2022-ci il 1—4 sentyabr tarixlərində Yehovanın Şahidləri Braziliyanın San-Paulu şəhərində keçirilən Beynəlxalq sərgiyə, fiziki məhdudiyyətli insanların internetdən istifadəsini rahatlaşdıran texnologiyalar sərgisinə dəvət olundular. Bu sərgi Latın Amerikasında ən çox maraq oyadan texnologiya sərgisidir. Bu il sərgiyə 46 mindən çox insan iştirak etdi.

Sərgidə «jw.org» saytının, «JW Library» və «JW Library Sign Language» tətbiqinin nümayiş olunduğu stendlər qurulmuşdu. Stendlərə monitor quraşdırılmışdı. Bununla yanaşı, görmə məhdudiyyətli və görmə qabiliyyəti zəif olan təbliğçilər ziyarətçilərə saytdan və tətbiqlərdən necə istifadə edə biləcəklərini göstərirdilər.

Fiziki məhdudiyyətli şəxslərə kömək edən bir mütəxəssis guşəmizə yaxınlaşıb belə demişdi: «Bir dini qurumun xüsusi qayğıya ehtiyacı olan insanlara bu qədər qayğı göstərdiyini görmək olduqca təsirlidir». Başqa bir ziyarətçi isə demişdi: «Bu, fiziki məhdudiyyətli şəxslərin cəmiyyətə qaynayıb-qarışması üçün çox gözəl üsuldur».

Braziliya Gözdən Əlillər Cəmiyyətinin nümayəndələri də sərgidə iştirak edirdilər. Onlar tədbir zamanı radio yayım edirdilər. Sərginin həm açılış, həm də bağlanış günündə stenddə duran qardaşlar bu yayım üçün müsahibələr verdilər. Qardaşlar Yehovanın Şahidlərinin nəinki Braziliyada, eləcə də dünyanın dörd bir yanında olan görmə məhdudiyyətli, görmə qabiliyyəti zəif olan və eşitmə məhdudiyyətli insanlara necə kömək etdiklərindən bəhs etdilər. Müsahibələrin birində Gözdən Əlillər Cəmiyyətinin bir nümayəndəsi vurğuladı ki, jw.org saytındakı materiallar onun eşitmə qüsurlu insanlar üçün gördüyü ən faydalı jest-dilli materiallardan biridir.

Ta qədim zamanlardan Yehova fiziki məhdudiyyətli insanlara həmişə öz məhəbbətini göstərib (Lavililər 19:14). Biz əminik ki, xidmətçilərinin Onun kimi məhəbbət göstərdiyini görmək Yehovanı məmnun edir. Biz korların gözlərinin açılacağı, karların qulaqlarının eşidəcəyi vaxtı səbirsizliklə gözləyirik (Əşiya 35:5).