Hiôb 37:1-24
37 “Nano, ñem u yé i bép me,a yé wengoñle ñem wem u nsômbôl nyodi i homa wé.
2 Emblana yaga mbimba i kiñ Nyambe,emblana yak kiñ yé i i mbam kiki mbambat.
3 A nwas mbambat le i nôga isi ngii yosôna,a ñep ki nwegnwek+ wé le a pam letee ni i masuk ma ’isi.
4 I ngéda nwegnwek a mal nwek, ha nyen soso kiñ a nôga;+kiñ Nyambe i mbam kiki mbambat,ndi kiñ yé i nkéñ bé nwegnwek le a nwek.
5 Kiñ Nyambe i mbam+ i nya i nhélhana;a mboñ mam makeñi ma di nla bé to nok.+
6 Inyule a nkal libu li lisuni* le: ‘Kwoo nyoo ’isi,’+a nkal yak nop le: ‘No yaga ni ngui.’+
7 Nyambe a ntéé minson nwominsôna mi bôt ba binam,*inyu boñ le bobasôna ba yi minson nwé.
8 Binuga bi bikai bi nke nyoo i bihôk gwap,bi nyégle ki mu mayééne map.
9 Mbuk mbebi a nhôñ, a lôlak i homa wé,*+yak mbebi i ñombok+ i nlona lihep.
10 Ibale Nyambe a ñep nhébék wé, u nti minluñ mi ais,+yak malép momasôna ma maba.+
11 Ñ, a mbééga ond malép,a nsand nwegnwek+ wé ikété ond.
12 Ond i nkiiña, i kenek i homa Nyambe a ñep yo,i mboñ mam momasôna Nyambe a nkal+ le i boñ hana ’isi.
13 A mboñ hala inyu kogse,*+ tole inyu yôôs hisi,tole inyu unda loñge yé ñem.*+
14 A Hiôb, emble i jam lini!
Mom le nwee, u ôt ki pék mu minson mi hélha mi Nyambe.+
15 Baa u nyi lelaa Nyambe a nkena ond,*a boñok ki le nwegnwek a lôl mu ond, a bayak?
16 Baa u nyi imbe njel ond i nkil+ nyoo i ngii?
Hala a yé minson mi hélha mi Nu a nyi mam momasôna.+
17 Inyuki mambot ma mboñ le u nok lék,i ngéda hisi hi yé nwee inyule mbebi i nlôl i nwelmbok?+
18 Baa u nla sambal ngii yosôna+ kiki Nyambe,u lédés ki yo kiki ñôôk léman?
19 Yis ni bés kii di nlama kal nye;di nla bé timbhe inyule di yé ikété jiibe.
20 Baa me nla kal Nyambe le me nyéñ pôdôs nye?
Tole mut a bi kal ngim jam le ba nlama añle nye?+
21 To hala kiki mapubi* ma mbai nyoo i ngii,bôt ba binam ba nla bé to tehe mo,letee mbebi i tagbe, i kena ond yosôna.
22 I mapubi ma nlôl i ñombok ma mbai kiki gôl,bikeñi bi Nyambe+ bi nkônha woñi.
23 Di nla bé pam i yi mam momasôna ma Nu ngui yosôna;+a nlôôha bana ngui,+kekikel, a nkôde bé mbagi sép,+ a nwaa bé to boñ mam ma téé sép.+
24 Inyu hala nyen bôt ba binam ba nlama kon nye woñi.+
Inyule a nsayap bé i bôt ba nhoñol le ba gwé pék.”*+
Ndoñi
^ Jon ba nsébél ni hop Pulasi le neige.
^ Ni hop Lôk Héber, “a mband woo u hiki mut.”
^ Ni hop Lôk Héber, “i tuñ yé.”
^ Ni hop Lôk Héber, “ndéñbe yé i gwés.”
^ Ni hop Lôk Héber, “ntoñgo.”
^ Tole “a nti ond oda.”
^ Hala wee, mapubi ma hiañgaa.
^ Ni hop Lôk Héber, “ba gwé pék i ñem.”
