Kaat Korintô iba 13:1-14
13 Nano a yé ngélé i nyônôs aa le me yé i lo i bééni. “Bôt iba tole baa bon ba nlama bok mbôgi* inyu boñ le pééna yo ki yo i ba bañ inyu ngim hop.”+
2 To hala kiki nano me ta bé ha, a yé wengoñle me yé ha inyu ngélé i nyônôs iba; jon me nti mabéhna mem i bisu bi ngéda inyu bôt ba bi bôk ba boñ béba, ni inyu bana bape bobasôna le, ibale me ntémb me lo, m’a bañal bé bo,
3 hala kiki ni nyéñ yi too Kristô a mpot toi ni njel yem, nye nu a mbomb bé ipôla nan ndi a ñunda ngui yé ikeñi.
4 Inyule ni maliga, a bi wo i kék inyule a bé bomb, ndi a yé i niñ inyu lipémba li Nyambe.+ Maliga ma yé le yak bés di mbomb kiki a bé bomb, ndi d’a niñ ki lôñni nye+ inyu lipémba li Nyambe inyu nan.+
5 Kena ni bisu i wanba i yi too ni yé yaga ikété hémle; kena ni bisu i wanba le ni yi mimbe mintén mi bôt ni yé.+ Tole ni neebe bé le Yésu Kristô a yé ikété adna ni bé? Handugi le ni nlémél ha bé Nyambe.
6 Me gwé toi botñem le n’a neebe le di nlémél Nyambe.
7 Ndi di nsoohe Nyambe le ni boñ bañ béba yo ki yo. Ha bé le di nyéñ lémél bôt, ndi di nyéñ le bé ni boñ mam malam, to ibale bés di nlémél bé bôt.
8 Inyule di nla bé boñ jam jo ki jo ikolba maliga, ndi di nla ndik boñ mam inyu maliga.
9 Di nkon yaga maséé i ngéda bés di mbomb, ndi bé ni ban-ga ngui. Inyu jam lini nyen di nsoohe le: boña mahéñha ma mbéda.
10 Jon me ntila i mam mana i ngéda me ta bé me ha, inyu boñ le i ngéda me mba ha, me lôôha bañ yôñôl bé makidik ma ngui, inyule Nwet a bi ti bés+ i kunde ini inyu lédés bé, ha inyu tômbôs bé bé.
11 Sôk i nsôk, a lôk kéé, kena ni bisu i kon maséé, i boñ mahéñha, i tina hogbe,+ i bana minlélém mi mahoñol,+ ni i niñ ikété nsañ;+ ha nyen Nyambe nu gwéha ni nu nsañ a’ ba lôñni bé.+
12 Ni yégna bé ni bé, ni sohna ki mamañ i nya i yé pubhaga.
13 Bapubhaga bobasôna ba ñômle bé mayéga map.
14 Konangoo i mbuma ñañ i Nwet le Yésu Kristô lôñni gwéha Nyambe ni bisai bi nlôl ni mbuu mpubi bi ba lôñni bébobasôna.
Ndoñi
^ Ni hop Grikia, “i nyo u bôt ba mbôgi iba tole baa.”
