BAGIAN 7
Carané Ngajahin Pianak
”Sakancan titah-titah sane rauhang tiang ring semeton ring rahinane puniki, sampunang pisan kantos lalianga. Urukangja titah-titahe punika ring oka-okan semetone.” —Pangeling-eling 6:6, 7
Dugas Yehuwa nyumunin ngaé kluarga, Ida ngemaang tugas tekén mémé bapa buat ngajahin pianakné. (Kolose 3:20) Ragané ngelah tanggung jawab buat ngajahin pianak apang nyayangin Yehuwa lan bisa dadi anak ané ngelah tanggung jawab. (2 Timotius 1:5; 3:15) Ragané perlu nawang apa ané ada di atin pianaké. Suba pasti, yén conto ané luung uli ragané padidi penting sajaan. Carané ané paling luung ngajahin Cakepan Suci tekén pianak-pianaké, yéning ajahan Cakepan Suciné ento suba malunan ada di atin ragané.—Kidung 40:8.
1 URUKANG PIANAKÉ APANG NYAK TERBUKA
APA AJAHAN CAKEPAN SUCI: ”Semeton suang-suang mangda gelis mirengang, nanging mangda tan gegison mabaos.” (Yakobus 1:19) Ragané pasti demen yéning pianaké marasa bebas ngomong tekén ragané. Pianaké perlu nawang yén ragané lakar nyak madingehang. Pastiang situasiné jumah tetep damai apang pianaké élah mesuang isin atiné. (Yakobus 3:18) Yén pianaké marasa ragané enggal pedih lan melihang pianak, pasti pianaké lakar tertutup tekén ragané. Sabarja tekén pianak, lan sesai tunjukang yén ragané seken-seken sayang tekén pianak.—Matius 3:17; 1 Korintus 8:1.
ANÉ BISA KAJALANANG:
-
Sediaang waktu yén pianaké makita ngomong
-
Sesainang ngorta ajak pianaké, tusingja dugas ada masalah dogén
2 TEGARANG RESEPANG APA MAKSUD OMONGAN PIANAKÉ
APA AJAHAN CAKEPAN SUCI: ”Resepangja peplajahan ane suba plajahin cening, pedas cening lakar labda karya.” (Pitutur 16:20) Apang nawang perasaan pianaké, tusing cukup tuah ningeh omongané dogén. Biasané pianak demen masadu utawi ngomongang unduk ané tusing sebenehné ada di atiné. ”Satondene cening masaut, melahang malu madingehang. Yening tusing buka keto, cening lakar adanina belog.” (Pitutur 18:13) Edaja enggal gedeg.—Pitutur 19:11.
ANÉ BISA KAJALANANG:
-
Dugas pianaké ngomong, dingehang lan eda nyelag
-
Tegarang ingetang dugas umur ragané patuh cara ia jani, unduk apa ané pentingang ragané
3 TUNJUKANG YÉN RAGANÉ ADUNG
APA AJAHAN CAKEPAN SUCI:”Ih cening, padingehangja raos meme bapan ceninge.” (Pitutur 1:8) Yehuwa suba ngemaang mémé bapa hak nyalanang wewenang tekén pianakné. Ragané patut ngajahin pianaké apang hormat lan taat tekén ragané. (Epesus 6:1-3) Pianak bisa ngrasaang yéning mémé bapané tusing ”saguluk ring bebaosan.” (1 Korintus 1:10) Yén ragané tusing adung, eda édénganga tekén pianaké. Ento bisa nguangin rasa hormat pianak tekén mémé bapa.
ANÉ BISA KAJALANANG:
-
Omongang lan adungang caran ragané ngemaang ukuman tekén pianak
-
Yén ragané ajak dadua ngelah pendapat malénan unduk ngajahin pianak, tegarang pada kenehang sudut pandang masing-masing
4 GAÉ RENCANA
APA AJAHAN CAKEPAN SUCI: ”Ajahinja pianake kenken patutne ia malaksana.” (Pitutur 22:6) Ngajahin pianak tusingja ngidaang langsung berhasil. Ragané perlu ngelatih pianak, rencanaang kéngkén carané ngajahin ipun termasuk carané nyalanang disiplin. (Kidung 127:4; Pitutur 29:17) Ngemaang disiplin tusingja sekedar ngukum, kéwala ngaénang ia ngerti apa alasané ada aturan kéto. (Pitutur 28:7) Kéto masih, ajahin ipun apang demen tekén Sabdan Yehuwa lan ngresepang prinsip-prinsipné. (Kidung 1:2) Ené lakar ngawantu ia ngelah ati nurani ané luung.—Ibrani 5:14.
ANÉ BISA KAJALANANG:
-
Pastiang pianaké nawang yéning Tuhan ento Pribadi nyata ané bisa kapercayain
-
Tulungin ia apang bisa ngelidin bahaya moral cara ané ada di Internet lan jejaring sosial. Ajahin ia carané apang ngejohin para pemangsa seksual
”Ajahinja pianake kenken patutne ia malaksana”
