Asiyada yaşayan Yanmi adlı Yehovanın Şahidi Minji adlı kor bir qadına yolu keçməyə kömək etdi a. Minji ona minnətdarlığını bildirərək dedi: «Çox sağ ol. Allah köməyin olsun!» Sonra Yanmi bacı Minjiyə görüşüb, Müqəddəs Kitabı araşdırmağı təklif etdi. Sonralar Minji dedi ki, o, Allahın əsl xidmətçilərindən ibarət yığıncağı tapmaq üçün hər gün dua edirmiş. Nəyə görə o, belə dua edirdi?

 Minji deyir ki, 2008-ci ildə bir kor rəfiqəsi onu əlillər üçün olan kilsəyə dəvət elədi. Kilsədə moizəyə qulaq asandan sonra Minji keşişdən soruşdu ki, sitatları hansı kitabdan gətirirdi. Keşiş sitatları Allahın həqiqət Kəlamı olan Müqəddəs Kitabdan gətirdiyini dedi. Minjinin ürəyində bu kitabı oxumaq arzusu oyandı. O, Brayl şrifti ilə Çin dilində Müqəddəs Kitab əldə etdi və 32 cildlik bu kitabı altı aya oxuyub qurtardı. Minji Müqəddəs Kitabı oxuduqca belə qənaətə gəldi ki, kilsədə öyrədilən Üç üqnum təlimi yalandır və Allahın adı Yehovadır.

 Minji kilsə üzvlərinin davranışından incidi. O başa düşdü ki, onlar Müqəddəs Kitabda oxuduqlarına uyğun yaşamırlar. Məsələn, hər kəsə təzə yeməklər paylandığı halda korlara artıq qalan yeməkləri verirdilər. Minji bu cür ədalətsizlikdən pərişan oldu və başqa kilsələrə üz tutdu. Elə buna görə də o, həqiqi məsihi yığıncağını tapmaq üçün dua edirdi.

 Yanminin xeyirxahlığını görən Minji Müqəddəs Kitabı öyrənmək təklifini qəbul etdi. Sonralar Yehovanın Şahidlərinin ibadət görüşünə gəldi. Minji deyir: «Gəldiyim ilk ibadət görüşü heç vaxt yadımdan çıxmır. Bacı-qardaşlar məni mehribanlıqla salamlayırdılar. Bu mənə çox xoş təsir etmişdi. Gözüm görməsə də, buradakı məhəbbətin riyasız olduğunu hiss edirdim».

 Minji ruhani cəhətdən yaxşı inkişaf edir, müntəzəm olaraq ibadət görüşlərinə gəlirdi. Həmd nəğmələrini oxumağı çox sevirdi. Amma nəğmə kitabı onun bildiyi brayl şriftində olmadığından ona çətin idi. Yığıncaqdakıların köməyi ilə Minji özünə nəğmə kitabı hazırladı. O, 22 saata 151 nəğməni brayl şriftinə çevirdi. 2018-ci ilin aprelində Minji təbliğçi oldu. O, hər ay 30 saat təbliğ edirdi.

 Yanmi bacı Minjiyə vəftizə hazırlaşmağa kömək etmək üçün «Allahın iradəsini yerinə yetirən təşkilat» kitabındakı sualları və ayələri audio yazıya aldı. 2018-ci ilin iyulunda Minji vəftiz olundu. O deyir: «Həmin toplantıda bacı-qardaşların məhəbbəti mənə çox xoş təsir etdi. Göz yaşlarımı saxlaya bilmirdim. Artıq mən də Allahın həqiqi yığıncağının bir parçası idim» (Yəhya 13:34, 35). İndi Minji özü də vaxtilə ona göstərilən məhəbbəti başqalarına göstərməyə əzmlidir və tamvaxtlı müjdəçi kimi xidmət edir