Bakéés 4:1-24
4 I mbus nyemb Éhud, bon ba Israel ba bi témb ba kahal boñ mam mabe i mis ma Yéhôva.+
2 Yéhôva a sem bo i moo ma Yabin kiñe Kanaan,+ nu a bé yééne i Hazôr. Ñane ntôñ wé gwét a bé le Siséra, nu a bé yééne i Harôset+ nu matén.*
3 Bon ba Israel ba lôndôl Yéhôva+ inyule Yabin a bééna 900 bikak bi gwét bi bi bééna bakwade ba nhoo,*+ a bi tét bon ba Israel+ 20 ma nwii.
4 Ha ngéda i, mpôdôl nu muda+ le Débôra, nwaa Lapidôt nyen a bé nkéés i Israel.
5 Débôra a bééna lem i yén isi lién jé ipôla Rama+ ni Bétel,+ i mbok dikôa i Éfraim; bon ba Israel ba bé ke i nyeni inyu boñ le a bagal minkaa nwap.
6 Débôra a bi om nwin yak Barak+ man Abinôam nu a nyééne i Kédes-Naftali,+ a kal nye le: “Yéhôva Nyambe nu Israel a nti we oda ini: ‘Yoñ 10 000 di bôt ba Naftali ni ba Zébulôn, u kee* i hikôa Tabor.
7 Me ga lona we Siséra, ñane ntôñ gwét u Yabin, nye lôñni bikak gwé bi gwét ni bisônda gwé i lép* Kison,+ me ga sem ki nye i moo moñ.’”+
8 Ndi Barak a kal Débôra le: “Ibale u nke ni me, m’a ke; ndi ibale u nke bé ni me, m’a ke bé.”
9 Ha nyen Débôra a bi kal nye le: “M’a ke ni we, ndi i gwét bini u nke i jo bi ga lona bé we lipém; inyule Yéhôva a ga sem Siséra+ i moo ma muda.” I mbus, Débôra a telep, a ke bo Barak i Kédes.+
10 Barak a bi sébél litén li Zébulôn ni li Naftali+ i Kédes, 10 000 di bôt li noñ nye. Yak Débôra a ke lôñni nye.
11 Ndi Héber man Lôk Ken, a bi bagla ni ini Lôk Ken+ ipe, hala wee mbôda Hôbab, nkil*+ Môsi; a bi téé ndap yé libadô bebee ni e ikeñi i i yé i Zaananim, bebee ni Kédes.
12 Ba bi añle Siséra le Barak man Abinôam, a mbet i hikôa Tabor.+
13 I nlélém ngéda, Siséra a kot bikak gwé gwobisôna, 900 bikak bi bi gwé bakwade ba nhoo,* a kot yak bisônda gwé gwobisôna bi bi bé lôñni nye i Harôset nu matén, ba kahal ke i lép* Kison.+
14 Débôra a kal Barak le: “Telep, inyule Yéhôva a ga sem Siséra i moo moñ i len ini. Yéhôva a ga bôk we i bisu.” Ha nyen Barak a bi sôs hikôa Tabor, 10 000 di bôt li noñok nye.
15 Yéhôva a yubdaha+ Siséra ni bikak gwé gwobisôna ni ntôñ wé gwét wonsôna i bisu bi Barak. Siséra a sôs i kak yé, a ke ngwéé.
16 Barak a noñ bikak bi gwét ni ntôñ bisônda letee ni Hasôret nu matén. Ba nol ntôñ gwét u Siséra wonsôna ni pansoñ; to wada a bi pei bé.+
17 Ndi Siséra a ke ngwéé, a jôp i ndap libadô i Yael,+ nwaa Héber man Lôk Ken, inyule nsañ u bé ipôla Yabin,+ kiñe Hazôr ni lihaa li Héber+ man Lôk Ken.
18 Yael a pam, a ke i boma Siséra, a kal nye le: “A nwet wem, lo jôp, lo jôp nyono. U kon bañ woñi.” Ha nyen Siséra a bi lo, a jôp i ndap yé libadô, Yael a hô nye lañgat.
19 Siséra a kal Yael le: “Soho, ti me ndék malép, me nyo inyule nyus i gwé me.” Yael a yibil hibôi hi milik, a ti nye, a nyo,+ Yael a témb a hô nye lañgat.
20 Siséra a kal Yael le: “Telep hana lijubul li ndap libadô, ibale mut a nlo ndi a bat we le: ‘Baa munlôm a yé munu?’ W’a kal nye le: ‘To!’”
21 Ndi Yael, nwaa Héber, a yoñ mpomok kék u ndap libadô, a yoñ ki hama. Kiki Siséra a bé ke ’ilo inyule a bé nwaak, Yael a tiige mbeñel mbeñel ipañ yé, a tôp nye mapañ ma ño ni kék, kayéle kék i jôp ’isi, Siséra a wo.+
22 Barak a bé noñ Siséra, Yael a ke a boma nye, a kal nye le: “Loo me unda we i mut u nyéñ.” A ke lôñni nye, a ada Siséra a niñi mim, kék i bak nye nsomok munu mapañ ma ño.
23 Hala nyen, Nyambe a bi boñ le bon ba Israel+ ba yémbél Yabin, kiñe Kanaan i hilo hi.
24 Bon ba Israel ba bi waa bé jôs Yabin, kiñe Kanaan,+ letee Yabin, kiñe Kanaan+ a tjiba.
Ndoñi
^ Tole “Harôset-ha-Gôiim.”
^ Ni hop Lôk Héber, “bikak bi bikei.”
^ Tole “u tjam bôt boñ.”
^ Tole “hiléléba hi nsôsôgô.”
^ Hala wee isañ nwaa Môsi.
^ Ni hop Lôk Héber, “bikak bi bikei.”
^ Tole “hiléléba hi nsôsôgô.”
