1 Яхъя 1:1—10
1 Беҙ һеҙгә тормош һүҙен килтереүсе тураһында яҙабыҙ. Ул баштан уҡ булған, беҙ уны ишеттек, үҙ күҙҙәребеҙ менән күрҙек, күҙәттек һәм уға ҡулдарыбыҙ менән ҡағылдыҡ.
2 (Эйе, мәңгелек тормош беҙгә асыҡ күрһәтелде, беҙ уны күрҙек һәм уның тураһында һеҙгә шаһитлыҡ ҡылабыҙ һәм һөйләйбеҙ. Был мәңгелек тормош — Атанан, һәм ул беҙгә асыҡ итеп күрһәтелде.)
3 Беҙ Ата һәм уның Улы Ғайса Мәсих менән берҙәмлектә* булған кеүек, һеҙ ҙә беҙҙең менән берҙәмлектә булһын өсөн, беҙ һеҙгә ишеткән-күргәндәребеҙ тураһында һөйләйбеҙ
4 һәм, бөтәбеҙҙең дә ҡыуанысы тулы булһын өсөн, һеҙгә ошоларҙы яҙабыҙ.
5 Бына беҙ Ғайсанан ишеткән һәм һеҙгә иғлан иткән хәбәр: Алла — ул яҡтылыҡ һәм унда һис ниндәй ҡараңғылыҡ юҡ.
6 Әгәр ҙә: «Беҙ уның менән берҙәмлектә», — тип әйтәбеҙ, ә үҙебеҙ ҡараңғылыҡта йөрөйбөҙ икән, беҙ алдайбыҙ һәм хәҡиҡәт буйынса йәшәмәйбеҙ.
7 Әгәр инде, Алла яҡтылыҡта булған кеүек, беҙ ҙә яҡтылыҡта йөрөһәк, тимәк, беҙ бер-беребеҙ менән берҙәмлектә һәм уның Улы Ғайсаның ҡаны беҙҙе һәр төрлө гонаһтан таҙарындыра.
8 Әгәр: «Гонаһыбыҙ юҡ», — тип әйтәбеҙ икән, беҙ үҙ-үҙебеҙҙе алдайбыҙ һәм беҙҙә хәҡиҡәт юҡ.
9 Ә гонаһтарыбыҙҙы таныйбыҙ икән, Алла гонаһтарыбыҙҙы кисереп, беҙҙе һәр төрлө яуызлыҡтан таҙарындырыр, сөнки ул тоғро һәм ғәҙел*.
10 Әгәр: «Беҙ гонаһ ҡылманыҡ», — тип әйтәбеҙ икән, Алланы ялғансы итәбеҙ һәм беҙҙә уның һүҙе юҡ.