Təəssüf hissi ilə məlumat veririk ki, 2022-ci il 9 mart tarixinədək olan məlumata əsasən, Mariupol şəhərində daha yeddi dindaşımız həlak olub. Ümumilikdə, həlak olan bacı-qardaşların sayı 17-yə çatıb.

Ukraynada Zərərçəkənlərə yardım komitələri bacı-qardaşlara kömək etmək üçün gecə-gündüz yorulmadan işləyirlər, hətta həyatlarını riskə ataraq döyüş zonalarında dindaşlarını axtarıb tapmağa çalışırlar.

Məsələn, komitələrdə xidmət edən qardaşlar Xarkov, Kramatorsk, Mariupol və müharibənin ciddi ziyan vurduğu digər şəhərlərdə bacı-qardaşlara ərzaq, dərman və lazım olan digər əşyalar çatdırmağa müvəffəq olublar. Komitələrin birində xidmət edən qardaş təxminən 2700 təbliğçiyə ərzaq və dərman çatdırır. Bunun üçün o, hər gün 500 kilometrdən çox məsafə qət edir və çoxsaylı hərbi yoxlanış məntəqələrindən keçir.

Komitələr bacı-qardaşları döyüş zonalarından təxliyə etmək üçün nəqliyyat da təşkil edir. Çerniqov şəhərindəki komitələrin birində xidmət edən bir qardaş deyir: «Yaşayış binaları atəşə tutulanda aydın oldu ki, şəhərdə qalmaq çox təhlükəlidir. Elektrik enerjisi və internet kəsilmişdi. Ona görə də ağsaqqallar bombalama zamanı zirzəmilərdə gizlənən təbliğçilərə təxliyə üçün nəqliyyat vasitələrinin gəldiyi barədə məlumat vermək üçün bütün şəhəri gəzməli oldular».

Çerniqovdan bacı-qardaşları təxliyə etmək üçün bir nəqliyyat şirkətinin sahibkarı öz mikroavtobus və avtobuslarını verməyə razılaşdı. O özü şəxsən 254 bacı-qardaşımıza şəhərdən çıxmağa kömək etmək üçün ora düz doqquz reys etdi. Hətta bir dəfə o, avtobusunun keçə bilməsi üçün ağır texnika ilə yolu təmir etdi. Bacı-qardaşlar ona çox minnətdardır.

Bu müharibədə əzizlərini itirənlərin kədərinə biz də şərikik. Ölümün və ağrı-acının olmayacağı haqda Müqəddəs Kitabdakı vədin gerçəkləşəcəyi günü böyük həsrətlə gözləyirik (Vəhy 21:3, 4).

29 mart 2022-ci il tarixinədək Ukraynadakı qardaşlardan aldığımız məlumatları çatdırırıq. Faktiki rəqəmlər daha yüksək ola bilər, çünki ölkənin bütün regionları ilə əlaqə saxlamaq çətindir.

• 17 təbliğçi həlak olub.

• 35 təbliğçi xəsarət alıb.

• 36 313 təbliğçi evlərini tərk edərək ölkənin daha təhlükəsiz ərazilərinə köçüb.

• 114 ev dağılıb.

• 144 evə böyük ziyan dəyib.

• 612 evə cüzi ziyan dəyib.

• 1 ibadət evi dağılıb.

• 7 ibadət evinə böyük ziyan dəyib.

• 23 ibadət evinə cüzi ziyan dəyib.

• Ukraynada 27 Zərərçəkənlərə yardım komitəsi fəaliyyət göstərir.

• 34 739 təbliğçiyə komitələr qalmaq üçün daha təhlükəsiz yerlər tapmağa kömək edib.

• 16 175 təbliğçi başqa ölkələrə qaçıb və onlara oradakı dindaşları yardım göstərir.