COVID-19 pandemiyası Hindistanda nəşrlərimizi 36 dilə tərcümə edən 11 Tərcümə ofisi üçün yeni problemlər yaradıb. Yehovanın köməyi sayəsində tərcümə qrupları bu çətinlikləri aşır və işlərini davam etdirirlər.

Tərcüməçilər bir yerdə qrup şəklində işləməlidirlər. Lakin COVID-19 pandemiyasına görə Hindistanda sərt karantin rejimi tətbiq olunub. Bunun ucbatından tərcüməçilərin bir məkanda işləməsi mümkün deyil. Audio- və videostudiyalar isə öz işlərini görmək üçün insanları Tərcümə ofislərinə dəvət edə bilmir.

Hal-hazırda Tərcümə ofislərində tərcüməçilər videokonfrans vasitəsilə işləyir və nəşrlərimizin audioyazısını uzaq məsafədən aparır. Belə iş metodu sayəsində tərcüməçilərin imkanları genişlənib, belə ki, indi onların Banqladeş və ABŞ kimi ölkələrdə yaşayan bacı-qardaşlarla əməkdaşlıq etmək imkanları var.

Fiziki məsafəni gözləmək tələb olunduğu şəraitdə jest dilinə videolar tərcümə edən bacı-qardaşlar da işlərini davam etdirmək üçün kreativ üsullar axtarıb tapıblar. Bəziləri əllərinin altında olan əşyaların köməyilə yataq otaqlarından audiostudiya düzəldib, məsələn, onlar karton qutulardan ştativ düzəldiblər, çəkilişi isə peşəkar kamera ilə yox, mobil telefonla aparırlar.

Tərcüməçilər texniki problemlərin öhdəsindən gəlməklə yanaşı, müsbət əhval-ruhiyyəni qoruyur və bu çətin günlərdə işlərindən qalmırlar. Əlbəttə ki, bunda Yehovanın əli var. Görək onların bəziləri nə deyir.

Kəlküttə şəhərindən olan Xose Fransis qardaş deyir: «Çətinliklər insanlar üçün divar kimidir. Lakin Yehova bu divarı necə aşmağı bilir».

Benqaluru şəhərindən olan Bindu Rani Çandan bacı deyir: «Belə bir çətin vaxtda Yehovanın məndən Öz işində istifadə etdiyi barədə düşünəndə qəlbim sevinclə dolur».

Vadodaradan olan Rubina Patel bacı isə öz hisslərini belə ifadə edir: «Heç nə, hətta koronavirus belə Yehova və Onun təşkilatı üçün əngəl ola bilməz».

Nəşrlərimizi tərcümə edən zəhmətkeş bacı-qardaşlarımızla fəxr edirik. Biz əminik ki, Yehovanın qüdrətli müqəddəs ruhu onlara işlərinin öhdəsindən gəlməyə kömək edir. Və bu ruh sayəsində İsanın növbəti peyğəmbərliyi yerinə yetir: «Padşahlıq haqqındakı bu müjdə xalqların hamısına şəhadət olsun deyə, bütün yer üzündə təbliğ ediləcək» (Mətta 24:14).