Мәсихтең киләсәктә ерҙә йәшәүселәрҙе хөкөм итергә киләсәге хаҡында Изге Яҙмала бер нисә тапҡыр әйтелә a. Мәҫәлән, Матфай 25:31—33-тә шулай яҙылған:

 «Әҙәм улы [Ғайса Мәсих], бөтә фәрештәләре менән үҙенең данында килгәс, шөһрәтле тәхетенә ултырыр. Уның алдына бөтә халыҡтарҙы йыйырҙар, һәм ул, көтөүсе һарыҡтарҙы кәзәләрҙән айырған шикелле, кешеләрҙе ике төркөмгә бүлер. Һарыҡтарҙы ул — үҙенең уң яғына, ә кәзәләрҙе һул яғына ҡуйыр».

 Был хөкөм итеү ваҡыты кешелек тарихында әлегә тиклем бер ҡасан да булмаған «бөйөк афәттең» өлөшө буласаҡ. Афәттең юғары нөктәһе — Армагеддон һуғышы (Матфай 24:21; Асылыш 16:16). Изге Яҙмала Мәсихтең дошмандары кәзәләр итеп һүрәтләнә. Улар «язаға, мәңгелек һәләкәткә дусар ителер» (2 Фессалоникаларға 1:9; Асылыш 19:11, 15). Ә Мәсихтең һарыҡтар менән сағыштырылған тоғро хеҙмәтселәре «мәңгелек тормош алыр» (Матфай 25:46).

Мәсих ҡасан килер?

 Ғайса «ул көндө һәм сәғәтте... бер кем дә белмәй» тип әйткән (Матфай 24:36, 42; 25:13). Әммә ул үҙенең килеү осоро алдынан күҙәтергә мөмкин булған билдәне тасуирлап биргән. Был билдә бер нисә өлөштән тора (Матфай 24:3, 7—14; Лука 21:10, 11).

Мәсих рухи тәндә йә физик тәндә киләсәкме?

 Ғайса рухи тәндә терелтелгән булған, шуға күрә ул кеше кеүек физик тәндә түгел, ә рухи шәхес булып киләсәк (1 Коринфтарға 15:45; 1 Петр 3:18). Шунлыҡтан, Ғайса үлеренән бер көн алда илселәренә шундай һүҙҙәр әйтә алған: «Тағы аҙ ғына ваҡыт үткәс, донъя Мине күрмәйәсәк» (Яхъя 14:19).

Мәсихтең килеү осоро хаҡында яңылыш фекерҙәр

 Яңылыш фекер. 2 Яхъя 7-ләге һүҙҙәр Ғайсаның физик тәндә килеүен күрһәтә.

 Факт. Изге Яҙмалағы аятта шулай яҙылған: «Ғайса Мәсихтең ысын кеше булараҡ килеүен инҡар иткән күп ялғансылар донъяға сыҡты» (2 Яхъя 7).

 Илсе Яхъя көндәрендә ҡайһы берәүҙәр Ғайсаның ергә кеше һымаҡ килеүен танымағандар. Ундай кешеләр гностиктар тип аталған. 2 Яхъя 7-ләге һүҙҙәр ошо ялған ҡарашты кире ҡағыр өсөн яҙылған.