Menurut cening apaké kéweh nyalanang ané beneh?​— Liu anaké marasa buka kéto. Cakepan Suci nyeritaang unduk anak muani madan Yosia ané marasa kéweh nyalanang ané beneh. Kéwala, ia ngelah timpal-timpal jemet ané nyak nulungin. Mai plajahin unduk Yosia lan timpal-timpalné.

Bapané Yosia madan Amon, raja di Yehuda. Amon raja ané jaat lan nyembah togog. Disubané bapané mati, Yosia dadi raja nganti bapané. Kéwala, dugas ento umurné mara kutus tiban! Menurut cening apaké ia jaat cara bapané?​— Sing, ia tusing jaat!

Yadiapin umurné enu cenik, Yosia nyak taat tekén Yehuwa. Dadiné ia tuah milih matimpal ajak ané nyayangin Yehuwa. Timpal-timpalné ené nulungin Yosia nyalanang ané beneh. Nyén dogén timpal-timpalné Yosia?

Ada timpalné ané madan Sepanya. Sepanya ento nabi ané taén ngemaang  peringatan tekén penduduk Yehuda unduk sengkala apa ané lakar tepukina yén nyembah togog. Yosia nyak ningehang Sepanya lan nyembah Yehuwa, tusing nyembah togog.

Timpalné ané lénan madan Yeremia. Umurné masaih ajak Yosia, tongosné ngoyong mapaekan lan ia matimpal melah. Dugas Yosia mati, Yeremia ngarang lagu buat ngingetang Yosia. Yeremia lan Yosia saling tulungin apang bisa nyalanang ané luung lan taat tekén Yehuwa.

Apa ané bisa cening plajahin uli contoné Yosia?​— Yosia nyak nyalanang ané beneh yapin ia enu cenik. Ia nawang yén ngalih timpal harus ajak ané nyayangin Yehuwa. Pastiang yén cening lakar milih timpal, alih ané nyayangin Yehuwa lan nyak nulungin nyalanang ané beneh!