Mariupol kimi şiddətli döyüşlərdən zərər çəkmiş ərazilərdə elektrik enerjisi və istilik yoxdur, telefon və internet əlaqəsi kəsilib. Bir çox evlərin pəncərəsi sınıb. Ərzaq və su ehtiyatları tükənir. Mariupol mühasirədə olduğu üçün 2500-dən çox bacı-qardaş oranı tərk edə bilmir. Buça, Çerniqov, Qostomel, İrpen, Kiyev və Sumı kimi bəzi şəhərlərdə insanların təxliyə olunması üçün «dəhlizlər» açılıb. Bunun sayəsində onlarla dindaşımız daha təhlükəsiz yerlərə qaça bilib.

Qostomel şəhərindən olan və orada ağsaqqal və öncül kimi xidmət edən 36 yaşlı qardaş həyat yoldaşı və valideynləri ilə birgə şəhərdən qaçıb. O, orada yaşadıqları barədə deyir:

«Evimizin üstündən helikopterlər uçurdu. Yollar hərbi maşınlarla dolu idi. Əsgərlər evimizə soxulanda biz zirzəmidə gizlənmişdik. Onlardan biri bir neçə dəfə zirzəmiyə atəş açdı. Anamın fəlakət çantasına bir neçə güllə dəydi, amma bizə zərər vurmadı. Təxminən üç-dörd saat ərzində atışma və partlayış səsləri gəlirdi. Bütün bu vaxt ərzində tərpənmədən səssiz-səmirsiz oturduq... Ertəsi gün maşınla oranı tərk edəndə düz yanımızda döyüş başladı. Yollarda tanklar var idi... Çox təhlükəli idi, amma orada qalmaq ondan da təhlükəli idi.

Bütün bu hadisələr həyatımızı çox dəyişdi. Bir çox Müqəddəs Kitab prinsiplərini tətbiq etməyi, məsələn, sabah üçün narahat olmamağı, əsas şeylərlə qane olmağı və ən çətin vəziyyətlərdə Yehovaya güvənməyi öyrəndik».

Biz əminik ki, Yehova Ukraynadakı bacı-qardaşlarımızın düşdüyü ağır vəziyyətdən xəbərdardır. Yehova onları heç vaxt tərk etməyəcək (2 Butrus 2:9, 10).

10 mart 2022-ci il tarixinə olan məlumat:

• 2 təbliğçi həlak olub.

• 8 təbliğçi xəsarət alıb.

• 25 407 təbliğçi evlərini tərk edərək ölkənin daha təhlükəsiz ərazilərinə köçüb.

• 25 ev dağılıb.

• 59 evə böyük ziyan dəyib.

• 222 evə cüzi ziyan dəyib.

• 7 ibadət evinə ziyan dəyib.

• Ukraynada 27 Zərərçəkənlərə yardım komitəsi fəaliyyət göstərir.

• 10 566 təbliğçiyə komitələr qalmaq üçün daha təhlükəsiz yerlər tapmağa kömək edib.

• 9635 təbliğçi başqa ölkələrə qaçıb və onlara oradakı dindaşları yardım göstərir.