1. Аллаға нисек дөрөҫ итеп табынырға икәнен беҙгә кем әйтә ала?

ДИНДӘРҘЕҢ күбеһе, беҙ Алла тураһында хаҡ һүҙҙәр һөйләйбеҙ, тип раҫлай. Ләкин бының булыуы мөмкин түгел, сөнки улар төрлөһө төрлөсә өйрәтә. Улайһа, Аллаға нисек дөрөҫ итеп табынырға икәнен ҡайҙан белергә? Был хаҡта Йәһүә Алла үҙе генә дөрөҫөн әйтә ала.

2. Аллаға нисек дөрөҫ итеп табынырға икәнен ҡайҙан белергә?

² Беҙ уға нисек дөрөҫ итеп табынырға икәнен белһен өсөн, Йәһүә Изге Яҙманы биргән. Шуға күрә уны өйрәнеүегеҙҙе дауам итегеҙ. Изге Яҙманы аңларға һеҙгә Алла үҙе ярҙам итәсәк, сөнки ул һеҙҙе ярата һәм тормошоғоҙҙоң яҡшырыуын теләй (Ишағыя 48:17).

3. Алла беҙҙән нимә көтә?

³ Ҡайһы берәүҙәр, бөтә диндәр ҙә Аллаға алып бара, ти, әммә Ғайса пәйғәмбәр улай тип өйрәтмәгән. Ул былай тигән: «Күктәр Батшалығына: „Хужам! Хужам!“ — тип Миңә әйткән һәр кем түгел, ә Күктәге Атамдың ихтыярын үтәгән кеше генә инәсәк». Шуға күрә Алланың ихтыяры ниҙән тора икәнен белергә һәм уны үтәргә кәрәк. Был бик тә мөһим, сөнки Аллаға буйһонмаған кешеләрҙе Ғайса «яуызлыҡ ҡылыусылар», йәғни енәйәтселәр менән сағыштырған (Матфей 7:21—23).

4. Алла ихтыярын үтәү хаҡында Ғайса нимә тигән?

⁴ Шулай ҙа Ғайса, Алла ихтыярын үтәү еңел булмаҫ,  тип киҫәткән. Ул былай тип аңлатҡан: «Тар ҡапҡанан инегеҙ! Һәләкәткә алып барған ҡапҡа киң һәм юлы иркен. Күптәр шул ҡапҡанан инә лә инде. Ә тормош ҡапҡаһы тар һәм унда илтеүсе юл ҡыҫынҡы. Уны аҙҙар ғына таба» (Матфей 7:13, 14). Ҡыҫынҡы юл, йәғни Аллаға дөрөҫ итеп табыныу, мәңгелек тормошҡа алып бара. Ә киң юл, йәғни ялған табыныу, үлемгә илтә. Әммә Йәһүә беҙҙең беребеҙҙең дә үлеүен теләмәй. Шуға күрә ул һәр кешегә лә уның хаҡында белеү мөмкинлеге бирә (2 Петр 3:9).

5. Аллаға дөрөҫ итеп табыныусыларҙы нисек танырға?

⁵ Аллаға дөрөҫ итеп табыныусыларҙы нисек танырға һуң? Ғайса аңлатыуынса, быны уларҙың нимәгә ышаныуына, ниндәй эштәр ҡылыуына ҡарап, белергә була. «Һеҙ уларҙы ҡылған ғәмәлдәренә ҡарап танырһығыҙ... Һәр яҡшы ағас яҡшы емеш бирә, ә һәр насар ағас насар емеш бирә», — тигән ул (Матфей 7:16, 17). Был һүҙҙәр, Аллаға табыныусылар — камил кешеләр, тигәнде аңлатмай. Әммә Алланың хеҙмәтселәре ул ҡушҡанса эш итергә тырыша. Әйҙәгеҙ, Аллаға дөрөҫ итеп табыныусыларҙы нисек танырға икәнен ҡарайыҡ.

6, 7. Ни өсөн хаҡ ғибәҙәт Изге Яҙмаға нигеҙләнә? Ғайса беҙгә ниндәй өлгө ҡалдырған?

⁶ Табыныуыбыҙ Изге Яҙмаға нигеҙләнергә тейеш. Инжилдә былай тиелә: «Изге Яҙма тотош Алла тарафынан рухландырылған һәм өйрәтеү, фашлау, төҙәтеү, хаҡ тормош өсөн тәрбиәләүгә файҙалы, шулай итеп, Алла кешеһе барыһына ла маһир һәм бөтөн яҡшы эшкә лә әҙер» (2 Тимофейға 3:16, 17). Илсе Павел Алла хеҙмәтселәренә былай тигән: «Беҙҙән ишеткән  Алла һүҙен кешенән килгән хәбәр итеп түгел, ә ысынында нисек булһа, шул көйө — Алла һүҙе итеп ҡабул итеүегеҙ өсөн дә Аллаға һәр ваҡыт рәхмәт әйтәбеҙ» (1 Фессалоникаларға 2:13). Эйе, хаҡ ғибәҙәт кеше фекерҙәренә, йолаларға, ғөрөф-ғәҙәттәргә һәм башҡа шундай нәмәләргә түгел, ә Алла Һүҙенә — Изге Яҙмаға нигеҙләнгән.

⁷ Ғайса пәйғәмбәр һәр ваҡыт Алла Һүҙенә нигеҙләнеп өйрәткән. (Яхъя 17:17-не уҡығыҙ.) Ул һөйләгәндә йыш ҡына Изге Яҙмала әйтелгәндәрҙе ҡулланған (Матфей 4:4, 7, 10). Алланың ысын хеҙмәтселәре, унан үрнәк алып, тик Изге Яҙмаға ғына нигеҙләнеп өйрәтә.

8. Йәһүәгә табыныу тураһында әйткәндә, Ғайса нимәгә өйрәткән?

⁸ Беҙ тик Йәһүәгә генә табынырға тейеш. Зәбур китабында: «Кешеләр һинең исемең Йәһүә икәнлеген, һинең бөтә ер өҫтөнән берҙән-бер Аллаһы Тәғәлә икәнлегеңде белһен ине», — тиелә (Зәбур 83:18). Ғайса кешеләрҙең кем ысын Алла икәнен теүәл белеүен теләгән һәм уларға Алла исеме хаҡында һөйләгән. (Яхъя 17:6-ны уҡығыҙ.) Ул былай тигән: «[Йәһүә, ЯДТ] Аллаңа табын һәм бары Уға ғына хеҙмәт ит» (Матфей 4:10). Алла хеҙмәтселәре булараҡ беҙ тап шулай эшләйбеҙ ҙә. Тик Йәһүәгә генә ғибәҙәт ҡылабыҙ, уның исемен ҡулланабыҙ. Беҙ шулай уҡ башҡаларға Алланың исеме һәм уның кешеләр өсөн киләсәктә ниҙәр эшләйәсәге хаҡында һөйләйбеҙ.

9, 10. Беҙ бер-беребеҙгә нисек яратыу күрһәтәбеҙ?

⁹ Беҙ бер-беребеҙҙе ысын күңелдән яратырға тейеш. Ғайса үҙ шәкерттәрен бер-береһен яратырға өйрәткән. (Яхъя 13:35-те уҡығыҙ.) Сығышыбыҙға, мәҙәниәтебеҙгә, баймы, ярлымы булыуыбыҙға ҡарамай,  беҙ бер-беребеҙҙе ҡәрҙәштәрсә яратабыҙ (Колосстарға 3:14). Шуға күрә беҙ һуғышҡа бармайбыҙ һәм кеше үлтермәйбеҙ. Изге Яҙмала былай тиелә: «Алла балалары һәм Иблис балалары былай таныла: хаҡ эш итмәгән, шулай уҡ үҙенең имандашын яратмаған һәр кем Алланан түгел». Унда шулай уҡ: «Беҙ бер-беребеҙҙе яратырға тейешбеҙ. Беҙгә Иблистән булған һәм үҙенең ҡустыһын үлтергән Ҡабил кеүек булырға ярамай», — тиелә (1 Яхъя 3:10—12; 4:20, 21).

¹⁰ Беҙ, бер-беребеҙгә ярҙам итер өсөн, үҙ ваҡытыбыҙҙы, көсөбөҙҙө һәм аҡсабыҙҙы сарыф итергә әҙер (Еврейҙарға 10:24, 25). Беҙ «һәр кешегә» изгелек ҡылабыҙ (Галаттарға 6:10).

11. Ни өсөн Ғайса аша ғына ҡотолоп була?

¹¹ Беҙ Ғайсаға буйһонабыҙ, сөнки уның аша ғына ҡотолоп була. Инжилдә былай тиелә: «Башҡа бер кемдән дә ҡотолоу килмәҫ. Ер йөҙөндә кешеләргә бирелгән исемдәр араһында беҙҙе ҡотҡара алырҙай бүтән исем юҡ» (Ғәмәлдәр 4:12). Бишенсе бүлектән белеүебеҙсә, Йәһүә Ғайсаны, үҙ ғүмерен биреп кешеләрҙе йолоп алһын өсөн, ергә ебәргән (Матфей 20:28). Өҫтәүенә, Йәһүә Ғайсаны, ер менән идара итһен тип, Батша итеп ҡуйған. Бына ни өсөн, Изге Яҙмала, мәңге йәшәргә теләһәк, Ғайсаға буйһонорға кәрәк, тип әйтелә. (Яхъя 3:36-ны уҡығыҙ.)

12. Ни өсөн беҙ сәйәси эштәрҙә ҡатнашмайбыҙ?

¹² Беҙ сәйәсәттә ҡатнашмайбыҙ. Ғайса сәйәси эштәрҙә ҡатнашмаған. Уны хөкөм иткәндә, ул Рим идарасыһы Пилатҡа яуап биреп: «Минең Батшалығым был донъяныҡы түгел», — тигән. (Яхъя 18:36-ны уҡығыҙ.) Беҙ ҙә, Ғайса һымаҡ, Алла Батшалығына тоғро. Шул сәбәптән, ҡайҙа ғына йәшәһәк тә, сәйәсәттә  ҡатнашмайбыҙ. Әммә Изге Яҙмала «хакимлыҡ иткән етәкселәргә» буйһонорға ҡушыла (Римдарға 13:1). Беҙ үҙебеҙ йәшәгән илдең ҡанундарына буйһонабыҙ. Әлбиттә, ниндәйҙер ҡанун Алла әмерҙәренә ҡаршы килһә, беҙ илселәр шикелле эш итәбеҙ. Улар былай тигән: «Кешеләргә ҡарағанда Аллаға нығыраҡ буйһонорға кәрәк» (Ғәмәлдәр 5:29; Марк 12:17).

13. Беҙ нимә тураһында вәғәзләйбеҙ?

¹³ Беҙ бөтә проблемаларҙы тик Алла Батшалығы ғына хәл итәсәгенә ышанабыҙ. Ғайса, «Алла Батшалығы хаҡындағы ошо Һөйөнөслө Хәбәр» бөтә донъяла иғлан ителер, тип әйткән. (Матфей 24:14-те уҡығыҙ.) Алла Батшалығы бирә алғанды башҡа бер ниндәй хөкүмәт тә бирә алмай (Зәбур 146:3). Ғайса Батшалыҡ хаҡында былай тип доға ҡылырға ҡушҡан: «Һинең Батшалығың килһен. Күктәге кеүек, ерҙә лә ихтыярың үтәлһен» (Матфей 6:10). Изге Яҙмала, Алла Батшалығы бөтә кешелек хөкүмәттәрен юҡ итәсәк, ә «үҙе мәңге торасаҡ», тип пәйғәмбәрлек ителә (Данил 2:44).

14. Һеҙҙеңсә, кем Аллаға дөрөҫ итеп табына?

¹⁴ Ә хәҙер, уйлап ҡарағыҙ: кем Изге Яҙмаға ғына нигеҙләнеп өйрәтә? Кем кешеләргә Алла исеме тураһында һөйләй? Кемдәр бер-береһен эскерһеҙ ярата һәм Ғайса аша ғына ҡотолоп була икәненә ышана? Кем сәйәсәттә ҡатнашмай? Кем, Алла Батшалығы ғына бөтә проблемаларҙы хәл итәсәк, тип иғлан итә? Тик Йәһүә шаһиттары ғына (Ишағыя 43:10—12).

15. Алла табыныуыбыҙҙы ҡабул итһен өсөн, беҙ нимә эшләргә тейеш?

¹⁵ Аллаға ышаныу ғына әҙ. Хатта ендәр ҙә Алланың барлығына ышана, әммә улар уға буйһонмай (Яҡуб  2:19). Алла табыныуыбыҙҙы ҡабул итһен өсөн, уның барлығына ышаныуҙан тыш беҙ ул әйткәнде эшләргә тейеш.

16. Ни өсөн беҙгә ялған дин менән бәйле бөтә нәмәне кире ҡағырға кәрәк?

¹⁶ Алла табыныуыбыҙҙы ҡабул итһен өсөн, беҙ ялған динде кире ҡағырға тейеш. Ишағыя пәйғәмбәр былай тип яҙған: «Нәжес нәмәләргә ҡағылмағыҙ! ...Улар араһынан сығығыҙ, үҙегеҙҙе таҙа килеш һаҡлағыҙ» (Ишағыя 52:11; 2 Коринфтарға 6:17). Йәһүә ялған динде нәжес тип һанай. Бына ни өсөн беҙгә ялған дин менән бәйле бөтә нәмәне кире ҡағырға кәрәк.

17, 18. «Бөйөк Вавилон» нимә ул, һәм ни өсөн унан сығырға кәрәк?

¹⁷ Ниндәй динде ялған тип атап була? Алла Һүҙенә ҡаршы килгән табыныуға өйрәткән һәр ҡайһы динде. Изге Яҙма бөтә ялған диндәрҙе «Бөйөк Вавилон» тип атай (Асылыш 17:5). Ни өсөн? Туфандан һуң Вавилон тигән ҡалала күп ялған тәғлимәт башланғыс алған. Шул тәғлимәттәр бөтә донъяға таралған. Мәҫәлән, Вавилонда йәшәгән кешеләр өс илаһтан торған төркөмгә табынған. Бөгөн дә күп диндәрҙә Алла — ул Троица, йәғни Алла өс шәхестән тора, тип өйрәтәләр. Әммә Изге Яҙмала, берҙән-бер Алла бар, ул — Йәһүә, ә Ғайса иһә — уның Улы, тип ап-асыҡ әйтелә (Яхъя 17:3). Вавилонда йәшәүселәр шулай уҡ, кеше үлгәндән һуң, уның йәне йәшәүен дауам итә һәм утлы тамуҡҡа эләгергә мөмкин, тип ышанған. Әммә был ялған. (14, 17-се һәм 18-се ҡушымталарҙы ҡарағыҙ.)

¹⁸ Алла вәғәҙә итеүенсә, оҙаҡламай бөтә ялған диндәр юҡ ителәсәк (Асылыш 18:8). Шуға күрә уларҙы ҡалдырыу үтә мөһим. Йәһүә Алла һуң булмаҫ борон ялған диндән сығыуығыҙҙы теләй (Асылыш 18:4).

19. Йәһүәгә хеҙмәт итә башлаһағыҙ, ул һеҙҙең хаҡта нисек ҡайғыртыр?

 ¹⁹ Һеҙ, ялған динде ҡалдырып, Йәһүәгә хеҙмәт итә башлағас, дуҫтарығыҙ йә туғандарығыҙ ҡарарығыҙҙы аңламаҫҡа һәм хатта ҡаршы килергә мөмкин. Ләкин Йәһүә һеҙҙе ташламаясаҡ. Һеҙ төрлө миләттән, бер-береһен эскерһеҙ яратҡан, миллионлаған ҡәрҙәштәрҙән торған ғаиләгә ҡушылырһығыҙ, һәм Алланың яңы донъяһында йәшәргә өмөтөгөҙ булыр (Марк 10:28—30). Элек ҡаршы килгән дуҫтарығыҙ йә туғандарығыҙ ҙа, бәлки, һуңыраҡ Изге Яҙманы өйрәнергә ҡарар итер.

20. Ни өсөн Йәһүәгә дөрөҫ итеп табыныу мөһим?

²⁰ Тиҙҙән Алла бөтә яуызлыҡты бөтөрәсәк, һәм уның Батшалығы ер өҫтөнән идара итә башлаясаҡ (2 Петр 3:9, 13). Был иҫ киткес ваҡыт буласаҡ! Һәр кеше Йәһүәгә ул теләгәнсә табыныр. Шуға күрә бөгөндән үк Йәһүәгә дөрөҫ итеп табына башлағыҙ!