25 aprel 2022-ci il tarixində «JW Library» tətbiqində «Yehovanın Şahidlərinin nəşrləri üzrə axtarış» vəsaitinin yenilənmiş versiyası çıxıb. Yeni versiyada ayələrə izahat gətirilən nəşrlərin siyahısı artırılıb.

2013-cü ildən buraxılan «Axtarış» vəsaitində Müqəddəs Kitab ayələrini izah edən son nəşrlərdən olan mənbələrə istinadlar gətirilirdi.

Son illər «JW Library» tətbiqinə daha köhnə nəşrlər də əlavə olunub. «Gözətçi Qülləsinin ONLAYN KİTABXANASI»nda olan əksər nəşrlər artıq tətbiqdə də var. Yenilənmiş «Axtarış» vəsaitində həmin bu nəşrlərə, o cümlədən «Müqəddəs Yazıların dərk edilməsi» ensiklopediyasına istinadlar var. Tətbiqdə «Axtarış» vəsaitindəki istinadların mətni də var, odur ki, vəsaitdən internetə qoşulmadan da istifadə etmək olar.

Yenilənmiş versiyada «Əbədi xoşbəxt həyat!» kitabının bölmələrinə də istinadlar var. Kari adlı bacı deyir: «Mən telefon təbliği zamanı həyəcanlanıram, amma başa düşürəm ki, insanların təsəlliyə ehtiyacı var. Bəzən hansısa ayə yadıma düşür, lakin söhbəti davam etdirmək üçün həmin ayəni sadə və gözəl şəkildə izah etmək lazım gəlir. “Axtarış” vəsaitindən həmin ayəyə nəşrlərimizdə, o cümlədən «Əbədi xoşbəxt həyat!» kitabında gətirilən izahatı tapmaq imkanı xidmətdə mənə daha çox əminlik və sevinc verir».

«Axtarış» vəsaiti indi daha asan ərsəyə gəlir. Bu səbəbdən onu daha çox dillərə tərcümə etmək olur. Çili filialında xidmət edən İvo qardaş deyir: «İlk dəfə idi ki, “Axtarış” vəsaiti araukan dilində çıxırdı. Əvvəllər bu növ nəşrlərin hazırlanmasında iştirak etməsəm də, proses mənə çox asan gəldi. Bacı-qardaşlar bu vəsaitin yerli dildə çıxdığını görəndə çox təəccüblənmişdilər. Onlar heç vaxt düşünməzdilər ki, bu qədər az adamın danışdığı dildə belə bir vəsait buraxıla. Onlar bu vəsaitə görə çox sevindilər, çünki onun sayəsində dərin şəxsi mütaliə etmək, daha yaxşı şərh və nitq hazırlamaq olacaq».

• İzahatını tapmaq istədiyiniz ayəni Müqəddəs Kitabda açın.

• Əvvəlcə ayənin nömrəsinin üzərinə, sonra isə çıxan menyu pəncərəsində «Axtarış» vəsaitinin simgəsinə basın. Əgər çıxan pəncərədə «Axtarış» vəsaitinin simgəsi yoxdursa, deməli vəsaitdə həmin ayənin izahatına istinad yoxdur.

«Axtarış» vəsaitində mənbələr yenidən köhnəyə doğru göstərilir. Əgər köhnə mənbəni axtarırsınızsa, onda siyahının sonuna baxın. Hansısa ayənin izahatına düzəlişlər edilibsə, yeni izahat siyahının əvvəlindəki mənbələrdə yerləşir.