27 İYUN 2019
İTALİYA

İtaliyada keçən iki böyük tibb konfransında iştirak edən həkimlər qanköçürmənin alternativlərinə maraq göstərib

PLAY

Tibbi mütəxəsislər Palermo şəhərində keçirilən SIAARTI konfransındakı məlumat stendimizin qarşısında

Bir çox həkimlər bütün dünyada qansız müalicə və cərrahi əməliyyat üsulları, eləcə də qanköçürmənin alternativləri barədə daima məlumat təqdim etdiyinə görə təşkilatımıza çox minnətdardırlar. Yehovanın Şahidlərinin İtaliya (Roma) filialında yerləşən Xəstəxana məlumat xidmətinin də bu sahədə rolu böyükdür. Ötən ilin sonunda bu xidmətin nümayəndələri və yerli Xəstəxanalarla əlaqə komitəsinin üzvləri iki iri konfransda iştirak etmiş, onlarda məlumat stendləri quraşdırmışlar. Anesteziologiya, Ağrıkəsmə, Reanimasiya və İntensiv Terapiya İtaliya Cəmiyyətinin Ümummilli Konqresi (SIAARTI) 10—13 oktyabr 2018-ci il tarixlərində Siciliyanın Palermo şəhərində keçib. Ondan bir qədər sonra Romada «La Nuvola» konfrans mərkəzində Cərrahiyyə Elmi Cəmiyyətlərinin Birgə Konqresi baş tutub.

Bu kimi konfranslar qansız müalicə üsulları barədə tibb mütəxəssislərinə eyni vaxtda ən son məlumatları təqdim etmək üçün gözəl fürsətdir. Palermoda keçirilən konfransda 2800 anestezioloq iştirak edib. İtaliyada indiyədək cərrahiyyə üzrə keçirilən ən iri konfrans olan Romadakı konfransda isə 3500 cərrah iştirak edib. Konfransa müxtəlif nüfuzlu tibb müəssisələrinin nümayəndələri qatılmışlar. Onların arasında bütün İtaliya cərrahlar birliklərinin, eləcə də Amerika Cərrahlar Kollegiyasının İtaliya Filialının üzvləri də var idi. Tədbir Səhiyyə Nazirliyi kimi bir sıra dövlət qurumlarının dəstəyi ilə keçirilib.

Kataniya Xəstəxana Poliklinikasında (Siciliya) fəaliyyət göstərən anestezioloq Vinçenso Skuderi Palermodakı konfransda quraşdırdığımız stendə yaxınlaşıb. 2019-cu il yanvarın 18-i o, aortanın laylanması diaqnozu qoyulan Yehovanın Şahidinə təcili tibbi yardım göstərib. O olduqca mürəkkəb proseduru qansız keçirib. Doktor Skuderi deyir: «SIAARTI konfransındakı [stendinizin] faydası çox böyükdür. Verdiyiniz məlumat mənə xeyli kömək edib».

Hal-hazırda İtaliyada Yehovanın Şahidləri olan xəstələri qanköçürmə tələb etməyən effektiv tibbi və cərrahi üsullarla müalicə etməyə razı olan 5000-dən çox həkim var. Hər il İtaliyada, orta hesabla, 16000 Yehovanın Şahidi bu üsullarla müalicə olunur.

Bu konfranslardan sonra anestezioloq və cərrahlar Yehovanın Şahidləri ilə bağlı təcrübələrindən danışdılar.

«Artıq neçə ildir ki, Yehovanın Şahidlərini müalicə edirəm. Son bir neçə il ərzində SIAARTI-nın Bioetika üzrə Tədqiqat Qrupunun qanköçürmədən imtina hallarını sənədləşdirən İşçi Qrupu anestezioloqlar üçün bir təlimat hazırlayıb. Orada mürəkkəb cərrahi əməliyyata ehtiyacı olan xəstələrə patologiya və xəstəliklərini nəzərə alaraq kömək etmək üzrə vahid yanaşma sistemi qeydə alınıb. Sənəddə birmənalı şəkildə bildirilir ki, “sağlamlıq məsələlərində şəxsi qərar vermək hüququ Konstitusiyanın (maddə 2, 13, 32), İnsan Hüquqları haqqında Ümumi Bəyannamənin, Ovyedo Konvensiyasının və Avropa İttifaqının Fundamental Hüquqlar Xartiyasının zəmanət verdiyi əsas insan hüquqlarından biridir”» (Antonio Korçone — Kampaniya Vilayət Transplantologiya Mərkəzinin koordinatoru, Molando Xəstəxanasının Anesteziologiya və İntensiv Terapiya şöbəsinin müdiri, SIAARTI-nın sabiq prezidenti).

«Yehovanın Şahidləri ilə işlədiyim müddət ərzində topladığım təcrübə məni və həmkarlarımı qanköçürməyə ehtiyacı azaltmaq üçün qanqoruyucu vasitələrdən istifadə etməyə və əməliyyatdan sonrakı müalicə metodlarını dəyişməyə təşviq edib. Şübhə yoxdur ki, bunun qanköçürmədən imtina edən xəstələrə — ancaq yalnız onlara deyil — köməyi dəyib. Biz hətta xəstələrin qanköçürməyə etiraz etmədiyi bir çox hallarda belə qanköçürmədən qaçına bilmişik» (Uqo Bodji — Piza Universitetinin (İtaliya) Ümumi Cərrahiyyə Kafedrasının tamştat professoru, Pitsburq Universitetinin (ABŞ) Cərrahiyyə Kafedrasının adyunkt-professoru, İtaliya Orqan Transplantasiyası Cəmiyyətinin seçilmiş prezidenti).

«Qaraciyər transplantasiyası transplantologiyada ən mürəkkəb əməliyyat hesab edilir. Bu əməliyyat digər əməliyyatlarla müqayisədə iki, üç, hətta bəlkə də dörd dəfə ağırdır və yüksək qanaxma riski ilə bağlıdır. Lakin bütün dünyada xəstələrin müalicəsi, eləcə də qaraciyər köçürülməsi üzrə on minlərlə əməliyyat zamanı toplanan elmi təcrübə sayəsində biz, belə desək, bu cür əməliyyatların “incəliklərinə yiyələnmişik”. Mən qanaxmanı azaltmaq üçün sınaqdan keçmiş üsulları nəzərdə tuturam. Biz qanköçürmədən necə qaçınmağı bilirik. Qaraciyər üzərində əməliyyatların hamısı, hətta transplantasiyası, demək olar ki, tamamilə qansız keçirilir. Qaraciyər cərrahiyyəsində qanköçürmə artıq istisna haldır, çünki biz bir neçə il bundan əvvəl geniş istifadə olunan invaziv üsulları geridə qoyub əməliyyat zamanı hər damarın nəzarət altında saxlanıldığı mikrocərrahiyyəyə istiqamət almışıq. Buna görə Yehovanın Şahidlərinə “çox sağ ol” deməliyəm: onlar 10—15 il bundan əvvəl fikir vermədiyimiz qanqoruma üsullarına gözlərimizi açıblar» (Umberto Çillo — Paduya Universitetinin ümumi cərrahiyyə üzrə tamştat professoru və Hepatobilyar Cərrahiyyə və Qara Ciyər Transplantasiyası şöbəsinin müdiri, İtaliya Orqan Transplantasiyası Cəmiyyətinin (SITO) prezidenti).

«Yehovanın Şahidlərinin möhkəm imanı və etiqadlarına bağlılığı məni valeh edir. Məhz bu səbəbdən mən bu illər ərzində həmişə onların fikrini nəzərə alaraq dəyişikliklər etməyə çalışırdım. Bu insanlar ən yüksək hörmətə layiqdir. Yehovanın Şahidləri ölmək və ya şəhid olmaq istəmirlər. Onlar sadəcə keyfiyyətli müalicə almaq istəyirlər» (Françesko Korçone — II Federiko adına Neapol Universitetinin cərrahiyyə üzrə tamştat professoru, İtaliya Cərrahlar Cəmiyyətinin fəxri prezidenti, Milli Cərrahiyyə Akademiyasının (Fransa, Paris) fəxri üzvü).

«Yehovanın Şahidləri ilə ünsiyyət məni daha da əmin etdi ki, həkimlər xəstənin dinindən və ya mədəniyyətindən irəli gələn etiqadlarına dərin hörmət göstərməlidirlər. Bu, 2017-ci il dekabr ayında İtaliyada “Məlumatlandırılmış razılıq və əvvəlcədən verilmiş sərəncam haqqında” 219 saylı Qanun qəbul edildikdən sonra qanunvericilik səviyyəsində təsbit edildi. Qanuna əsasən, “xəstənin könüllü və məlumatlandırılmış icazəsi olmadan hər hansı bir prosedurun keçirilməsi qadağandır”. Cərrahla xəstə arasında peşəkar səviyyədə sərbəst və hörmətcil ünsiyyət olduqda bu, hər ikisinin xeyrinədir, çünki məsuliyyət yükü hər ikisinin arasında bölüşdürülmüş olur, xəstə özünü daha sərbəst hiss edir, müalicə daha yaxşı keçir» (Luka Ansaloni — Çezena şəhərindəki Bufalini adına Hospitalın Ümumi və Təcili Cərrahiyyə şöbəsinin müdiri, İtaliya Cərrahiyyə və Patofiziologiya Cəmiyyətinin prezidenti).

«Yehovanın Şahidləri qansız müalicə üsullarının inkişafına xeyli töhfə verib. Yeni cərrahi üsullar dini etiqadlarına görə qanköçürmədən imtina edən xəstələri müalicə edən həkimlər üçün böyük köməkdir. Müalicənin qiyməti baxımından da bu üsulların üstünlükləri çoxdur» (Diyeqo Pyatsa — İtaliya Tibb Assosiasiyasının (Kataniya) prezidenti, Qaribaldi-Nezima Xəstəxanasının (Kataniya) Onkoloji Cərrahiyyə şöbəsinin müdiri, İtaliya Xəstəxana Cərrahları Assosiasiyasının (ACOI) sabiq prezidenti).

«Qanköçürmənin zənn edilən “təhlükəsizliyi”, qanın asan əldə edilməsi, nisbi ucuzluğu, onu asanlıqla təyin etmək imkanı, tez görünən nəticələri (hemoqlobini artırması mənasında) bu üsuldan geniş istifadə olunmasına gətirib çıxarıb. Bununla belə, eritrositlərin və qanın digər komponentlərinin köçürülməsinin əslində ciddi risk olduğuna dair sübutlar ildən-ilə artır. Belə ki, bir sıra araşdırmalar nəticəsində müəyyən edilmişdir ki, qan köçürülməyən xəstələrə nisbətən qan köçürülən xəstələrdə ağırlaşma, ölüm halları, xəstəliklər (insult, böyrək və ya tənəffüs çatışmazlığı, tromboemboliya, infeksiyalar) daha çox müşahidə edilir. Üstəlik, onlar daha çox xəstəxanada qalmaq məcburiyyətindədir. Mən hesab edirəm ki, 50 ildən çox Yehovanın Şahidlərini müalicə etməyimiz sayəsində həkimlər qanqoruyucu və qansız cərrahiyyə sahəsindəki nailiyyətlərə diqqət yetirib» (Candomeniko Byankofyore — Piza Universitet Xəstəxanasının Transplantologiya Kafedrasında Kompleks Operativ Anesteziologiya və Reanimasiya şöbəsinin rəhbəri, Piza Universitetində Anesteziologiya və Reanimasiya Kafedrasının dosenti).