Apaké cening nawang apa rahasia ento?​— * Adanina rahasia krana tusing ada anak nawang unduké ento. Cakepan Suci ngajahang ada rahasia suci istimewa ané madan ”pepingitan”. Orahanga suci krana asalné uli Tuhan. Para malaékat masih penasaran tekén unduké ento. Apaké cening masih edot nawang?​—

Ipidan, Tuhan ngaé manusa pertama eluh lan muani. Ané eluh madan Hawa lan ané muani madan Adam. Tuhan ngemaang umah ané luung ané madan Taman Eden. Yén Adam lan Hawa taat tekén Tuhan, ipun lan panak-panakné bisa ngubah guminé dadi tongos ané luung gati ané madan Pirdaus. Ipun dadi ngoyong di tamanné ento saterusné. Kéwala apa ané jalanina baan Adam lan Hawa?​—

Adam lan Hawa tusing taat tekén Tuhan, ento krana jani iraga tusing idup di Pirdaus. Kéwala, Tuhan majanji di masa depan Ida lakar ngubah guminé ené buin dadi luung, lan onyang anaké bisa idup langgeng lan bagia. Kéngkén carané Tuhan ngaé unduké ento? Suba ribuan taun, tusing ada ané nawang jawabanné. Ento enu rahasia.

Dugas Yesus teka ka guminé, ia ngorahin rahasiané ento tekén anak lenan. Rahasiané ento unduk Kerajaan Tuhan ané lakar ngubah guminé dadi pirdaus. Yesus ngorahin anaké ngastawa, nunas apang Kerajaanné ento énggal teka.

Apaké cening edot nawang rahasiané ené?— Ingetang tuah anak ané taat ané lakar ngoyong di Pirdaus. Di Cakepan Suci liu ada kisah anak eluh lan muani ané taat tekén Yehuwa. Apaké cening edot nawang kisahné?— Mai alihin nyén dogén ento lan kéngkén carané apang iraga bisa nuutin ia.