenifer Pol adlı bacı pandemiya zamanı bu tikintidə iştirak etmək dəvəti almışdı. Patersondakı tikinti işi barədə bacı deyir: «İşləməyi sevirəm, amma burada xoşuma gələn təkcə gördüyüm iş deyil, həm də əməkdaşlıq etdiyim insanlardır. Burada təşkilatın döyünən ürəyini və Yehovanın rəhbərliyini görürsən».

Hal-hazırda Patersonda gedən tikinti və yenidənqurma işlərində 440 könüllü iştirak edir. Onlardan təxminən 350-si təlim mərkəzinin ərazisində yaşayır. Bacı-qardaşlar bu layihənin uğurla başa çatdırılması üçün Yehovanın bu işi necə dəstəklədiyini daima görürlər (1 Salnamələr 29:16).