21—29 oktyabr 2023-cü il tarixlərində Serbiyanın paytaxtı Belqradda 66-cı Beynəlxalq Kitab Sərgisi keçirildi. Tədbirə 190 000-dən çox insan qatıldı. Yehovanın Şahidləri sərgidə Allahın Kəlamının dəyərini göstərən məlumat guşəsi qurmuşdu. 100-dən çox bacı-qardaşımız ziyarətçilərə Müqəddəs Kitabdan həyativacib suallara necə cavab tapa biləcəklərini göstərdi.

Bir orta yaşlı qadın guşəmizə yaxınlaşıb Müqəddəs Kitaba dair çoxlu suallarının olduğunu dedi. Nəhayət ki, suallarına cavab verə biləcək birinə rast gəldiyinə görə çox sevinirdi. Bacımız onunla söhbəti davam edə bilmək üçün vaxt təyin etdi.

Bir gənc «Həyat necə yaranıb?» broşürünün bir nüsxəsini götürdü. O dedi ki, Allahın varlığına inanır, amma Müqəddəs Kitabda yaradılışla bağlı yazılanları tam dərk edə bilmir. Məsələn, ona maraqlı idi ki, doğrudanmı Allah dünyanı cəmi 6 günə yaradıb?! Yehovanın Şahidləri ona jw.org saytından məhz bu suala dair məqaləni göstərəndə o çox sevindi.

«Gənclərin sualları. Praktiki məsləhətlər» kitabının 1 və 2-ci cildi iki yeniyetmə qızın diqqətini cəlb etdi. Onlar kitabda əsl dostu necə tapmalı, məktəbdə qiymətləri necə yaxşılaşdırmalı, eşq və məhəbbət arasındakı fərq nədir və digər lazımlı mövzuların yer aldığını görüb çox sevindilər. Qızlardan biri dedi: «Çox maraqlı kitablardır. Mütləq onları oxuyacağıq!»

Belqraddakı kitab sərgisində çəkdikləri zəhmətə görə bacı-qardaşlarımıza çox minnətdarıq. Qoy Yehova bundan sonra da «Onun adını bəyan edən» kəslərin işlərini avand etsin! (İbranilərə 13:15).