Kaat bisu i Miñañ 11:1-47
11 I mbus ngéda, bon ba Israel bobasôna ba bi kodba yak David i Hébrôn,+ ba kal nye le: “Bés ni we, di yé matjél mada.*+
2 To i ngéda Saulô a bé kiñe, wen u bé éga mintôñ mi gwét+ mi Israel.* Yéhôva Nyambe woñ a bi kal we le: ‘U ga tééda litén jem Israel, we ki nyen u ga ane Israel.’”+
3 Ha ni nyen mimañ mi Israel nwominsôna mi bi lo yak Kiñe David i Hébrôn, David a boñ malômbla ni bo i bisu bi Yéhôva. I mbus, ba téé David kiñe Israel,+ inoñnaga ni jam Yéhôva a bi pot ni njel Samuel.+
4 I mbus ngéda, David ni bon ba Israel bobasôna ba ke i Yérusalem, hala wee i Yébus;+ Lôk Yébus+ yon i bé yééne mu nkoñ u.
5 Ndi Lôk Yébus i kahal ndegle David, i kalak nye le: “U ta bé le u jôp munu tison+ ini!” Ndi to hala, David a bi yoñ nkoñ u gwé mapénd ma ngui le Siôn,+ won ba nsébél i len ini le Nkoñ u David.+
6 David a kal le: “Nu ni nu a mba mut bisu i ke jôs Lôk Yébus, a ga yila ñéga* ni ñane.” Yôab,+ man Séruya, nyen a bi ba mut bisu i leñ gwét, jon a yila ñéga.
7 David a bi yééne mu nkoñ u u gwé mapénd ma ngui. Inyu hala nyen ba nsébél wo le Nkoñ u David.
8 A bi oñ mapénd ma tison ni mandap mape bipes gwobisôna, ibôdôl i Milô* letee ni bahoma ba yé mu mapañ; Yôab a bi tibil bipes bi tison bi bi yégle.
9 Hala nyen ngui i David i bé bet ndigi, bet ni bet;+ yak Yéhôva nu mintôñ mi gwét a bé lôñni nye.
10 Bana bon ba bé baane ba mimpémba mi bôt ba gwét ba David, bon ba bi nit ane yé, yak Israel yosôna i bi nit nye; inyu boñ le a yila kiñe inoñnaga ni jam Yéhôva a bi pot inyu Israel.+
11 Môl ma mimpémba mi bôt ba gwét ba David mana: Yasôbéam,+ lok i man Lôk Hakmôn wada. Nyen a bé ane mimpémba mi bôt ba gwét baa.+ Kel yada, a bi nol 300 bôt ni likoñ jé.+
12 I mut a bé noñ ha, a bé Éléazar,+ man Dôdô, man Lôk Ahôhi.+ A bé mu nsoñgi u mimpémba mi bôt ba gwét baa.
13 A bé lôñni David i Pas-Damim,+ i het bôt ba Filistia ba bi kodba inyu jo gwét. Wom u kôn* u bé nyoo; yokel, bôt ba bi ke bôt ba Filistia ngwéé.
14 Ndi nye a bi telep i ñemkété u wom, a sôñ wo. A nol bôt ba Filistia, kayéle Yéhôva a bi yémbél* i nya i mbuma ñañ.+
15 Ikété 30 ma baane ba ntôñ gwét, bôt baa ba bi sôs i hôk liaa i Adulam,+ i homa David a bé; ntôñ gwét u bôt ba Filistia u bak i nsôsôgô* i Réfaim.+
16 David a bé i lisolbene jé, ntôñ gwét wada u bôt ba Filistia u bé i Bétléhém.
17 Kel yada, David a bi bana ngôñ i nyo malép, a kal le: “Éé, ibale me bak to le me nyo malép ma bee i i yé bebee ni nwemel u Bétléhém!”+
18 Ha nyen bo baa ba bi jôp ni ngui i homa ntôñ gwét u bôt ba Filistia u bé, ba ap malép ma bee i i bé bebee ni nwemel u Bétléhém, ba kena mo David; ndi David a tjél nyo mo, a sop mo inyu jôl li Yéhôva.
19 A kal le: “Inyu jôl li Nyambe, me ta bé le me nyo i malép mana! A yé wengoñle me yé i nyo matjél ma bôt bana, ba ba bak le ba nimis niñ+ yap.” Jon a bi tjél nyo mo. I mam mana mon mimpémba mi bôt mini nwo maa mi bi boñ.
20 Abisai,+ manyañ Yôab,+ a bé ane mimpémba mi bôt maa mimpe; kel yada, a bi nol 300 bôt, yak nye a bé yiba ngandak kiki mimpémba mi bôt maa+ mi bisu.
21 Ikété bo baa, nyen a bé yiba iloo bana bo iba, a bak ki ñañe wap; ndi a bi pam bé i likala li mimpémba mi bôt maa mi bisu.
22 Bénaya,+ man Yéhôyada, a bé lôs mut;* a bi boñ mimpémba mi mam i Kabzéel,+ nyen a bi nol bon bôlôm bo iba ba Ariel nu Môab. Nye ki nyen a bi sôs kel yada ikété bee i ngéda libu li lisuni* li bé kwo, a nol mbondo njéé yada.+
23 A nol ki man Égiptô wada nu a bé mbôñgô mut, ntel+ wé u bé dikéñéé di moo ditan.* To hala kiki man Égiptô a bééna likoñ i woo wé, li li bé likeñi kiki kék ba ngwélél inyu bañ mabadô,+ Bénaya a bi ke i jôs nye ni ntoñgo, a kadal likoñ li li bé i woo u man Égiptô, a nol nye ni likoñ+ li.
24 I mimpémba mi mam mini nwon Bénaya, man Yéhôyada, a bi boñ; a bé yiba ngandak kiki mimpémba mi bôt ba gwét maa mi bisu.
25 To hala kiki a bé yiba ngandak iloo mana 30 ma bôt bape, a bi pam bé likala li mimpémba mi bôt ba gwét maa+ mi bisu. Ndi David a bi téé nye le a ane i bôt ba bé tat nye.
26 Mimpémba mi bôt mi mi bé ikété ntôñ gwét mi bé le: Asahel+ manyañ Yôab, Elhanan man Dôdô nu a bé lôl i Bétléhém,+
27 Samôt mut Harôd, Héles mut Pélon.
28 Ira+ man Ikes, mut Tékôa; Abiézer+ mut Anatôt;
29 Sibekai+ man Lôk Husa; Ilai man Lôk Ahôhi;
30 Mahari+ mut Nétôfa; Héled+ man Baana, mut Netôfa;
31 Itai man Ribai nu a bé lôl i Gibéa nu Lôk Benyamin;+ Bénaya mut Piratôn;
32 Hurai nu malép* ma Gaas;+ Abiel mut Bét-Araba;
33 Azmavet mut Bahurim; Éliaba mut Saalbim;
34 bon ba Hasem mut Gizon; Yônatan man Sagé, mut Harar;
35 Ahiam man Sakar, mut Harar; Élifal man Ur;
36 Héfer mut Mékéra; Ahiya mut Pélon,
37 Hézrô mut Karmel; Naarai man Ézbai;
38 Yôel manyañ Natan; Mibhar man Hagri;
39 Zélek man Lôk Amôn; Naharai mut Béérôt, nyen a bé begee bijôl bi gwét bi Yôab man Séruya;
40 Ira man Lôk Yéter; Gareb man Lôk Yéter;
41 Uriya+ man Lôk Hét; Zabad man Alai;
42 Adina man Siza, man Lôk Ruben, ñane wada nu Lôk Ruben, 30 ma bôt ma bé lôñni nye;
43 Hanan man Maaka; Yôsafat mut Mitni;
44 Uzia mut Astarôt; Sama ni Yéel, bon ba Hôtam, mut Arôer;
45 Yédael man Simri ni manyañ wé Yôha nu a bé mut Tis;
46 Éliel mut Mahavim; Yéribai ni Yôsavia bon ba Elnaam; Itma mut Môab,
47 Éliel, Ôbed ni Yaasiel mut Mésôbaya.
Ndoñi
^ Ni hop Lôk Héber, “di yé hés yoñ ni nsôn woñ.”
^ Ni hop Lôk Héber, “wen u bé pamna Israel, u jôbnaga ki nye.”
^ Ni hop Lôk Héber, “ño.”
^ I buk i hop Lôk Héber ini i nla kobla le “homa ba nyônôs ni biték.”
^ Unu ntén kôn won ba nsébél ni hop Pulasi le orge.
^ Tole “tohol.”
^ Tole “tegep mbok i i yé nyoo isi nsôsôgô.”
^ Ni hop Lôk Héber, “man lôs mut.”
^ Jon ba nsébél ni hop Pulasi le neige.
^ Jam kiki bo 2,23 méta. Béñge Apendis B14.
^ Tole “hiléléba hi nsôsôgô.” Béñge Ndoñi bibuk.