Artıq beş ildir ki, bütün dünyadakı Yehovanın Şahidləri JW televiziyasında yayımlanan aylıq proqramları sevə-sevə izləyir. Hal-hazırda 2020-ci ildə yayımlanacaq proqramlar üzərində iş gedir. Hələlik isə gəlin 2014-cü ilin oktyabr ayından, ilk proqramın yayımlandığı gündən bəri görülən işlərlə tanış olaq.

185 dilə tərcümə olunur. JW televiziyası əvvəl-əvvəl yalnız ingilis dilində yayımlanırdı. 2015-ci ilin may ayından isə Rəhbərlik Şurasının icazəsi ilə 40-dan çox dilə tərcümə olunmağa başladı. Bu gün, cəmi dörd il sonra televiziyadakı videolar orta hesabla 185 dildə yayımlanır.

Bütün dünyadan süjetlər çəkilir. JW televiziyası bütün dünyadakı qardaşlıq üçün nəzərdə tutulub. Buna görə də get-gedə süjetlərin çoxu dünyanın müxtəlif yerlərindəki çəkiliş heyətləri tərəfindən hazırlanır. Hər dəfə aylıq proqramın sonunda ucqar ərazilərdəki, məsələn, Efiopiya, İslandiya, Monqolustan, Saypan, Tuvalu və Uqandadakı yığıncaqların salamlarını çatdıran videolar göstərilir. JW televiziyası 230 ölkədə, hətta cənub qütbündəki ərazilərdə, məsələn, daimi yaşayışın olmadığı Herd və Makdonald adalarında da izlənir. Hər dəfə aylıq proqram çıxanda çıxdığı ay ərzində orta hesabla 8,6 milyon dəfə izlənir və ya yüklənir.

Müxtəlif mövzularda videolar hazırlanır. Ümumilikdə götürəndə, bu günə qədər aylıq proqramlara daxil olan videolar, yəni nitqlər, müsahibələr, maraqlı hadisələr, son xəbərlər və səhnələşdirilmiş əhvalatlar 60 saatdan çox edir. Aylıq proqramda ilk dəfə çıxan «Xoşbəxt həyat» mahnısından sonra mahnılar aylıq proqramın ayrılmaz hissəsi oldu. Bu mahnılar 368 dilə tərcümə olunur.

Aparıcılar. Əvvəl-əvvəl proqramı yalnız Rəhbərlik Şurasının üzvləri aparırdı. Sonradan isə Rəhbərlik Şurasının köməkçiləri ikinci aparıcı kimi proqrama qatılmağa başladı. Bəzən isə onlar proqramı tək aparır. Ümumilikdə, aylıq proqramları 29 qardaş aparıb.

Minnətdarlıq sözləri. Birləşmiş Ştatlardan olan insult keçirmiş və hələ də bunun təsirini hiss edən bir qardaş xüsusilə mahnılara görə öz minnətdarlığını bildirir. O deyir: «Ruhani mövzulara həsr olunmuş bu gözəl mahnılar mənə güc verir, həyatımdakı çətinliklərlə mübarizə aparmağa kömək edir. Məəttəl qalıram ki, bu mahnıların sayəsində özümdə məsihi xüsusiyyətləri yetişdirə bilirəm. Sizə ürəkdən minnətdaram!»

Balaca oğullarını xərçəng xəstəliyindən itirən Birləşmiş Ştatlarda yaşayan bir ailə 2016-cı ilin noyabr proqramına baxandan sonra yazmışdı: «“Yeni dünya yaxındır” klipinə baxanda gözümüzün yaşı sel kimi axırdı. Özümüzü cənnətdə, klipdəki valideynlərin yerində hiss edirdik. Hər dəfə hiss edəndə ki, bu dərdə dözməyə gücümüz qalmayıb, Yehova bizə göstərir ki, O bizi başa düşür və bizə dözüm verəcək. Bu klip dönə-dönə etdiyimiz hərarətli duaların cavabıdır».

Ukraynadan olan bir cütlük aylıq proqrama görə minnətdarlıqlarını bu sözlərlə bildirir: «JW televiziyası sayəsində Rəhbərlik Şurasının üzvləri bizə doğma olublar!»

Bizi dünyadakı dindaşlarımızla birləşdirən və düz vaxtında ərsəyə gələn JW televiziyasına görə Yehovaya minnətdarıq (1 Butrus 2:17).