Tuhan ngundang anak uli negari apaja apang bisa ngastawa tekén Ida. (Kidung 65:⁠2) Sakéwala, Ida tusing madingehang lan nrima sabilang pangastawa. Conto, ada anak ané ngastawa nanging tusing dingehanga krana ia nyakitin kurenané. (1 Petrus 3:⁠7) Dugas anak Israel terus malaksana corah, Tuhan tusing madingehang pangastawané. Dadiné, ngastawa ento kehormatan buat iraga. Samaliha, yapinja gedé pisan dosané, yén ia nyak marubah pangastawané lakar dingehanga.​—Baca Nabi Yesaya 1:​15; 55:⁠7.

Pangastawa ento bagian uli ibadat iraga, dadiné iraga tuah ngastawa tekén Yehuwa, Penciptan iragané. (Matius 4:​10; 6:⁠9) Krana iraga tusing sampurna, sabilang ngastawa patut nganggén adan Yesus, krana ipun mati buat dosa-dosan iraga. (Yohanes 14:⁠6) Yehuwa tusing demen tekén pangastawa ané suba matulis lan ulian apalan. Ida demen tekén pangastawa ané tulus uli atin iragané.​—Baca Matius 6:7; Pilipi 4:​6, 7. 

Penciptan iraga bisa ningehang pangastawa yapinja tusing masuara. (1 Samuel 1:​12, 13) Yehuwa ngundang iraga ngastawa kali kénkénja iraga bisa, misalné, semengan, peteng, satonden madaar lan yéning ngelah pakéweh.​—Baca Kidung 55:22; Matius 15:⁠36.

Ngelah hubungan ané luung ajak Ida tusingja aluh krana iraga idup kakiterin baan anak ané tusing nyalanang kapracayaané, buina liu anak ané ngréméhang janjin Ida unduk kadaméan di guminé. (2 Timotius 3:​1, 4; 2 Petrus 3:​3, 13) Dadiné, iraga saling merluang dukungan uli para semeton.​—Baca Ibrani 10:​24, 25.

 Makumpul bareng-bareng ajak anak ané nunjukang bakti tekén Ida, gedé pengaruhné buat hubungan iraga ajak Tuhan. Pasamuan ibadat Saksi-Saksi Yehuwa nyediaang kesempatan apang iraga bisa kakuatang uli kapracayaan para semeton.​—Baca Roma 1:​11, 12.

Iraga bisa ngelah hubungan ané luung ajak Yehuwa yén seken-seken malajahin Sabdan Ida. Iraga patut ngenehang pitutur, janji lan apa ané suba laksanaang Ida. Yéning iraga sesai ngenehang unduk Yehuwa lan ngastawa, iraga ngancan ngajinin rasa sayang lan kawicaksanan Tuhan.​—Baca Yosua 1:8; Kidung 1:​1-3.

Iraga bisa ngelah hubungan ané luung yén iraga pracaya lan nyalanang kapracayaan iragané tekén Tuhan. Kapracayaan ento buka manusa ané perlu madaar apang tetep idup. Iraga patut terus ngeneh-ngenehang kasujatian ané dadi dasar kapracayaan iragané.​—Baca Matius 4:4; Ibrani 11:​1, 6.

Yehuwa rungu tekén anak ané nunjukang tresna bakti tekén Ida. Ida ngidaang nglindungin ipun uli apaja ané bisa ngusak kapracayaan lan harapan idup langgeng. (Kidung 91:​1, 2, 7-​10) Ida nuturin iraga apang ngejohin pajalan idup ané pelih ané bisa ngusak kesehatan lan rasa bagia iragané. Yehuwa ngajahin iraga jalan idup ané paling luung.​—Baca Kidung 73:​27, 28; Yakobus 4:​4, 8.