2019-cu il avqustun 31-dən oktyabrın 26-dək Avstriya və Almaniyada ərəb dilində xüsusi təbliğ kampaniyası keçirilib. Kampaniyaya 19 ölkədən 1782 könüllü qatılmışdı. Onlar ümumilikdə 40724 saat təbliğ etmiş, 4483 dəfə videolarımızı göstərmiş və 24769 ədəd nəşr paylamışlar.

Son bir neçə il ərzində əsasən ərəb ölkələrindən Avstriya və Almaniyaya bir milyondan çox qaçqın gəlib. Onların əksəriyyəti Müqəddəs Kitabdakı xoş xəbəri eşitməyib. Avstriya və Almaniyada ərəb dilində 1108 təbliğçi təbliğ edir. Onlara kömək etmək üçün Avropanın digər ölkələrindən, eləcə də Kanada və ABŞ-dan bacı-qardaşlar gəlmişdi. Kampaniya iştirakçıları, Berlin, Köln, Drezden, Frankfurt, Qrats, Hamburq və Vyana şəhərləri də daxil olmaqla, 24 ərazidə təbliğ etmişlər.

Bir yerli qardaş yazıb: «Biz heç bilməzdik ki, bu kampaniya bizi belə ruhlandıracaq. Xaricdən gələn qardaşlar sanki bizə yeni nəfəs verdilər və köməklərinə görə onlara ürəkdən minnətdarıq. Biz çox şadıq ki, bu xüsusi kampaniyada iştirak etmək imkanımız olub».

Ərəb ölkəsindən olan bir gənc Yehovanın Şahidlərinin yığıncağında iştirak etdikdən sonra qardaşımıza yaxınlaşıb sevinclə soruşdu: «Bilirsən mahabba almanca nə deməkdir?»

Qardaş cavab verdi: «Liebe (məhəbbət)!»

«Bəli, — deyə gənc oğlan cavab verdi. — Bu gün sizin aranızda olarkən mən məhz bunu hiss etdim! Siz mənə qarşı elə xeyirxah idiniz ki! Hər kəs mənimlə salamlaşıb əlimi sıxdı. Mən müxtəlif ölkələrdən olan insanların bir-biri ilə hörmətlə rəftar etdiyini gördüm. Əminəm ki, hər kəs sizin kimi davransaydı, dünya tamamilə başqa cür olardı!»

Başqa bir kişi isə Yehovanın Şahidləri haqda belə deyib: «Siz insanlarla yaxşı yola gedirsiniz. Sizin qurduğunuz icma dünyada ən yaxşı icmalardan biridir».

Ərəb ölkəsindən olan və təxminən bir ildir Almaniyada yaşayan bir cütlük qardaşlarımızı çaya dəvət etdi. Qardaşlar gəlişlərinin məqsədini izah edəndən sonra qadın soruşdu: «Siz Yehovanın Şahidlərisiniz?» Qardaşlar bunu təsdiq edəndə qadın sevinclə dedi: «Gözlərimə inana bilmirəm! Aylardır sizi axtarıram. Hətta sizi tapmaq ümidi ilə mərkəzi dəmiryolu vağzalına da getmişdim. Və budur, siz özünüz yanıma gəldiniz! Sizi Allah göndərib».

Bəli, Yehova bu xüsusi kampaniyaya qatılan və bütün xalqlardan olan insanlarla ümid xəbərini bölüşən bacı-qardaşlarımızı bol-bol xeyir-dualandırıb (Mətta 28:19).