Lôk Lévi 24:1-23
24 Yéhôva a kônde pôdôs Môsi, a kal nye le:
2 “Inyu bana mapubi, kal bon ba Israel le ba lona we môô malam ma ôlivé,* inyu boñ le bilambe bi loñ ngéda yosôna.+
3 Arôn a ga boñ le i bilambe bi téé i bisu bi libadô li li nsôô nkuu Mbôgi mu ndap libadô i likoda, bi loñ ngéda yosôna i bisu bi Yéhôva. I litéak lini li ga nom i boga ni boga mu tjai dinan tjodisôna.
4 A ga bii bilambe mu tééne bilambe+ i bañga gôl, i bisu bi Yéhôva ngéda yosôna.
5 “U ga yoñ flawa ilam, u boñ 12 ngiiña bret; hiki bret i bak mboñok ni kilô iba ni pes* i flawa ilam.
6 U ga tek minlôñ mi bret ima i ngii téblé i bañga gôl, i bisu bi Yéhôva;+ hiki nloñ+ u ban-ga bret bisamal.
7 U nlama ha bañga nunumba i ngii hiki nloñ u bret, yon i ga ba kiki yimbne i bret gwobisôna.* Hala a yé sesema i hié+ inyu Yéhôva.
8 Hiki kel sabat, a nlama bii bret i bisu bi Yéhôva+ ngéda yosôna. Hala a yé malômbla ipôla me ni bon ba Israel inyu ntandaa ngéda.
9 I bret ini i ga ba inyu Arôn ni bon bé bôlôm,+ ba ga je yo i homa a yé mpubhaga,+ inyule i yé yom i nlôôha pubhaga inyu prisi, i lôlak mu bisesema bi hié inyu Yéhôva. I litéak lini li ga nom i boga ni boga.”
10 Ndi mut wada a bé mukété bon ba Israel, nyañ a bé ngond Lôk Israel, isañ a bak man Égiptô;+ a bôdôl jo sañ ni man Israel numpe mu homa litén li nyééne.
11 Man ngond Lôk Israel a kahal sol Jôl+ li Nyambe,* a tiihege* jo. Jon ba bi kena nye yak Môsi.+ Nyañ mut nu, jôl jé li bé le Sélômit, a bé ngond Dibri, mut litén li Dan.
12 Ba tééda yaga i mut nu letee ba sôk yi+ makidik ma Yéhôva.
13 Yéhôva a kal ki Môsi le:
14 “I mut a bi tiihe jôl jem, pémés nye mu homa litén li nyééne, yak i bôt bobasôna ba bi nok nye a ntiihe jôl jem ba nlama bii moo map i ngii ño wé; i mbus, ntôñ wonsôna u nlama ôm nye ngok.+
15 U ga kal bon ba Israel le: ‘Ibale mut a ntiihe Nyambe wé, a ga saa inyu béba a mboñ.
16 Jon i mut a ñôbôs jôl li Yéhôva a nlama nôla,+ ntôñ wonsôna u nlama yaga ôm nye ngok. Nu ni nu a nsol jôl li Nyambe a nlama nôla, to a yé nkén mut, to a yé man Israel.
17 “‘Ibale mut a nol mut numpe,* a nlama nôla+ ibabé set.
18 Nu ni nu a mbép lém kayéle i wo, a nlama saa yo, a ga saa* niñ ni niñ.
19 Ibale mut a mbabaa mut wé libôk, ba ga boñ nye nlélém.+
20 A ga saa buga inyu buga, jis inyu jis, lisoñ inyu lisoñ; nlélém kiki a mbabaa mut numpe, hala nyen ba ga babaa+ nye.
21 I mut a mbép nuga kayéle i wo, a nlama saa+ yo; ndi i mut a mbép mut numpe kayéle a wo, a nlama nôla.+
22 “‘Nlélém litiñ won ni ga noñ, to mut a yé nkén mut, to a yé man+ Israel, inyule men me yé Yéhôva Nyambe nan.’”
23 Ha nyen Môsi a bi pôdôs bon ba Israel, ba yoñ i mut a bi tiihe jôl li Nyambe, ba pémés nye mu homa litén li nyééne, ba ôm ki nye ngok.+ Bon ba Israel ba boñ toi kiki Yéhôva a bi kal Môsi.
Ndoñi
^ Ni hop Lôk Héber, “môô ma mintédék mi matam ma ôlivé.”
^ Ni hop Lôk Héber, “môga ima ma éfa ikété jôm.” Béñge Apendis B14.
^ Tole “ndék yom mu likébla i i mbigdaha i bret gwobisôna.”
^ Tole “a ôbhak.”
^ Hala wee, jôl le “Yéhôva,” kiki minlôñ 15 ni 16 bi ñunda.
^ Tole “a mbép mut numpe kayéle a wo.”
^ Tole “tja.”