Dugas nganten, ragané nyumunin ngawangun kluarga ané anyar. Ragané patutné terus nyayangin lan ngormatin mémé bapan ragané, sakéwala jani pasangan ragané ento ané paling penting di idup ragané. Bisa dogén mémé bapan ragané buka dadua kéwéh nerima unduké ené. Sakéwala prinsip Cakepan Suci bisa ngewantu ragané seimbang, ngelah hubungan damai ajak matua sambil ngutsahaang buat ngawangun kluarga.

APA AJAHAN CAKEPAN SUCI: ”Baktija teken meme bapan ceninge.” (Epesus 6:⁠2) Sing dadi soal akuda umuré, ragané perlu terus ngajinin lan ngormatin mémé bapa. Ingetang, yén kurenané masih ngelah mémé bapa ané perlu karunguang. ”Kapitresnane punika nenten iri ati”, eda kanti marasa saingine tekén hubungan kurenané ajak mémé bapané.—⁠1 Korintus 13:4; Galatia 5:26.

ANÉ BISA KAJALANANG:

• Eda kanti ngorahang ”Kluargan adiné terus ngréméhang bli” utawi ”Mémén bliné tusing taén demen ajak apaja ané gaé tiang”

• Tegarangja makeneh uli sudut pandang kurenané

APA AJAHAN CAKEPAN SUCI: ”Anake lanang nilar meme bapanipune, raris nunggil ring somahipune, ngantos ipun sareng kalih dados madewek tunggal.” (Purwakaning Dadi 2:24) Sasuba ragané ngantén, bisa dogen mémé bapan ragané marasa enu ngelah tanggung jawab ngurus ragané. Ipun bisa dogen milu ngurusin urusan kluargan ragané lebian tekén apa ané pantes.

Ragané lan kurenan ragané patut nentuang batas amongkén mémé bapan ragané dadi ikut campur. Suba keto, melahang ngomongang ajak mémé bapané. Dadi ngomong terus terang, kéwala eda kasar. (Pitutur 15:⁠1) Sikap ané rendah hati, alus lan sabar lakar ngawantu ragané adung ajak matua, terus tunjukang ”kapitresnan semetone malantaran saling tulungin.”—⁠Epesus 4:⁠2.

ANÉ BISA KAJALANANG:

• Yén ragané marasa mémé bapan ragané bes liu nyampurin urusan kluargan ragané, omongang ajak kurenan unduké ené yén situasiné suba tenang

• Sepakatin kéngkén caran ragané ajak dadua ngatasin masalah