Apaké cening ningalin anak eluh di gambaré ené?​— Ia panakné Yepta. Cakepan Suci tusing nyatet nyén adané, kéwala iraga nawang yén ia ngranaang atin bapané lan Yehuwa seneng. Mai plajahin kisahné Yepta lan panakné.

Yepta ento anak jemet lan sesai ngajahin panakné unduk Yehuwa. Ia masih anak muani ané siteng lan pamimpin ané duweg. Ento krana, bangsa Israel milih ia buat mimpin ipun perang nglawan musuh-musuhné.

Yepta ngastawa tekén Tuhan ngidih apang menang. Yepta majanji yén ia menang, dugas ia mulih, nyénja ané paling malu pesu uli umahné lakar kaserahang tekén Yehuwa. Anaké ené lakar ngoyong  lan ngayah saumur idupné di tabernakel Tuhan. Ipidan, Tabernakel ento tongos bangsa Israel ngaturang bakti. Akhirné, Yepta menang maperang! Apaké cening nawang nyén ané paling simalu pesu uli umahné dugas Yepta mulih?​—⁠

Ternyata, panakné padidi! Ia ento panak tunggal lan jani Yepta harus ngelasang panakné luas. Ené ngranaang Yepta marasa sebet pesan. Kéwala, ia inget yén ia suba majanji. Lantas, panakné ngomong kéné: ’Bapa, Bapa suba majanji tekén Yehuwa, ané jani isinin janjin Bapané.’

Panakné Yepta masih milu sebet. Di tabernakel, ia sing dadi ngantén lan ngelah panak. Kéwala, ia dot ngisinin janjin bapané lan ngaé atin Yehuwa seneng. Unduké ento lebih penting bandingang tekén ngantén lan ngelah panak. Ento krana ia nyak ngalain umah lan ngoyong di tabernakel saumur idupné.

Menurut cening, Apaké ia ngaénang atin bapané lan Yehuwa seneng?​— Pasti! Yén cening taat lan sayang tekén Yehuwa, cening patuh buka panakné Yepta. Cening masih lakar ngranaang mémé bapané lan Yehuwa seneng pesan.