6 MAY 2024 | YENİLƏNİB: 11 İYUL 2024
RUSİYA

«Yehova hər şeyi nəzarət altında saxlayır» | YENİLƏNİB. HƏBS CƏZASINA MƏHKUM OLUNDULAR

PLAY

10 iyul 2024-cü il tarixində Primorye Vilayətinin Xorolski Rayon Məhkəməsi Boris Andreyev, Anatoli Li və Natalya Şarapovanı təqsirli bildi. Boris altı il, Anatoli altı il altı ay, Natalya isə üç il müddətinə həbsə məhkum edildi. Onlar istintaq təcridxanasında saxlanılırdılar və bundan sonra da həbsdə qalacaqlar.

Dindaşlarımız barədə məlumat

Boris Andreyev

Doğulduğu il: 1951 (Primorye vilayəti, Monastırişe)

Bioqrafiya. Təcili xidmətlər dispetçeri işləyib

Suallarına Müqəddəs Kitabdan cavab alması onu həqiqəti tapdığına əmin etdi. 2004-cü ildə Yehovanın Şahidi kimi vəftiz olundu

2020-ci ildə Aleksandra ilə ailə həyatı qurdu

Borisin həyat yoldaşı Aleksandranın müsahibəsi a

Bu çətin günlərdə yoldaşın sənə necə kömək edib?

Yadımdadır, Boris həbs olunandan sonra bir gün mənə xüsusilə ağır gəldi. Çarəsizlik hissi məni ağuşuna aldı və için-için ağlamağa başladım. Baş verənləri və keçirdiyim hissləri Borisə məktubda yazdım. Cavabında o mənə təskinlik verdi və hisslərimi başa düşdüyünü dedi. Ən əsası isə o mənə keçmişdə Yehovanın köməyi ilə öhdəsindən gəldiyimiz çətinlikləri xatırlatdı. Mənə də məhz bu lazım idi! Əmin oldum ki, Yehova bizi heç vaxt tərk etməyəcək.

Anatoli Li

Doğulduğu il: 1985 (Özbəkistan)

Bioqrafiya. Bir çox dinlərə üz tutub, amma suallarına cavab tapa bilməyib. Yehovanın Şahidləri ilə Müqəddəs Kitab dərsi keçməyə başladı. Allahın Kəlamından həqiqəti öyrənmək ona sevinc gətirirdi. 2010-cu ildə vəftiz olundu

2011-ci ildə Raisa ilə evlənib

Anatolinin həyat yoldaşı Raisanın müsahibəsi b

Yehova sizə necə kömək etdi?

İstintaq təcridxanasına keçirilməsindən çox keçməmiş Anatoli mənə dedi ki, mənim tək qalmağım onu çox narahat edir. O, həbs olunmazdan əvvəl biz hər gün bir yerdə Müqəddəs Kitabı oxuyub dua edirdik. Amma biləndə ki, Yehova bacı-qardaşların vasitəsilə mənim ehtiyaclarımı ödəyir, Anatolinin narahatlığı azaldı. Hər ikimiz Yehovanın əlini gördük və əmin olduq ki, O, daima bizimlə olacaq.

Natalya Şarapova

Doğulduğu il: 1972 (Qazaxıstan)

Bioqrafiya: 1995-ci ildə Yehovanın Şahidləri ilə tanış olub və Müqəddəs Kitab dərsi keçməyə razılaşıb. Müqəddəs Kitabın Allahın Kəlamı olduğuna əmin olub. 2012-ci ildə vəftiz olunub

Natalyanın anası Ninanın müsahibəsi c

İstintaq təcridxanasında Natalyaya müsbət əhval-ruhiyyəni qorumağa nə kömək edir?

Qızım istintaq təcridxanasında müxtəlif çətinliklərlə üzləşir. Ora çox soyuqdur, üstəlik tez-tez keçirdiyi baş ağrılarından əziyyət çəkir. Hərdən ruhdan düşsə də, o əmindir ki, Yehova hər şeyi nəzarət altında saxlayır. Natalya deyir: «Bilirəm ki, ömrümü burada keçirməyəcəyəm. Yehova mənə səbir verir, buna görə də gözləməyə hazıram». Üzləşdiyi çətinliklər Natalyanı Yehovaya daha da yaxınlaşdırıb. O özünü sanki Yehovanın qucağında hiss edir.

Anatolinin, Borisin və Natalyanın nümunəsi bizi əmin edir ki, dar gündə Yehova bizim də dualarımıza cavab və dözməyə güc verəcək (Zəbur 20:1).

Hadisələrin gedişatı

28 iyul 2022-ci il

Cinayət işi açılır
6 oktyabr 2022-ci il

Yaroslavski kəndində on iki evdə axtarış aparılır. Boris və Natalya müvəqqəti saxlama təcridxanasına salınır
7 oktyabr 2022-ci il

Boris və Natalya istintaq təcridxanasına keçirilir
12 oktyabr 2022-ci il

Anatoli müvəqqəti saxlama təcridxanasına salınır
13 oktyabr 2022-ci il

Anatoli istintaq təcridxanasına keçirilir
5 oktyabr 2023-cü il

Cinayət işi üzrə məhkəmə icraatı başlanır

a b c Bu məqalə hazırlanan zaman Boris, Anatoli və Natalya təcridxanada olduqları üçün onlardan müsahibə götürmək mümkün olmayıb.

Həmçinin bax

XƏBƏRLƏR

Əqidə məhbusları. Rusiya

Rusiyada Yehovanın Şahidləri əqidələrinə görə həbs olunur. Onların həyat hekayələrini oxuyun və hal-hazırda həbsdə olanların siyahısına nəzər salın.

XƏBƏRLƏR