Dörd il davam edən mübarizədən və məhkəmə çəkişmələrindən sonra Yehovanın Şahidlərinə Ukraynanın Tetiyev şəhərində yerləşən və onlara məxsus olan ibadət evindən istifadə etməyə icazə verilib. Qardaşlar ibadət evinin tikintisini 2014-cü ilin dekabr ayında bitirsələr də, Dövlət Memarlıq-Tikinti Şurasının daimi müdaxiləsi ucbatından ondan istifadə etmək mümkün deyildi: şura altı dəfə istismar icazəsi verməkdən imtina edib, yığıncağı böyük məbləğdə dəfələrlə cərimə edib və tikintinin başa çatmasına az qalmış hətta tikintiyə verilən icazəni ləğv edib.

10 oktyabr 2018-ci il tarixli qərarı ilə Ukrayna Ali Məhkəməsi qardaşlarımızın tikinti qanunvericiliyini pozmadığını müəyyən edib. Məhkəmə təkrarən qeyd edib ki, ibadət evi tikmək hüququ Avropa İnsan Hüquqları Konvensiyası ilə qorunur. 28 mart 2019-cu il tarixində Dövlət Memarlıq-Tikinti Şurasına təyin edilmiş yeni şöbə müdiri qardaşlara binanın istismara verilməsinə icazə verib. Yığıncaq elə həmin ay orada ilk görüşünü keçirib.

2019-cu il noyabrın 2-si qardaşlar açıq qapı günü keçirib. Tədbirdə şəhər və rayon rəsmiləri, eləcə də yerli sakinlər iştirak edib. Tetiyev Rayon Dövlət İnzibati İdarəsinin baş memarı Anatoli Fyodoroviç Zavalnyuk deyib: «Siz tikinti və qanun normalarından və təsdiq olunmuş layihədən kənara çıxmamısınız. İbadət evi bu küçəyə və şəhərin bu hissəsinə gözəllik qatır. Gözəl işinizə görə sizə minnətdaram».

Biz Tetiyev şəhərindəki bacı-qardaşlarımızın sevincinə şərikik. Necə də xoşdur ki, indi onlar bu ibadət evindən Yehova Allahımızı tərənnüm etmək və Ona həmdlər ucaltmaq üçün istifadə edəcəklər (Zəbur 69:30).