Изге Яҙманы уҡыу һеҙҙә ниндәй хистәр уятыр? Күңелһеҙ йә дәртләндергес хистәрме? Күп нәмә һеҙ ҡулланған ысулдарға бәйле. Изге Яҙманы уҡыу ҡыҙыҡлыраҡ булһын һәм күберәк шатлыҡ килтерһен өсөн нимә эшләргә? Әйҙәгеҙ, быны ҡарап сығайыҡ.

Заманса тел менән яҙылған һәм ышанысҡа лайыҡ тәржемәне һайлағыҙ. Аңлауы ауыр булған йә боронғо һүҙҙәр менән яҙылған тәржемәне уҡыу шатлыҡ килтермәй. Шуға күрә Изге Яҙманың аңлайышлы һәм йөрәккә тәьҫир итерлек тәржемәһен һайлағыҙ. Әммә шул уҡ ваҡытта ул теүәл булырға тейеш *.

Яңы технологиялар ҡулланығыҙ. Бөгөн Изге Яҙма баҫма китап рәүешендә генә түгел, ә электрон форматта ла бар. Ҡайһы бер Изге Яҙма китаптарын онлайн уҡырға йә үҙ компьютерығыҙға, планшет йә кеҫә телефонына күсереп алырға була. Ундай Изге Яҙма китаптарының ҡайһы берҙәрендә өҫтәмә функциялар ҙа бар. Ул функциялар ярҙамында кәрәкле бер тема буйынса төрлө шиғырҙарҙы тиҙ генә ҡарап була һәм хатта бер нисә тәржемәне бер-береһе менән сағыштырып була. Ә инде уҡыуға ҡарағанда тыңларға нығыраҡ яратаһығыҙ икән, ул саҡта аудио форматтағы Изге Яҙманы ҡулланып була. Күп кешеләр шундай аудиояҙмаларҙы эшкә йәмәғәт транспортында барғанда, кер йыуғанда йә тыңларға мөмкинселек биргән башҡа эш менән булышҡанда тыңларға ярата. Бәлки, һеҙгә лә үҙегеҙ өсөн  уңайлы тип тапҡан ысулдарҙың береһен ҡулланып ҡарарғалыр?

Изге Яҙманы тикшерер өсөн ҡоралдар ҡулланығыҙ. Изге Яҙманы тикшереү өсөн тәғәйенләнгән ҡоралдарҙы ҡулланыу уҡыуҙан күберәк файҙа алырға ярҙам итә. Мәҫәлән, Изге Яҙмала тасуирланған ерҙәрҙең карталары бар. Улар һеҙгә уҡыған ваҡиғаларҙың ҡайһы ерҙә булғанын белергә һәм шул ваҡиғаларҙы күҙ алдына килтерергә ярҙам итер. Төрлө мәҡәләләр ярҙамында Изге Яҙманың күп кенә өлөштәрен тикшереп була. Шундай мәҡәләләрҙе һеҙ ошо брошюрала һәм сайтыбыҙҙағы «Изге Яҙма тәғлимәттәре» тигән һалынмала (тат.) таба алаһығыҙ.

Төрлө ысулдар ҡулланығыҙ. Изге Яҙманы башынан аҙағына тиклем уҡып сығыу һеҙҙе ҡурҡытһа, уны үҙегеҙгә оҡшаған өҙөктән уҡый башлағыҙ. Изге Яҙмала тасуирланған билдәле шәхестәр тураһында күберәк белергә теләһәгеҙ, уларға ҡағылышлы өҙөктәрҙе уҡығыҙ. (« Изге Яҙмала тасуирланған кешеләр тураһында күберәк белегеҙ» тигән рамканы ҡарағыҙ.) Ә, бәлки, һеҙ Изге Яҙманы темалар буйынса йә хронологик тәртиптә уҡырға теләрһегеҙ. Шул ысулдарҙың береһен ҡулланып ҡарағыҙ.