Braziliyanın təxminən 1500 şəhərində yığıncaq yoxdur. Həmin şəhərlərin bəziləri Yehovanın Şahidlərinin ayağı dəymədiyi ucqar ərazilərdə yerləşir. Bu səbəbdən Braziliya filialı 2020-ci ilin sentyabr—dekabr aylarında xüsusi kampaniya keçirməyi planlaşdırmışdı. Lakin COVID-19 pandemiyasına görə təbliğçilər kampaniya zamanı həmin şəhərlərdə yaşayanlara məktublar yazdı. Kampaniyada 3000 yığıncaqdan təbliğçilər iştirak etdi.

Təbliğçilər ilk növbədə onların yığıncağına təyin olunmuş şəhərlər barədə məlumat axtardılar və məktubun mətnini həmin şəhərlərdə yaşayan sakinlərin tələbatlarına uyğunlaşdırdılar. Məsələn, bir öncül bacı Tokantins ştatının bir şəhərinin sakinlərinə məktub yazırdı. O öyrəndi ki, həmin ərazidə yanğın baş vermişdi. Ona görə bacı öz məktublarında Vəhy 21:5 ayəsindən sitat gətirərək izah edirdi ki, Yehova hər şeyi təzə edəcək və gələcəkdə ətraf mühitlə bağlı bütün problemləri həll edəcək. Bir neçə gündən sonra bir qadın bacıya səsli mesaj göndərdi və dedi ki, «vəziyyəti yaxşıya doğru dəyişməyə qadir olan» Allah barədə oxumaq onun üçün çox xoş oldu. Qadın xahiş etdi ki, ona daha ətraflı məlumat verilsin.

Bir insan bacımıza kampaniyanın nə qədər uğurlu olduğunu göstərən mesaj göndərdi. Mesajda deyilirdi: «Sizi həqiqətən də Allah göndərib. Sevincimi ifadə etmək üçün söz tapmıram... Çox sağ olun! Siz Allahın məni sevdiyinə, mənim və ailəmin qayğısına qaldığına imanımı dirçəltdiniz! Sanki kimsə məni bağrına basdı. Sizi tanımasam da, siz mənim dualarıma cavabsınız! Sizə ürəkdən minnətdaram!»

«İtamarati» yığıncağında (Rio-de-Janeyro ştatı, Petropolis) xidmət edən bir ağsaqqal kampaniyada iştirak etmiş bacı-qardaşların hisslərini belə ifadə edir: «Özümüzü ucqar əraziyə təyin olunmuş xüsusi öncüllər kimi hiss etdik. Ailə məsuliyyətləri və digər səbəblərə görə bu xidmət növü bir çox bacı-qardaşlar üçün əlçatmazdır. Çox şadıq ki, əlimizə belə gözəl fürsət düşdü».

Şübhə yoxdur ki, Yehova bu kampaniyanı xeyir-dualandırdı. Biz xoş xəbərin «səma altında yaşayanların hamısına təbliğ [edilməsinə]» kömək etmək şərəfinə layiq görülmüşük (Koloslulara 1:23).