2023-cü il Braziliyadakı filialımızın yaranmasının 100-cü ildönümüdür. Filialın yüzillik tarixinə nəzər salanda görünür ki, Braziliyadakı Yehovanın Şahidlərinin sayı durmadan artır. Bu da aydın sübut edir ki, Yehovanın əli onların üzərindədir.

Braziliyada təbliğ işi 1890-cı illərin sonlarında, «Sion Gözətçi qülləsi və Məsihin hüzurunun carçısı» jurnalının ölkədə ilk dəfə paylanması ilə başlayır. Bu jurnala maraq get-gedə artır. Beləliklə, 1923-cü ilin mart ayında Ruterford qardaş Corc Yanq qardaşı Braziliyaya göndərir ki, orada filial təsis etsin və təbliğ işini təşkil etsin.

Corc Yanq qardaş Rio-de-Janeyro şəhərində kiçik bir ofis icarəyə götürür və bu filial təkcə Braziliyaya deyil, bütün Cənubi Amerika ərazisinə nəzarət edən ilk filial olur. Qardaş həmçinin nəşrlərimizin ingilis dilindən portuqal dilinə tərcümə edilməsi və onların yerli çap şirkətlərinin birində çap edilməsi üçün tədbir görür.

1925-ci ildə Corc Yanq qardaş xidmətini Argentinada xüsusi təyinatlı müjdəçi kimi davam etdirir. Braziliyadakı kiçik filiala Con Reynbou qardaş nəzarətçi təyin olunur. 1926-cı ildə Yehovanın Şahidlərinin Bruklindəki baş idarəsindən (Nyu-York, ABŞ) Braziliya filialına kiçik çap maşını göndərilir. Bunun sayəsində qardaşlar jurnalları və bukletləri özləri çap edə bilir.

1945-ci ildən bəri təbliğ işinə kömək etmək üçün Gözətçi Qülləsinin Müqəddəs Kitab Məktəbi Giladdan Braziliyaya xüsusi təyinatlı müjdəçilər təyin olunur. Yehova onların zəhmətlərinə bol bərəkət verir. 1948—1968-ci illər ərzində təbliğçilərin sayı 1000-dən 50 000-ə artır. Təkcə son üç il ərzində hər il orta hesabla 21 000-dən çox insan vəftiz olunub. Bu gün ölkədə 900 000-ə yaxın təbliğçi xoş xəbəri müjdələyir. Bu möhtəşəm artım Beytelin dəfələrlə yenilənməsinə və böyüməsinə səbəb olub. 1980-ci ildə filial San-Pauludan 150 kilometr məsafədə yerləşən Sezariu-Lanjiyə köçürülüb. O vaxtdan etibarən Sezariu-Lanjidəki Beytel binaları üç dəfə genişləndirilib. Bu gün həmin filialda 1200-dən çox bacı-qardaş xidmət edir.

Son yüz il ərzində Yehovanın Braziliyadakı təbliğ işinə necə dəstək olduğunu görmək bizi çox ruhlandırır (1 Korinflilərə 3:7).