2016-cı il noyabr ayının sonlarında İtaliyanın şimalında yağan güclü yağışlardan sonra Monkalieri şəhərinin cənubunda yerləşən bəzi kəndlər suyun altında qalmışdı. Bəzi yerlərdə suyun səviyyəsi 1,6 metrə çatırdı. Bir qəzetdə bu hadisə haqda belə deyilirdi: «Su heç kəsə və heç nəyə rəhm etmədi». Təxminən 1500 sakin dərhal yerli dövlət işçiləri tərəfindən təxliyyə edildi. Xilasetmə qrupunun cəld davranması sayəsində heç bir ölüm halı aşkar edilmədi. Bununla belə, bir çox ailələrə böyük maddi zərər dəydi.

Yerli Yehovanın Şahidlərinin briqadası dərhal hərəkətə keçdi. Onlar zərərçəkənlərə yardım göstərmək üçün əllərinə bel götürüb onların evlərini çirkabdan təmizlədi, həmçinin mebel və şəxsi əşyaları çıxardılar. Yehovanın Şahidlərindən ibarət bir qrup avadanlıqları və isti yeməkləri daşıyarkən bağlı yola çıxdı. Bu zaman hökumət işçiləri köməyə ehtiyacı olan bir ailəyə yardım etmələri üçün onlara həmin yoldan keçməyə icazə verdi.Yehovanın Şahidlərindən ibarət könüllülər öz dindaşlarına və digər dinin nümayəndəsi olan qonşulara yardım göstərdilər.

Məsələn, bir hündür binanın zirzəmisini tamamilə su basmışdı. Xilasetmə qrupu suyu boşaldandan sonra Yehovanın Şahidlərindən ibarət böyük briqada Antonio adlı dindaşlarına və onun ailəsinə zirzəmini çirkabdan təmizləməyə kömək etdi. Sonra isə bu könüllülər binanın digər sakinlərinə yardım etdilər. Onlar əl-ələ verib cəmi bir neçə saatın içində binanın zirzəmisini başdan-ayağa təmizlədilər. Hamı onlara bu köməyə görə minnətdarlıq etdi. Həmin binada yaşayan Viviana adlı bir qadın Antonionun həyat yoldaşına yaxınlaşıb minnətdarlığını bildirəndə göz yaşlarını saxlaya bilmədi və dedi: «Xahiş edirəm, bizim adımızdan qardaşlarınıza təşəkkür edin. Siz, həqiqətən də, qeyri-adi insanlarsınız!»

Daşqından xüsusi zərər görmüş bir kənddə sakinlər Yehovanın Şahidlərinin briqadasının təbii fəlakətdən zərərçəkənlərə necə yardım etdiyini müşahidə edirdilər. Bu, onlardan bəzilərinə elə güclü təsir etmişdi ki, onlar yardım etmək üçün könüllülərə qoşulmuş və briqada tərəfindən verilən göstərişlərə canla-başla riayət etmişdilər.

Bir kişinin evinə güclü ziyan dəymiş, qarajı çirkabla dolmuşdu. O, səkkiz Yehovanın Şahidinin 4 saat dayanmadan onun qarajını necə təmizlədiyini görəndə heyrətə gəlmişdi. O, işçilərdən bəzilərini qucaqlayaraq minnətdarlığını bildirmiş və onlara «əvəzedilməz yardım»ları üçün təşəkkür mesajı yazmışdı.

Bir Yehovanın Şahidi deyir: «Biz Yehovanın Şahidi olmayan bir neçə insana yardım etdik. Onlardan çoxunun 80-dən yuxarı yaşı var idi. Bəziləri onlara etdiyimiz köməyə görə minnətdarlıqlarını göz yaşları ilə dilə gətirirdilər». Yerli Katolik kilsəsinin üzvü olan bir qonşu göstərdikləri yardıma görə Yehovanın Şahidlərinə minnətdarlığını bildirib demişdi: «Fərqli dinlərin nümayəndəsi olsaq da, bir-birimizə kömək əli uzatmağımız çox gözəldir!» Başqa bir kişi isə demişdi: «Heyif ki, sizi yalnız bazar günləri insanların qapılarını döyən biri kimi tanıyırlar, başqalarına yardım əli uzadan insanlar kimi yox».