20 oktyabr—5 noyabr 2023-cü il tarixlərində Çilinin müxtəlif şəhərlərində Panamerika Oyunları keçirilmişdi. Bu beynəlxalq, çoxsaylı idman növlərinin olduğu tədbirdə 46 ölkədən 6900-dən çox idmançı iştirak etmişdi. Təxminən 1500 Yehovanın Şahidi oyunlar zamanı keçirilən xüsusi təbliğ kampaniyasında iştirak etmişdi. İctimai şahidlik arabalarına ingilis, portuqal və ispan dilində nəşrlər yerləşdirilmişdi. Bacı-qardaşlarımız idmançılarla və tamaşaçılarla çoxlu maraqlı söhbət aparmışdılar.

Bir dəfə tanınmış idmançı ədəbiyyat arabasına yaxınlaşıb dedi ki, yeniyetmə yaşlarında anası ilə birgə yığıncaq görüşlərinə gedirdi. İdmandan çoxlu pul qazansa da, bu ona gözlədiyi xoşbəxtliyi və məmnunluğu gətirməyib. Yehovanın Şahidləri ona bir neçə ruhlandırıcı ayələr oxuduqdan sonra həmin idmançı təsəlliverici sözlərə görə minnətdarlığını bildirdi.

Bu idmançı kimi ədəbiyyat arabasına yaxınlaşan bir polis işçisi də gənc yaşlarında yığıncaq görüşlərində iştirak edirmiş. O dedi ki, bacı-qardaşları burada görmək yığıncaqla bağlı xoş xatirələri yadına salıb. Qardaş həmin adamın yaşadığı ərazidə keçirilən yığıncaq görüşlərinin vaxtı barədə ona məlumat verdi, eləcə də ona Müqəddəs Kitab və «Əbədi xoşbəxt həyat!» broşürünü verdi. Polis işçisi yenidən Yehovanın Şahidləri ilə rastlaşdığı üçün çox sevindiyini bildirdi.

19 yaşlı gənc bir qız ədəbiyyat arabasının yanında dayanan bacı ilə danışarkən bildirdi ki, elə bu yaxınlarda Müqəddəs Kitabı başa düşmək üçün Allaha dua edirdi. Bacımız ona Müqəddəs Kitabı öyrənməyi təklif edəndə o, məmnuniyyətlə qəbul etdi. Elə həmin gün bacımız onunla Müqəddəs Kitab dərsinə başladı. O vaxtdan etibarən bu gənc qız müntəzəm olaraq Müqəddəs Kitabı öyrənir.

Çilidə keçirilən bu kampaniyada iştirak edən bütün bacı-qardaşlarımıza dərin minnətdarlığımızı bildiririk. Onların əməyinin bəhrəsi bir daha sübut edir ki, Yehova Onu axtaran hər kəsə xeyir-bərəkət verməyə davam edir (Əşiya 55:6).