Ukraynanın bir çox yerlərində yollar, körpülər və elektrik stansiyaları bombalanma ucbatından dağılıb və ya ciddi zərər görüb. Tez-tez elektrik enerjisinin verilməsi dayandırılsa da, bacı-qardaşlar ibadət görüşlərindən və digər ruhani işlərdən qalmırlar.

Kiyevdə öncül kimi xidmət edən Anastasiya və Debora bacının sözlərinə əsasən, gün ərzində azı 12 saat işıqsız qalırlar. Onlar imkan yaranan kimi elektron cihazlarını elektrik enerjisi ilə doldurur və ibadət görüşlərinə qatılmaq üçün mobil internetdən istifadə edirlər. Çox vaxt görüş bitəndə internet bağlantısı kəsilir.

Elektrik enerjisinin kəsintisi ucbatından yaranan daha bir çətinlik istilik problemidir. Bəzi bacı-qardaşlar elektrik enerjisi və istilik üçün generatorlardan istifadə edirlər. Bəziləri evlərində istilik sistemi olan qohumlarının yanına köçüb. Digərləri isə soyuğa dözməyə məcburdurlar. Nə yaxşı ki, bir çox bacı-qardaşımızın evində qazla işləyən istilik sistemləri var və işıq olmayanda da evi isitmək olur.

İvano-Frankovskidə yaşayan İrina adlı öncül bacımız müsbət əhval-ruhiyyəni qorumağa qətiyyətlidir. O deyir: «Qərara gəlmişəm ki, diqqətimi həll edə bilmədiyim şeylərə kökləməyim. Nəyinki sabahkı gün üçün, bir saat sonra üçün də narahat olmuram. İşıqlar kəsilən vaxt nə edəcəyimi əvvəlcədən planlaşdırıram və mənə lazım olan nəşrləri əvvəlcədən yükləyirəm».

Ukraynadakı bacı-qardaşlarımız çoxlu çətinliklərə üzləşsələr də, Yehovaya xidmətdə fəaldırlar. Əminik ki, Yehova bundan sonra da yaxşı işlərinə görə onlara bol nemətlər verəcək (Qalatiyalılara 6:9).

Aşağıda 6 dekabr 2022-ci il tarixinədək Ukraynadakı qardaşlardan aldığımız məlumatları çatdırırıq. Faktiki rəqəmlər daha yüksək ola bilər, çünki ölkənin bütün regionları ilə əlaqə saxlamaq çətindir.

• 47 təbliğçi həlak olub.

• 97 təbliğçi xəsarət alıb.

• 11 537 təbliğçi evlərini tərk etməli olub.

• 590 ev dağılıb.

• 645 evə ciddi ziyan dəyib.

• 1722 evə cüzi ziyan dəyib.

• 7 ibadət evi dağılıb.

• 19 ibadət evinə ciddi ziyan dəyib.

• 68 ibadət evinə cüzi ziyan dəyib.

• 27 Zərərçəkənlərə yardım komitəsi fəaliyyət göstərir.

• 54 212 təbliğçiyə komitələr qalmaq üçün daha təhlükəsiz yerlər tapmağa kömək edib.

• 26 811 təbliğçi başqa ölkələrə qaçıb və onlara oradakı dindaşları yardım göstərir.