Етәксе кәңәшмәнең яңы ағзаһы
ШАРШАМБЫ көнө, 2018 йылдың 24 ғинуарының иртәһендә Ҡушма Штаттар һәм Канадалағы Вефиль ғаиләләре бик шатлыҡлы хәбәр ишеткән: Йәһүә шаһиттарының Етәксе кәңәшмәһенә Кеннет Кук ҡәрҙәш ҡушылған.
Кук ҡәрҙәш Пенсильвания штатында (АҠШ) тыуып үҫкән. Ул хәҡиҡәтте мәктәпте тамамлар алдынан ғына синыфташынан ишеткән һәм 1980 йылдың 7 июнендә һыуға сумдырылған. 1982 йылдың 1 сентябрендә Кук ҡәрҙәш пионер хеҙмәтен башлаған, ә ике йылдан һуң, 1984 йылдың 12 октябрендә Уолкиллдағы (Нью-Йорк) Вефилдә хеҙмәт итә башлаған.
Киләһе 25 йыл Кук ҡәрҙәш типографияла һәм Вефиль бюроһында төрлө вазифалар башҡарған. 1996 йылда ул Джейми исемле апай-ҡәрҙәшкә өйләнгән, һәм Джейми ла уның менән бергә Уолкиллдағы Вефилдә хеҙмәт итә башлаған. 2009 йылдың декабрь айында уларҙы Паттерсондағы (Нью-Йорк) Күҙәтеү манараһының өйрәтеү үҙәгенә күсергәндәр. Унда Кук ҡәрҙәш Хаттар бүлегендә хеҙмәт итергә билдәләнгән. Шунан, Уолкиллға ҡайтып унда бер аҙ хеҙмәт итеп алғас, 2016 йылдың апрелендә Кук ғаиләһе Бруклинға (Нью-Йорк) күсерелгән. Бынан һуң биш ай үтеүгә уларҙы Уорвиктағы (Нью-Йорк) баш идаралыҡҡа ебәргәндәр. Ә 2017 йылдың ғинуарында Кук ҡәрҙәш Етәксе кәңәшмәнең Яҙыу комитетына ярҙамсы итеп билдәләнгән.