Gürcüstandakı bacı-qardaşlar 20—22 iyul 2018-ci il tarixində Tbilisi şəhərində keçirilən «Cəsur ol!» adlı xüsusi toplantıya 18 ölkədən gələn qonaqları səmimi qarşıladı. Gürcüstanda ilk dəfə keçirilən bu teokratik tədbirdə Müqəddəs Kitaba əsaslanan çoxlu ruhani məruzələr söylənildi, qonaqpərvərlik göstərildi, regionun zəngin mədəniyyəti və maraqlı tarixi sərgiləndi.

Toplantı Tbilisidə yerləşən bir Olimpiya Mərkəzində keçirildi. İştirak edənlərin ən yüksək sayı 7002 nəfər idi. Ölkənin təxminən 80 yerində canlı yayımlanan proqramı ümumilikdə 21500-dən çox insan izləyə bildi. Toplantının ən yadda qalan hadisəsi 208 nəfər bacı-qardaşın vəftiz olunması idi.

Qonaqlar ruhani proqramdan əlavə, Gürcüstan mədəniyyətinin incilərindən də feyzyab oldular. Yerli bacı-qardaşlar gələn qonaqlar üçün rəqs etdilər, xalq mahnıları oxudular, yerli mətbəxin ləziz təamlarını bişirdilər və qədimi şəhər olan Tbilisidə ekskursiyalar keçirdilər.

Gürcüstan filialından olan Tamaz Xutsişvili adlı bir nümayəndə deyir: «Ölkədə həmişə dini azadlığımız olmayıb. Amma bu dəfə hökumət nümayəndələri bu sülhməramlı tədbirin keçirilməsinə izin verdi. Bu tədbir sayəsində müxtəlif ölkələrdən gələn çoxlu bacı-qardaşımıza qonaqpərvərlik göstərmək fürsəti əldə etdik» (Romalılara 15:7).