Bakéés 14:1-20
14 Samsôn a bi sôs i Timna; nyoo i Timna, a tehe ngond i bôt ba Filistia yada.*
2 A témb a bet i kal isañ bo nyañ le: “Ngond Lôk Filistia yada i nlémél me nyoo i Timna, me nsômbôl le ni bédél me nye libii.”
3 Ndi isañ bo nyañ ba kal nye le: “Baa bôda ba mal ikété lihaa joñ tole ikété litén+ joñ inyu boñ le u kee i yéñ muda ikété bôt ba Filistia i i yé ngi kweeba?” Ndi Samsôn a kal isañ le: “Biine ndik me nye inyule nyen a nlémél me.”*
4 Isañ bo nyañ ba bé yi bé le i jam li li bé lôl yak Yéhôva, inyule Nyambe a bé yéñ njel i jôs bôt ba Filistia, inyule bôt ba Filistia ba bé tét Lôk Israel ha ngéda i.+
5 Samsôn a bi sôs i Timna lôñni isañ bo nyañ. I ngéda ba bi pam i nwom mi minkôô mi wai mi Timna, a boma mbondo njéé,* i kônd nye.
6 Ha nyen mbuu u Yéhôva u bi ti nye ngui,+ a was yo bipes biba, kiki mut a nla was man kembee ni moo mé. Ndi a bi añle bé isañ bo nyañ i jam a bi boñ.
7 I mbus, Samsôn a sôs i Timna a pôdôs hingonda hi, Samsôn+ a bé nkwoog nkaa le i muda nu nyen a bé sômbla nye.
8 I ngéda a bi lo lisañ lipe inyu huuna nwaa+ wé, a béñge i homa mim u mbondo njéé u bé, a koba nkee nyôi lôñni wéi i mim u mbondo njéé.
9 A yoñ wéi a ha munu moo mé, a kenek, a jek. I ngéda a bi pam yak isañ bo nyañ, a ti bo ndék mu le ba je. Ndi a bi kal bé bo le a nyôñôl wéi i mim u mbondo njéé.
10 Isañ a bi sôs yak hingonda hi, Samsôn a naña ngand nyoo, inyule hala nyen boñge bôlôm ba bééna lem i boñ.
11 Kiki bôt ba ntehe nye, ba lona 30 ma boñge bôlôm le ba ba ni nye.
12 I mbus, Samsôn a kal bo le: “Soho, nwaha me me kôbe bé kôbi. Ibale ni nkoble me yo ilole dilo disaambok di ngand di mal, m’a ti bé 30 ma mambot nkôñlak ni mabadô ma loñge bôñgô* lôñni 30 ma mambot mape.
13 Ndi ibale ni nkoble bé me yo, bé bon n’a ti me 30 ma mambot nkôñlak ni mabadô ma loñge bôñgô* lôñni 30 ma mambot mape.” Ba kal nye le: “Kôbe bés kôbi yoñ; di nsômbôl nok yo.”
14 Samsôn a kal bo le:
“Yom ba nje i mpémél ikété nu a nje,yom i ne+ i mpémél ikété nu a gwé ngui.”
I mbus dilo daa, ba bi la bé kobol kôbi.
15 I hilo hi nyônôs ina, ba kal nwaa Samsôn le: “Lop nlô woñ+ inyu boñ le a koble bés kôbi, tiga le di ligis we lôñni lihaa li isoñ. U naña bés hana inyu kadal nkus wés?”
16 Nwaa Samsôn a éé nlôm, a kal nye le: “U ñoo me; u ngwés bé me.+ U nkôbe bôt bem kôbi ndi u nkoble bé me yo.” Samsôn a timbhe nye le: “Ibale me nkoble bé yo pua yem to mama yem, wen me koble yo?”
17 Mu dilo di bé di ngi yii ikété ngand dilo disaambok, muda a bi éé nye letee. Sôk i nsôk, i hilo hi nyônôs isaambok, Samsôn a koble nwaa kôbi, inyule muda a bi nai nye. Yak muda a ke a koble bôt bé kôbi+ i.
18 Ilole u u nsude* i hilo hi nyônôs isaambok, bôt ba tison ba kal Samsôn le:
“Kii i ne iloo wéi,kii i gwé ngui iloo mbondo njéé?”+
Samsôn a timbhe bo le:
“Ibale ñin wem nyaga+ u hôla bé bé,ki ni nkobol bé kôbi yem.”
19 Ha nyen mbuu u Yéhôva u bi ti nye ngui,+ a sôs i Askélôn,+ a nol 30 ma bôt, a yoñ mambot map, a ti mo i bôt ba bi kobol kôbi+ yé. I mbus, a témb i mbai isañ lôñni hiun.
20 Ba bi ti nwaa Samsôn+ i libii yak mañge munlôm wada ikété boñge bôlôm ba bi yéga+ Samsôn i ngéda a bi ke i bii muda.
Ndoñi
^ Ni hop Lôk Héber, “muda ikété bingond bi bôt ba Filistia.”
^ Ni hop Lôk Héber, “nyen a kôli i mis mem.”
^ Tole “man mbondo njéé nu a gwé liyéé.”
^ I bôñgô ini yon ba nsébél ni hop Pulasi le lin.
^ I bôñgô ini yon ba nsébél ni hop Pulasi le lin.
^ I nla ki ba, “Ilole a njôp i tuñ i kété.”
